ನ್ಯೂಯಾರ್ಕ್: ನಿಮ್ಮ ಸಹೋದ್ಯೋಗಿ ವರ್ತನೆ ಬಗ್ಗೆ ಅಸಮಾಧಾನ ಇದೆಯೇ, ಕೆಂಡದಷ್ಟು ಸಿಟ್ಟಿದೆಯೇ? ನಿಮ್ಮ ಟೀಮ್ ಲೀಡರ್ ಕಿರಿಕ್ ಮಾಡುತ್ತಿದ್ದಾರೆಯೇ? ಕಚೇರಿಯಲ್ಲಿ ನಿಮ್ಮ ಪಕ್ಕದಲ್ಲೇ ಇರುವ ವ್ಯಕ್ತಿಯನ್ನು ಬಾಯಿತುಂಬ ಬೈದು ಬಿಡಬೇಕು ಅನ್ನಿಸುತ್ತಿದೆಯೇ? ತಾಳಿಕೊಂಡ ಕೋಪವನ್ನು ಕಾರಿಕೊಳ್ಳಬೇಕು ಅನಿಸುತ್ತಿದೆಯೇ? -ಚಿಂತೆಯಿಲ್ಲ.. ನಿಮಗಾಗಿಯೇ ಬಂದಿದೆ ‘ಮೆಮೊ’ ಎನ್ನುವ ಹೊಸ ಮೊಬೈಲ್ ಆ್ಯಪ್.
ಈ ಹೊಸ ಅಪ್ಲಿಕೇಷನ್‌ನಿಂದ ನೀವು ನಿಮ್ಮ ಭಾವನೆಗಳನ್ನು ಹೊರಚೆಲ್ಲಿ ಹಗುರಾಗಬಹುದು. ನಿಮ್ಮ ಸಿಟ್ಟನ್ನು ಕಾರಿಕೊಂಡು, ಸಹೋದ್ಯೋಗಿಗಳಿಗೆ ಇರುಸುಮುರುಸು ತರಬಹುದು.
ವಿಶ್‌ಪರ್, ಸೀಕ್ರೇಟ್, ಫೇಸ್‌ಬುಕ್ ರೂಮ್ಸ್‌ನಂಥ ಆ್ಯಪ್‌ಗಳು ಈಗಾಗಲೇ ಇದ್ದು, ವ್ಯಕ್ತಿಯ ಅಸಹನೆ, ಅಸಮಾಧಾನ ಹೊರಹಾಕಲು ನೆರವಾಗುತ್ತಿವೆ. ಈ ಮಧ್ಯೆ, ಕಚೇರಿಯೊಳಗಿನ ಉದ್ಯೋಗಿಯ ಮನಸ್ಥಿತಿಗೆ ಅನುಗುಣವಾಗಿ ನೂತನ ‘ಮೆಮೊ’ ಆ್ಯಪ್ ರೂಪುಗೊಂಡಿದೆ.
‘ಮೆಮೊ’ ಎನ್ನುವ ಈ ಮೆಸೇಜಿಂಗ್ ಆ್ಯಪ್ ಅನ್ನು ಕಚೇರಿಯಲ್ಲಿ ಉದ್ಯೋಗಿಗಳಿಗಾಗಿ ಕಲೆಕ್ಟೀವ್‌ಲಿ ಕಂಪನಿಯ ರ‌್ಯಾನ್ ಜಾನ್ಸನ್ ಅಭಿವೃದ್ಧಿಪಡಿಸಿದ್ದಾರೆ ಎಂದು ‘ಕ್ವಾಟ್ಜ್’ ವರದಿ ಮಾಡಿದೆ.
ಎದ್ದಿದೆ ಪರ-ವಿರೋಧದ ಅಲೆ:
ಆ್ಯಪಲ್ ಆ್ಯಪ್ ಸ್ಟೋರ್‌ನಲ್ಲಿ ಕಳೆದ ತಿಂಗಳಿಂದ ಲಭ್ಯವಿರುವ ಈ ಹೊಸ ಆ್ಯಪ್‌ಗೆ ಕಂಪನಿ/ಕಚೇರಿಗಳಲ್ಲಿ ಮಿಶ್ರ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ”ಉದ್ಯೋಗಿಗಳ ಕೋಪ ತಣಿಸಲು ಇದೊಂದು ಉತ್ತಮ ಮಾರ್ಗ ಅಥವಾ ಸಾಧನ. ತೀವ್ರ ಒತ್ತಡ, ಅಸಹನೆಯಿಂದ ಬಳಲುವ ಉದ್ಯೋಗಿಗಳಿಗೆ ಈ ಆ್ಯಪ್ ವರದಾನ,” ಎಂದು ಕೆಲವರು ಹೇಳುತ್ತಾರೆ. ಇದನ್ನು ವಿರೋಧಿಸುವ ಮತ್ತೊಂದು ಬಣ,”ಈ ಆ್ಯಪ್‌ನಿಂದ ಕಚೇರಿಯಲ್ಲಿ ಸಂಘರ್ಷಗಳಾಗುತ್ತವೆ. ಅನಗತ್ಯ ಗಾಳಿಸುದ್ದಿಗಳನ್ನು ಹಬ್ಬಿಸಲು ಆ್ಯಪ್ ಬಳಕೆಯಾಗುತ್ತಿದೆ. ಕೆಲಸದ ಸ್ಥಳದಲ್ಲಿ ವಾತಾವರಣ ಹದಗೆಡುತ್ತಿದೆ,” ಎಂದಿದೆ.
