ಡಚ್ಚರ ನಾಡಲ್ಲಿ ಕನ್ನಡ ಕಲರವ

ನೆದರ್ ಲ್ಯಾಂಡ್‌: ನೆದರ್ ಲ್ಯಾಂಡ್‌ನ ವಿದ್ಯಾನಗರಿ ಡೆಲ್ಫ್ಟ್ ನಲ್ಲಿ ಶ್ರೀಗಂಧ ಹಾಲೆಂಡ್ ಕನ್ನಡ ಬಳಗದಿಂದ ಕನ್ನಡ ರಾಜ್ಯೋತ್ಸವವನ್ನು ಅದ್ಧೂರಿಯಾಗಿ ಆಚರಿಸಲಾಯಿತು.

ಹಲವು ದಶಕಗಳಿಂದ ನೆದೆರ್ ಲ್ಯಾಂಡ್ ನಲ್ಲಿ ನೆಲೆಸುತ್ತಿರುವ ಕನ್ನಡಿಗರೆಲ್ಲ ಸೇರಿ ಸಂಘಟಿಸಿರುವ ಶ್ರೀಗಂಧ ಹಾಲೆಂಡ್ ಬಳಗ ಈ ಕಾರ್ಯಕ್ರಮವನ್ನು ಆಯೋಜಿಸಿತ್ತು. ಕನ್ನಡ ಸಂಸ್ಕೃತಿಯನ್ನು ಬಿಂಬಿಸುವ ನೃತ್ಯಗಳು, ನಾಟಕಗಳು, ಕ್ವಿಜ್ ಕಾರ್ಯಕ್ರಮ, ಸಂಗೀತ ಕಾರ್ಯಕ್ರಮ ಸೇರಿದಂತೆ ಹತ್ತಾರು ಕಾರ್ಯಕ್ರಮಗಳು ಕನ್ನಡದ ನೆಲವನ್ನು ನೆನಪಿಸಿದವು.

ಅದರಲ್ಲೂ ಕನ್ನಡದ ಬಗ್ಗೆ ಕುತೂಹಲ ಕೆರಳಿಸುವ ಡಿಜಿಟಲ್ ಪ್ರಶ್ನಾವಳಿ ಕಾರ್ಯಕ್ರಮ ನೆರೆದಿದ್ದವರ ಕನ್ನಡ ಜ್ಞಾನವನ್ನು ಓರೆಗೆ ಹಚ್ಚಿತ್ತು. ಕೊರೆಯುವ ಚಳಿಯ ಮಧ್ಯೆಯೂ ಕಾರ್ಯಕ್ರಮದಲ್ಲಿ ನೂರಕ್ಕೂ ಹೆಚ್ಚು ಕನ್ನಡ ಕುಟುಂಬಗಳು ಒಂದೆಡೆಗೆ ಸೇರಿ ಕಾರ್ಯಕ್ರಮವನ್ನು ಅಂದಗಾಣಿಸಿಕೊಟ್ಟರು.