ಅಂತರಾಷ್ಟ್ರೀಯ

ಅಮೆರಿಕದಲ್ಲಿ ಲಕ್ಷ ಉದ್ಯೋಗ ಸೃಷ್ಟಿಸಿದ ಭಾರತೀಯ ಕಂಪೆನಿಗಳು

Pinterest LinkedIn Tumblr


ವಾಷಿಂಗ್ಟನ್: ಅಮೆರಿಕದಲ್ಲಿನ ಭಾರತೀಯ ಕಂಪೆನಿಗಳು ಭಾರಿ ಪ್ರಮಾಣದಲ್ಲಿ ಉದ್ಯೋಗ ಸೃಷ್ಟಿಸಿವೆ ಎಂದು ಇತ್ತೀಚೆಗೆ ಬಿಡುಗಡೆಯಾಗಿರುವ ಸಿಐಐ ವರದಿ ಸ್ಪಷ್ಟಪಡಿಸಿದೆ. ಭಾರತ ಮೂಲದ ಸುಮಾರು 100 ಕಂಪೆನಿಗಳು ಅಮೆರಿಕಾದಲ್ಲಿ ವರ್ಷಕ್ಕೆ 18 ಶತಕೋಟಿ ಡಾಲರ್ ಬಂಡವಾಳ ಹೂಡುತ್ತಿದ್ದು, 1,13,000 ಉದ್ಯೋಗಗಳನ್ನು ಕಲ್ಪಿಸಿವೆ ಎಂದು ಭಾರತೀಯ ಕೈಗಾರಿಕೆಗಳ ಒಕ್ಕೂಟ (ಸಿಐಐ) ಬಿಡುಗಡೆ ಮಾಡಿರುವ ವರದಿ ಬಹಿರಂಗಪಡಿಸಿದೆ.

‘ಇಂಡಿಯನ್ ರೂಟ್ಸ್, ಅಮೆರಿಕನ್ ಸಾಯಿಲ್’ ಹೆಸರಿನ ವರದಿ ಬಿಡುಗಡೆ ಮಾಡಲಾಗಿದೆ. ಯುಎಸ್‌ನಲ್ಲಿ ಭಾರತ ಕಾರ್ಪೊರೇಟ್ ಸಾಮಾಜಿಕ ಜವಾಬ್ದಾರಿಯಡಿ 147 ದಶಲಕ್ಷ ಡಾಲರ್‌ಗಳು, ಸಂಶೋಧನೆ ಅಭಿವೃದ್ದಿಯಡಿ 588 ದಶಲಕ್ಷ ಡಾಲರ್‌ ಖರ್ಚು ಮಾಡುತ್ತಿವೆ ಎಂದು ತಿಳಿಸಿದೆ.

ಭಾರತ ಮೂಲದ ಸುಮಾರು 100 ಕಂಪೆನಿಗಳು 50 ರಾಜ್ಯಗಳಲ್ಲಿ 1,13,423 ಮಂದಿಗೆ ಉದ್ಯೋಗ ನೀಡಿವೆ. ನ್ಯೂಜರ್ಸಿ (8,572), ಟೆಕ್ಸಾಸ್ (7,271), ಕ್ಯಾಲಿಫೋರ್ನಿಯಾ (6,749), ನ್ಯೂಯಾರ್ಕ್ (5,135), ಜಾರ್ಜಿಯಾ (4,554) ಪ್ರದೇಶಗಳಲ್ಲಿ ಅತ್ಯಧಿಕ ಉದ್ಯೋಗಿಗಳಿದ್ದಾರೆ. ಈ ಐದು ರಾಜ್ಯಗಳಲ್ಲಿ ಭಾರತ ಭಾರಿ ಪ್ರಮಾಣದಲ್ಲಿ ವಿದೇಶಿ ಬಂಡವಾಳ ಹೂಡಿಕೆ ಮಾಡಿದೆ ಎಂದು ಸಿಐಐ ವರದಿಯಲ್ಲಿ ಹೇಳಿದೆ.