ಈ ಬಗ್ಗೆ ಪ್ರತಿಕ್ರಿಯಿಸಿರುವ ರ‌್ಯಾನ್ ಜಾನ್ಸನ್, ”ಕೆಲವು ಕಂಪನಿಗಳು ನಮ್ಮ ಆ್ಯಪ್ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿವೆ. ಆದರೆ ಒಟ್ಟಾರೆ ಪ್ರತಿಕ್ರಿಯೆಯು ಉತ್ತಮವಾಗಿದೆ. ಆ್ಯಪ್‌ಗೆ ಬೇಡಿಕೆ ದಿನೇದಿನೆ ಹೆಚ್ಚುತ್ತಿದೆ,” ಎಂದಿದ್ದಾರೆ.
ಆ್ಯಪ್‌ಗೆ ನಿರ್ಬಂಧ:
ಕಚೇರಿಯ ಗಾಳಿಸುದ್ದಿ ಪ್ರಕ್ರಿಯೆಗೆ ಆಧುನಿಕ ರೂಪ ನೀಡಿರುವ ಮೆಮೊ ಆ್ಯಪ್ ಅನ್ನು ಉದ್ಯೋಗಿಗಳು ಬಳಸದಂತೆ ಅಮೆರಿಕದ ಕೆಲವು ಕಂಪನಿಗಳು ಈಗಾಗಲೇ ಕಡಿವಾಣ ಹಾಕಿವೆ.
ಇದು ಹೇಗೆ ಕೆಲಸ ಮಾಡುತ್ತದೆ?
* ಮೊದಲಿಗೆ ಕಂಪನಿಯ ಇಮೇಲ್ ಅಥವಾ ಲಿಂಕ್ಡ್‌ಇನ್ ಮೂಲಕ ಬಳಕೆದಾರರು(ಉದ್ಯೋಗಿ) ಆ್ಯಪ್ ಪ್ರವೇಶಿಸಬೇಕಾಗುತ್ತದೆ. ಆ್ಯಪ್ ಮೂಲಕ ಕಂಪನಿ ಗ್ರೂಪ್‌ನ ಮೆಮೊ ಬೋರ್ಡ್‌ಗಳಲ್ಲಿ(ಸಂದೇಶ ಸ್ಥಳಗಳು) ಉದ್ಯೋಗಿಯು ತನ್ನ ಭಾವನೆಗಳನ್ನು ಬರೆಯಬಹುದು.
* ಸಹೋದ್ಯೋಗಿಯನ್ನು ಟೀಕಿಸಿ ಸಂದೇಶ ಬರೆದ ಉದ್ಯೋಗಿಯ ಗುರುತನ್ನು ಪ್ರಕಟಿಸುವ ಅಗತ್ಯವಿಲ್ಲ. ಅನಾಮಿಕ ಸಂದೇಶಗಳು ತಲುಪಬೇಕಾದವರನ್ನು ತಲುಪುತ್ತವೆ. ಆದರೆ, ಸಂದೇಶ ಬರೆದ ಉದ್ಯೋಗಿಯ ಗುರುತು ಕಂಪನಿಗಳಿಗಷ್ಟೇ ತಿಳಿಯಲು ಅವಕಾಶವಿದೆ.
* ಆಪ್‌ನಲ್ಲಿ ಉದ್ಯೋಗಿಯು ಬರೆದ ಸಂದೇಶವು ಕಂಪನಿ ಗ್ರೂಪ್‌ನಲ್ಲಿ ಪ್ರಕಟವಾಗುತ್ತದೆ. ಬೇಕು ಅನ್ನಿಸಿದರೆ ಇದನ್ನು ಸಾರ್ವಜನಿಕವಾಗಿಯೂ ಪ್ರಕಟಿಸುವ ಆಯ್ಕೆ ಆ್ಯಪ್‌ನಲ್ಲಿದೆ. ಆದರೆ ಇಲ್ಲಿ ವ್ಯಕ್ತಿ ಮತ್ತು ಕಂಪನಿಯ ಗುರುತನ್ನು ಮರೆ ಮಾಡಲಾಗುತ್ತದೆ.
