ಇಂಡೋನೇಷ್ಯಾ: ಅಕ್ಟೋಬರ್ 29 ರಂದು ಇಂಡೋನೇಷ್ಯಾ ರಾಜಧಾನಿಯಿಂದ ಪಾಂಗ್ಕಲ್ ಪಿನಾಗ್ ದ್ವೀಪಕ್ಕೆ ಹೊರಟಿದ್ದ ಲಯನ್ ಏರ್ ಬೋಯಿಂಗ್ 737 ವಿಮಾನ ಸಮುದ್ರದಲ್ಲಿ ಪತನಗೊಂಡು ಪ್ರಯಾಣಿಕರೆಲ್ಲರೂ ಸಾವನ್ನಪ್ಪಿರುವ ಶಂಕೆ ವ್ಯಕ್ತವಾಗಿತ್ತು. ಯಾವುದೇ ಮೃತದೇಹಗಳು ಪತ್ತೆಯಾಗಿರಲಿಲ್ಲ.
ಈ ಅವಘಡದಲ್ಲಿ ಹೊಸ ಬಾಳಿಗೆ ಹೆಜ್ಜೆ ಇಡುವ ಸಂಭ್ರಮದಲ್ಲಿದ್ದ ಮಧುಮಗ ಕೂಡ ಬಲಿಯಾಗಿದ್ದ. ಇನ್ನೇನು ಕೆಲವೇ ದಿನಗಳಲ್ಲಿ ಮದುವೆಯಾಗಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟು, ಹೊಸ ಜೀವನ ನಡೆಸಬೇಕಿದ್ದವರ ಬಾಳಲ್ಲಿ ಬಿರುಗಾಳಿ ಬೀಸಿತ್ತು.
ಜಕಾರ್ತಾದಲ್ಲಿ ಕಾನ್ಫೆರೆನ್ಸ್ ನಲ್ಲಿ ಭಾಗವಹಿಸಲು ಹೊರಟಿದ್ದ ರಿಯೋ ನಂದಾ ಪ್ರತಮ ವಾಪಸ್ ಬರಲೇ ಇಲ್ಲ. ಇಂಡೋನೇಷ್ಯಾದಲ್ಲಿ ರಿಯೋನ ಭಾವಿ ಹೆಂಡತಿ ಇಂಟನ್ ಸೈರಿ ಕಾಯುತ್ತಾ ಕುಳಿತಿದ್ದಳು. ವಿಷಯ ತಿಳಿದ ತಕ್ಷಣ ಆಕೆಗೆ ಬರಸಿಡಿಲು ಬಡಿದಂತಾಗಿತ್ತು.
ನವೆಂಬರ್ 11 ರಂದು ರಿಯೋ ಮತ್ತು ಇಂಟನ್ ದಾಂಪತ್ಯ ಜೀವನಕ್ಕೆ ಕಾಲಿರಿಸಬೇಕಿತ್ತು. ಆದರೆ ಅಕ್ಟೋಬರ್ 29 ರಂದೇ ರಿಯೋ ಬಾರದ ಲೋಕಕ್ಕೆ ಹೋಗಿದ್ದ.
ರಿಯೋ ಜಕಾರ್ತಾಗೆ ಹೋಗುವ ಮುನ್ನ ಇಂಟನ್ಗೆ ತಮಾಷೆ ಮಾಡುತ್ತಾ, ” ನಾನು ಜಕಾರ್ತಾದಿಂದ ಕಾನ್ಫೆರೆನ್ಸ್ ಮುಗಿಸಿ ಮದುವೆಗೆ ಬರಲಿಲ್ಲವೆಂದಾದರೂ ನೀನು ಮಧುಮಗಳಂತೆ ಸಿಂಗಾರಕೊಳ್ಳಬೇಕು. ನಾನು ಮದುವೆಗೆಂದು ಕೊಡಿಸಿರುವ ಶುಭ್ರ ಶ್ವೇತ ಉಡುಗೆಯನ್ನೇ ತೊಡಬೇಕು. ಸುಂದರವಾಗಿ ಸಿಂಗಾರಗೊಳ್ಳಬೇಕು. ಕೈಯಲ್ಲಿ ಶುಭ್ರ ಬಿಳಿ ಗುಲಾಬಿ ಇರಬೇಕು” ಎಂದು ಹೇಳಿದ್ದ.
ಈಗ ಇಂಟನ್ ರಿಯೋ ಹೇಳಿದ್ದ ಮಾತನ್ನು ಉಳಿಸಿಕೊಳ್ಳಲು, ಆತನ ಕೋರಿಕೆ ನೆರವೇರಿಸಲು ರಿಯೋ ಕೊಡಿಸಿದ್ದ ಮದುವೆಯ ಉಡುಗೆಯನ್ನು ತೊಟ್ಟು, ಸುಂದರವಾಗಿ ಸಿಂಗಾರಗೊಂಡು, ಕೈಯಲ್ಲಿ ಬಿಳಿ ಗುಲಾಬಿ ಹಿಡಿದು ಫೋಟೋ ಶೂಟ್ ಮಾಡಿಸಿದ್ದಾಳೆ. ತನ್ನ ಇನ್ಸ್ಟಾಗ್ರಾಂ ಖಾತೆಯಲ್ಲಿ ಫೋಟೋ ಶೇರ್ ಮಾಡಿ, ರಿಯೋ ಹೇಳಿದ್ದ ಮಾತುಗಳನ್ನು ಬರೆದುಕೊಂಡಿದ್ದಾಳೆ.
Comments are closed.