ಲಂಡನ್: ಮನುಷ್ಯರಿಗಾಗಿ ‘ನಿಮ್ಮ ಪ್ರೀತಿ ಹುಡುಕಿಕೊಳ್ಳಿ’ ಎನ್ನುವ ನೂರಾರು ಡೇಟಿಂಗ್ ಆ್ಯಪ್‌ಗಳಿವೆ. ಆದರೀಗ ನಾಯಿಗಳೂ ಲವ್ವರ್ ಕಂಡುಕೊಳ್ಳಲು ಆ್ಯಪ್ ಬಂದಿದೆ. ಇದೊಂಥರ ಟು- ಇನ್-ಒನ್ ಆ್ಯಪ್. ಯಾಕೆಂದರೆ, ಇದು ನಾಯಿಗಳಿಗೆ ಮಾತ್ರವಲ್ಲದೆ ಅದರ ಮಾಲೀಕರಿಗೂ ಸಂಗಾತಿ ಹುಡುಕಿಕೊಡುತ್ತದೆ.
ಟಿನ್‌ಡಾಗ್ ಹೆಸರಿನ ಈ ಸೋಷಿಯಲ್ ಆ್ಯಪ್, ಶ್ವಾನಪ್ರೇಮಿಗಳು ಪರಸ್ಪರ ಸಂಪರ್ಕಿಸಲು, ತಮಗೆ ಮತ್ತು ತಮ್ಮ ನಾಯಿಗೆ ಸಂಗಾತಿ ಹುಡುಕೊಳ್ಳಲೆಂದೇ ರೂಪುಗೊಂಡಿದೆ. ಸಾಕುಪ್ರಾಣಿಗಳ ಸೇವೆಯಲ್ಲಿ ನಿರತವಾಗಿರುವ ಹೋಲಿಡಾಗ್ ಎಂಬ ಸಂಸ್ಥೆ ಈ ಆ್ಯಪ್ ಅಭಿವೃದ್ಧಿಪಡಿಸಿದೆ.
ಟಿನ್‌ಡಾಗ್ ಕೆಲಸ ಹೇಗೆ?: ಡಾಗ್ ಓನರ್‌ಗಳು ತಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಈ ಆ್ಯಪ್ ಇನ್‌ಸ್ಟಾಲ್ ಮಾಡಿಕೊಂಡು ತಮಗೆ ಸಮೀಪವಿರುವ ಇತರ ಶ್ವಾನಪ್ರೇಮಿಗಳನ್ನು ಹಚ್ಚಬಹುದು. ಜಿಪಿಎಸ್ ಆಧಾರದ ಮೇಲೆ ಪರಸ್ಪರ ಹತ್ತಿರ ಇರುವ ನಾಯಿಗಳ ಮೇಲೆ ಪ್ರೀತಿಯುಳ್ಳ ಜನರನ್ನು ಈ ಆ್ಯಪ್ ಹುಡುಕುತ್ತದೆ. ಇದರೊಂದಿಗೆ ನಾಯಿ ಮಾಲೀಕರಿಗೆ ವಾಕ್ ಮಾಡಲು ಜತೆಗಾರರು ಸಿಕ್ಕರೆ ಅವರ ನಾಯಿಗೂ ಒಂದು ಸಂಗಾತಿ ಸಿಕ್ಕಂತಾಗುತ್ತದೆ. ಹೀಗೆ ಡಾಗ್‌ಡೇಟ್ ಶುರುವಾಗುತ್ತದೆ.
