ಅಮೆರಿಕದ ಪಬ್ವೊಂದರ ಶೌಚಾಲಯದಲ್ಲಿ ಹಿಂದೂ ದೇವರ ಚಿತ್ರ ಬಳಿಸಿರುವುದು ಕಂಡು ಬಂದಿದ್ದು, ಭಾರತೀಯ ಮೂಲದ ಯುವತಿ ಅಂಕಿತಾ ಮಿಶ್ರಾ ಇದಕ್ಕೆ ಆಕ್ರೋಶ ವ್ಯಕ್ತಪಡಿಸಿ ಪಬ್ ಮಾಲೀಕ ಕ್ಷಮೆ ಯಾಚಿಸುವಂತೆ ಮಾಡಿದ್ದಾರೆ.
ಇತ್ತೀಚೆಗೆ ನ್ಯೂಯಾರ್ಕ್ನ ಹೌಸ್ ಆಫ್ ಎಸ್ ಪಬ್ಗೆ ಅಂಕಿತಾ ಭೇಟಿ ನೀಡಿದ್ದರು. ಈ ವೇಳೆ ಶೌಚಾಯಲಯಕ್ಕೆ ತೆರಳಿದ ಸಂದರ್ಭದಲ್ಲಿ ಶಿವ, ಕೃಷ್ಣ, ಗಣೇಶ, ಕಾಳಿ, ರಾಧೆ ಫೋಟೋಗಳಿಂದ ಶೌಚಾಲಯದ ಗೋಡೆಗಳನ್ನು ಅಲಂಕರಿಸಿರುವುದು ಕಂಡು ಬಂದಿದೆ.
ಈ ಬಗ್ಗೆ ರೊಚ್ಚಿಗೆದ್ದ ಭಾರತೀಯ ಮೂಲದ ಯುವತಿ ಪಬ್ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿ ಸಾಮಾಜಿಕ ತಾಣದಲ್ಲಿ ಪೋಸ್ಟ್ ಹಾಕಿದ್ದರು. ಹಿಂದೂ ಧರ್ಮೀಯರ ಭಾವನೆಗೆ ಧಕ್ಕೆಯಾಗುವಂತೆ ದೇವರುಗಳ ಚಿತ್ರಗಳಿಂದ ಶೌಚಾಲಯವನ್ನು ಅಲಂಕರಿಸಿದ್ದು, ಇದರಿಂದ ನಮ್ಮ ಸಂಸ್ಕೃತಿಗೆ ಅಪಮಾನವಾಗಿದೆ ಎಂದು ಅಂಕಿತಾ ತಿಳಿಸಿದ್ದರು. ಈ ಪೋಸ್ಟ್ ವೈರಲ್ ಆಗುತ್ತಿದ್ದಂತೆ ವೆಬ್ಸೈಟ್ವೊಂದು ಈ ಕುರಿತು ವರದಿ ಪ್ರಕಟಿಸಿತ್ತು.
ಇದರಿಂದ ಎಚ್ಚೆತ್ತು ಕೊಂಡ ಪಬ್ ಮಾಲೀಕ ಕ್ಷಮೆಯಾಚಿಸಿದ್ದಲ್ಲದೆ, ಶೌಚಾಲಯದಿಂದ ಫೋಟೊಗಳನ್ನು ತೆಗೆಯುವುದಾಗಿ ಹೇಳಿದ್ದಾರೆ. ಹಾಗೆಯೇ ಎಲ್ಲ ಸಂಸ್ಕೃತಿಯನ್ನು ಗೌರವಿಸುವುದಾಗಿ ತಿಳಿಸಿ, ಗೋಡೆಯ ಅಲಂಕಾರವನ್ನು ಬದಲಿಸುವುದಾಗಿ ಅಂಕಿತಾ ಅವರಿಗೆ ಭರವಸೆ ನೀಡಿದ್ದಾರೆ.
ಇತ್ತೀಚೆಗಷ್ಟೇ ಲಂಡನ್ನಲ್ಲಿ ಬಿಯರ್ ಬಾಟಲ್ವೊಂದಕ್ಕೆ ಗಣೇಶ ದೇವರ ಹೆಸರನ್ನು ಹಾಕಿ ಕಂಪನಿಯೊಂದು ಮಾರಾಟ ಮಾಡಿದ್ದರು. ಈ ಬಗ್ಗೆ ವ್ಯಾಪಾಕ ಆಕ್ರೋಶ ವ್ಯಕ್ತವಾದ ಹಿನ್ನಲೆಯಲ್ಲಿ ಕಂಪನಿಯು ಕ್ಷಮೆಯಾಚಿಸಿ ಹೆಸರನ್ನು ಬದಲಿಸುವುದಾಗಿ ಹೇಳಿಕೊಂಡಿತ್ತು.
Comments are closed.