ನ್ಯೂಯಾರ್ಕ್ (1.57 ಶತಕೋಟಿ ಡಾಲರ್), ನ್ಯೂಜೆರ್ಸಿ (1.56 ಶತಕೋಟಿ ಡಾಲರ್), ಮೆಸಾಚುಸೆಟ್ಸ್ (931 ದಶಲಕ್ಷ ಡಾಲರ್), ಕ್ಯಾಲಿಫೋರ್ನಿಯಾ (542 ದಶಲಕ್ಷ ಡಾಲರ್), ಓಮಿಂಗ್ (435 ದಶಲಕ್ಷ ಡಾಲರ್)ನಲ್ಲಿ ಭಾರತದ ಕಂಪೆನಿಗಳು ಬಂಡವಾಳ ಹೂಡಿಕೆ ಮಾಡಿವೆ. ಅಮೆರಿಕದಲ್ಲಿನ ರಾಜ್ಯಗಳಲ್ಲಿ ಭಾರತ ಕಂಪೆನಿಗಳು ಹೂಡಿರುವ ಬಂಡವಾಳ ಒಟ್ಟು ಮೌಲ್ಯ 187 ದಶಲಕ್ಷ ಡಾಲರ್‌ಗಳಷ್ಟಿರುತ್ತದೆ.

ಮುಂಬರುವ ಐದು ವರ್ಷಗಳಲ್ಲಿ ಶೇ.87ರಷ್ಟು ಕಂಪೆನಿಗಳು ತಮ್ಮ ಉದ್ಯೋಗಿಗಳನ್ನು ಇನ್ನಷ್ಟು ಹೆಚ್ಚಿಸಿಕೊಳ್ಳಬೇಕೆಂದು ಯೋಚಿಸುತ್ತಿವೆ. ಈ ಬಗ್ಗೆ ಅಮೆರಿಕದಲ್ಲಿನ ಭಾರತ ರಾಯಭಾರಿ ನವತೇಜ್ ಸರ್ನಾ ಮಾತನಾಡುತ್ತಾ, ‘ಭಾರತದ ತಜ್ಞರು, ಉದ್ಯಮಗಳು ಅಮೆರಿಕ ಆರ್ಥಿಕ ವ್ಯವಸ್ಥೆಗೆ ಸಾಕಷ್ಟು ಸಹಾಯ ಮಾಡುತ್ತಿದ್ದಾರೆ. ಎರಡೂ ದೇಶಗಳ ಅಭಿವೃದ್ಧಿಗೆ ಇದು ಸಾಕಷ್ಟು ಸಹಕಾರಿಯಾಗಲಿದೆ’ ಎಂದಿದ್ದಾರೆ.

ಅಮೆರಿಕದಲ್ಲಿನ ಭಾರತದ ಕಂಪೆನಿಗಳು ವೇಗವಾಗಿ ಅಭಿವೃದ್ಧಿ ಹೊಂದುತ್ತಿವೆ ಎಂದು, ಅದೇ ರೀತಿ ಯುಎಸ್ ಆರ್ಥಿಕ ವ್ಯವಸ್ಥೆಗೂ ಸಹಕಾರಿಯಾಗಿವೆ ಎಂದು ಸೆನೇಟರ್ ಕ್ರಿಸ್ ವಾನ್ ಹೊಲೆನ್ ಅಭಿಪ್ರಾಯಪಟ್ಟಿದ್ದಾರೆ. ಎರಡೂ ದೇಶಗಳ ನಡುವೆ ವಾಣಿಜ್ಯ, ವ್ಯೂಹಾತ್ಮಕ ಸಂಬಂಧಗಳು ಇನ್ನಷ್ಟು ಗಟ್ಟಿಗೊಳ್ಳುತ್ತಿವೆ ಎಂಬುದಕ್ಕೆ ಇದೀಗ ಬಿಡುಗಡೆಯಾಗಿರುವ ಸಿಐಐ ವರದಿಯೇ ಇದಕ್ಕೆ ನಿದರ್ಶನ ಎಂದಿದ್ದಾರೆ ಸೆನೇಟರ್.

Comments are closed.