ಕರ್ನಾಟಕ

ಗಣಿ ಗುತ್ತಿಗೆ ನವೀಕರಣ: ಸಾವಿರ ಕೋಟಿ ನಷ್ಟ; ಸಿದ್ದರಾಮಯ್ಯ ನೇರ ಭಾಗಿ: ಈಶ್ವರಪ್ಪ ಆರೋಪ

Pinterest LinkedIn Tumblr

Eshwarappa-K-S

ಬೆಂಗಳೂರು: ಕಬ್ಬಿಣ ಅದಿರಿನ ಗಣಿಗಳನ್ನು ಹರಾಜಿನ ಮೂಲಕ ಹಂಚಿಕೆ ಮಾಡಬೇಕು ಎಂದು ಕೇಂದ್ರ ಸರ್ಕಾರ ಮತ್ತು ಸುಪ್ರೀಂ ಕೋರ್ಟ್‌ ಹೇಳಿದ್ದರೂ ರಾಜ್ಯ ಗಣಿ ಇಲಾಖೆ ಎಂಟು ಗಣಿ ಕಂಪೆನಿ­ಗಳ ಗುತ್ತಿಗೆ ನವೀಕರಣ ಮಾಡಿರುವುದರಿಂದ ರಾಜ್ಯ ಬೊಕ್ಕಸಕ್ಕೆ ಸಾವಿರ ಕೋಟಿಗೂ ಹೆಚ್ಚು ನಷ್ಟವಾಗಿದೆ ಎಂದು ವಿಧಾನ ಪರಿಷತ್‌ ವಿರೋಧ ಪಕ್ಷದ ನಾಯಕ, ಬಿಜೆಪಿಯ ಕೆ.ಎಸ್‌. ಈಶ್ವರಪ್ಪ ಆರೋಪಿಸಿದರು.

‘ಮುಖ್ಯಮಂತ್ರಿ ಸಿದ್ದರಾಮಯ್ಯ  ಇದರಲ್ಲಿ ನೇರವಾಗಿ ಭಾಗಿಯಾಗಿ­ದ್ದಾರೆ. ಈ ಬಗ್ಗೆ ರಾಜ್ಯದ ಜನತೆಗೆ ಸ್ಪಷ್ಟನೆ ನೀಡಬೇಕು’ ಎಂದು ಅವರು ಪತ್ರಿಕಾಗೋಷ್ಠಿಯಲ್ಲಿ ಆಗ್ರಹಿಸಿದರು.

‘ಕೇಂದ್ರ ಸರ್ಕಾರ ಸುಗ್ರೀವಾಜ್ಞೆ ಮೂಲಕ ಗಣಿ ಮತ್ತು ಖನಿಜ (ಅಭಿ­ವೃದ್ಧಿ ಮತ್ತು ನಿಯಂತ್ರಣ) ಕಾಯ್ದೆಗೆ ಜನವರಿ 12ರಂದು ತಿದ್ದುಪಡಿ ತಂದಿದೆ. ಇದನ್ನು ಉಲ್ಲಂಘಿಸಿ 2,386 ಎಕರೆ ಭೂಮಿಯನ್ನು ಈ ಕಂಪೆನಿಗಳಿಗೆ ಹಂಚಿಕೆ ಮಾಡಲಾಗಿದೆ’ ಎಂದರು.

‘ಗುತ್ತಿಗೆ ನವೀಕರಣಗೊಂಡ ಕಂಪೆನಿ­ಗಳ ಪೈಕಿ, ಅಕ್ರಮ ಗಣಿಗಾರಿಕೆ ಆರೋಪ­ದಲ್ಲಿ ಸಿಬಿಐ ತನಿಖೆ ಎದುರಿ­ಸುತ್ತಿರುವ ಕಂಪೆನಿಗಳೂ ಸೇರಿವೆ. ಸರ್ಕಾರಕ್ಕೆ ರಾಜಧನ ಪಾವತಿಸದ ಕಂಪೆನಿಯೂ ಇದೆ’ ಎಂದರು.

