ಹನೂರು/ಚಾಮರಾಜನಗರ: ಸಮೀಪದ ಕೂಡ್ಲೂರಿನ ಏಳುದಂಡು ಮುನಿಯಪ್ಪನ ಜಾತ್ರೆಯಲ್ಲಿ ಶನಿವಾರ ಹಲವು ವೈರುಧ್ಯಗಳು ನಡೆದವು. ಜಿಲ್ಲಾಡಳಿತ ಈ ಜಾತ್ರೆಯಲ್ಲಿ ಪ್ರಾಣಿಬಲಿ ನಿಷೇಧಿಸಿದ್ದರೂ ಎರಡುಸಾವಿರಕ್ಕೂ ಹೆಚ್ಚು ಪ್ರಾಣಿಗಳನ್ನು ಬಲಿ ನೀಡಲಾಯಿತು! ಇದನ್ನು ತಡೆಯಲು ಹೋದ ಸ್ವಾಮೀಜಿಯೊಬ್ಬರನ್ನು ಭಕ್ತರು ಮಚ್ಚು ತೋರಿಸಿ ಓಡಿಸಿದ್ದೂ ಆಯಿತು. ಅಚ್ಚರಿ ಎಂದರೆ ಈ ಎಲ್ಲ ಘಟನೆಗಳಿಗೆ ಪೊಲೀಸರೇ ‘ಮೂಕ’ಸಾಕ್ಷಿಯಾದರು!
ಈ ಪ್ರಸಂಗಗಳೆಲ್ಲ ತಮಿಳುನಾಡು ಗಡಿಯಂಚಿನಲ್ಲಿ ನಡೆದಿದ್ದರಿಂದ ಪೊಲೀಸರು ಕೈಕಟ್ಟಿ ನಿಲ್ಲಬೇಕಾಯಿತು. ಕುರಿ, ಕೋಳಿ, ಮೇಕೆಗಳನ್ನು ಬಲಿ ನೀಡುವುದು ಇಲ್ಲಿನ ಹಳೇ ಸಂಪ್ರದಾಯ. ಆದರೆ, ಹೈಕೋರ್ಟ್‌ ಆದೇಶದ ಪ್ರಕಾರ ಜಿಲ್ಲಾಧಿಕಾರಿ ಅವರು ಪ್ರಾಣಿಬಲಿ ನಿಷೇಧಿಸಿ ಆದೇಶ ಹೊರಡಿಸಿದ್ದರು. ಇದರ ಅನ್ವಯ ಪೊಲೀಸರ ಸರ್ಪಗಾವಲು ಹಾಕಲಾಗಿತ್ತು.
ದೇವಸ್ಥಾನದ ಮುಂದೆ ದೊಡ್ಡ ಹೊಳೆ ಇದೆ. ಈ ಹೊಳೆಯ ಆಚೆಗಿನ ಪ್ರದೇಶ ತಮಿಳುನಾಡಿಗೆ ಸೇರಿದೆ. ಭಕ್ತರು ಹೊಳೆಯ ಆಚೆಗೆ ಹೋಗಿ ಪ್ರಾಣಿಗಳನ್ನು ಬಲಿ ನೀಡಿದರು. ಇದರಿಂದ ಸ್ಥಳೀಯ ಪೊಲೀಸರು ಏನನ್ನೂ ಮಾಡದಾದರು. ನೋಡನೋಡುತ್ತಿದ್ದಂತೆಯೇ ಅಪಾರ ಸಂಖ್ಯೆಯ ಕೋಳಿ, ಕುರಿ, ಮೇಕೆಗಳ ತಲೆ ಉರುಳಿದವು. ಹೊಳೆದಡವೆಲ್ಲ ಕೆಂಪು ಬಣ್ಣಕ್ಕೆ ತಿರುಗಿತು. ಅಪಾರ ರಕ್ತ ಹೊಳೆಯ ನೀರಿನೊಂದಿಗೆ ಹರಿಯಿತು.
ಕಾಲ್ಕಿತ್ತ ಸ್ವಾಮೀಜಿ: ಜಾತ್ರೆಯಲ್ಲಿ ಬೆಂಗಳೂರು ಮೂಲದ ಪ್ರಾಣಿ ದಯಾ ಸಂಘದ ಸ್ವಾಮೀಜಿ ಮತ್ತು ಅವರ ಕಾರ್ಯಕರ್ತರು ಪ್ರಾಣಿಬಲಿ ತಡೆಗೆ ಜಾಗೃತಿ ಮೂಡಿಸುತ್ತಿದ್ದರು. ಕುರಿಗಳ ತಲೆ ಕತ್ತರಿಸುತ್ತಿದ್ದ ಸ್ಥಳಕ್ಕೆ ಧಾವಿಸಿದ ಸ್ವಾಮೀಜಿ ಅದನ್ನು ರಕ್ಷಿಸಲು ಮುಂದಾದರು. ಈ ವೇಳೆ ಕೆಲವರು ಮಚ್ಚು ಎತ್ತಿಕೊಂಡು ಸ್ವಾಮೀಜಿ ವಿರುದ್ಧವೇ ತಿರುಗಿಬಿದ್ದರು. ಇದರಿಂದ ಸ್ವಾಮೀಜಿ ಮತ್ತು ಅವರ ಕಾರ್ಯಕರ್ತರು ಅಲ್ಲಿಂದ ಕಾಲ್ಕಿತ್ತರು.