‘ಈ ಗಣಿಗಳನ್ನು ಹರಾಜು ಹಾಕಿದ್ದರೆ ಸರ್ಕಾರಕ್ಕೆ ಸಾವಿರಾರು ಕೋಟಿ ಸಂಗ್ರಹ­ವಾಗುತ್ತಿತ್ತು. ಎಂಎಂ­ಆರ್‌ಡಿ 1957ರ ಕಾಯ್ದೆ ಪ್ರಕಾರ­ವಾಗಿಯೇ ಗಣಿ ಗುತ್ತಿಗೆ ನವೀಕರಣ ಮಾಡಲಾಗಿದೆ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಹೇಳುತ್ತಿ­ದ್ದಾರೆ. ಆದರೆ, ಕಾಯ್ದೆ ರೂಪದಲ್ಲಿ ತಿದ್ದುಪಡಿ ಜಾರಿಗೆ ಬಂದಾಗ ಹಿಂದಿನ ಕಾನೂನು ಅನ್ವಯ­ವಾಗುವುದಿಲ್ಲ ಎಂಬ ಕನಿಷ್ಠ ಅರಿವು ಮುಖ್ಯಮಂತ್ರಿಗಳಿಗೆ ಇಲ್ಲವೇ?’ ಎಂದು ವ್ಯಂಗ್ಯವಾಡಿದರು.

‘ಗಣಿ ಹಂಚಿಕೆಯನ್ನು ತಕ್ಷಣ ರದ್ದು­ಗೊಳಿಸಿ ಕೇಂದ್ರದ ಹೊಸ ಕಾಯ್ದೆ ಅನ್ವಯ ಮರುಹರಾಜು ಹಾಕಬೇಕು. ತಪ್ಪಿತಸ್ಥ ಅಧಿಕಾರಿಗಳ ವಿರುದ್ಧ ಕ್ರಮ ಕೈಗೊಳ್ಳಬೇಕು’ ಎಂದು ಅವರು ಆಗ್ರಹಿಸಿದರು.

ಈಶ್ವರಪ್ಪ ಆರೋಪಗಳೇನು…?
*ಅಕ್ರಮ ಗಣಿಗಾರಿಕೆ ನಡೆಸಿರುವ ಕಂಪೆನಿಗಳ ಪಟ್ಟಿಯಲ್ಲಿರುವ ಸೀಸಾಸ್ಟೆರ್ಲೈಟ್‌ಗೆ ಜನವರಿ 7ರಂದು 504 ಎಕರೆ ಜಮೀನು  ನಾಲ್ಕನೇ ಬಾರಿ ಮಂಜೂರು

*ಹೊಸ ಕಾಯ್ದೆ ಜಾರಿಗೆ ಬಂದಿದ್ದರೂ, ಜನವರಿ 12 ಮತ್ತು 19ರಂದು ಎಂಟು ಕಂಪೆನಿಗಳ ಗಣಿ ಗುತ್ತಿಗೆ ನವೀಕರಣಕ್ಕೆ ತಾತ್ವಿಕ ಒಪ್ಪಿಗೆ. ಆದರೆ ಈ ಕಂಪೆನಿಗಳು ಪಡೆದಿದ್ದ ಗುತ್ತಿಗೆ ಅವಧಿ 2–3 ವರ್ಷಗಳ ಹಿಂದೆಯೇ ಮುಗಿದಿದೆ.
*ಗುತ್ತಿಗೆ ನವೀಕರಣ ಪಡೆದಿರುವ ರಾಮ್‌ಗಡ ಮಿನರಲ್ಸ್‌ ಹಾಗೂ ಮಿನ­ರಲ್‌ ಎಂಟರ್‌ಪ್ರೈಸ್‌ ವಿರುದ್ಧ ಸಿಬಿಐನಲ್ಲಿ ಪ್ರಕರಣಗಳು ದಾಖಲಾಗಿವೆ.

***
108 ಕಂಪೆನಿಗಳ ಪೈಕಿ ಎಂಟು ಕಂಪೆನಿಗಳಿಗೆ ಮಾತ್ರ ಗುತ್ತಿಗೆ ನವೀಕರಣ ಮಾಡಿರುವ ಕಾರಣ­ವೇನು? ಅವರೆಲ್ಲ ನಿಮ್ಮ ಬೀಗರೇ?
– ಕೆ.ಎಸ್‌. ಈಶ್ವರಪ್ಪ

Write A Comment