ಹೊಸದಿಲ್ಲಿ: ಮುಂಬರುವ ಗಣರಾಜ್ಯೋತ್ಸವದ ಅತಿಥಿಯಾಗಿ ಆಗಮಿಸುವ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮಾ ಅವರಿಗೆ ಎಂದೂ ಕಂಡು ಕೇಳರಿಯದ ಅಭೂತಪೂರ್ವ ಭದ್ರತಾ ವ್ಯವಸ್ಥೆಯನ್ನು ಕೇಂದ್ರ ಸರಕಾರ ಕಲ್ಪಿಸುತ್ತಿದೆ.
ಉಗ್ರರ ಬೆದರಿಕೆ ಹಿನ್ನೆಲೆಯಲ್ಲಿ ಒಬಾಮಾರ ಜತೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಗಣರಾಜ್ಯೋತ್ಸವಕ್ಕೆ ಭದ್ರತೆ ನೀಡಲಾಗುತ್ತಿದೆ. ಒಬಾಮಾ ಅವರಿಗಂತೂ ಏಳು ಸ್ತರದ ಭದ್ರತಾ ವ್ಯವಸ್ಥೆ ರೂಪಿಸಲು ನಿರ್ಧರಿಸಲಾಗಿದೆ.
ಅಮೆರಿಕ ಅಧ್ಯಕ್ಷರೊಬ್ಬರು ಗಣರಾಜ್ಯೋತ್ಸವ ಸಮಾರಂಭದಲ್ಲಿ ಪಾಲ್ಗೊಳ್ಳುತ್ತಿರುವುದು ಇದೇ ಮೊದಲಾಗಿರುವ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸರಕಾರ ಅದನ್ನೊಂದು ಪ್ರತಿಷ್ಠೆಯಾಗಿ ತೆಗೆದುಕೊಂಡಿದೆ. ಜ.25ರಿಂದ 27ರವರೆಗೆ ಭಾರತದಲ್ಲಿರುವ ಒಬಾಮಾ ಅವರ ಭದ್ರತೆಯ ಹೊಣೆಯನ್ನು ಉಭಯ ದೇಶಗಳ ಭದ್ರತಾ ಪಡೆಗಳು ಹಾಗೂ ಗುಪ್ತಚರ ಸಂಸ್ಥೆಗಳು ಜಂಟಿಯಾಗಿ ವಹಿಸಿಕೊಂಡಿದ್ದು, ದಿಲ್ಲಿಯ ಮೇಲೆ ಹದ್ದಿನ ಕಣ್ಣಿಡಲಿವೆ. ಭೂ ಮಾರ್ಗ, ಸಮುದ್ರ ಮಾರ್ಗ ಹಾಗೂ ವಾಯುಮಾರ್ಗದ ಮೂಲಕ ಉಗ್ರರು ದಿಲ್ಲಿಯ ಮೇಲೆ ನಡೆಸಬಹುದಾದ ಸಂಭಾವ್ಯ ದಾಳಿ ತಡೆಗಟ್ಟಲು ಭದ್ರತಾ ಪಡೆಗಳು ಬ್ರಹ್ಮಾಸ್ತ್ರಗಳನ್ನು ಸಿದ್ಧತೆ ಮಾಡಿಟ್ಟುಕೊಂಡಿದೆ.
ಹೇಗಿದೆ ಭದ್ರತೆ?:ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರೊಟ್ಟಿಗೆ ರಾಜಪಥದಲ್ಲಿನ ಬಹಿರಂಗ ವೇದಿಕೆಯಲ್ಲಿ ಸುಮಾರು ಎರಡು ಗಂಟೆ ಕಾಲ ಕೂರುವ ಒಬಾಮಾ ಅವರ ರಕ್ಷಣೆಗೆ ನಿರ್ಮಾಣವಾಗಲಿರುವ ಏಳು ಸುತ್ತಿನ ಭದ್ರತಾ ಕೋಟೆಯ ಉಸ್ತುವಾರಿ ಹೊರಲು ದಿಲ್ಲಿಯಲ್ಲಿ ಈಗಾಗಲೇ ಒಂದು ಪ್ರತ್ಯೇಕ ಪೊಲೀಸ್ ನಿಯಂತ್ರಣ ಕೊಠಡಿ ಸ್ಥಾಪಿಸಲಾಗಿದೆ. ಸಮಾರಂಭ ನಡೆಯುವ ದಿಲ್ಲಿಯ ರಾಜಪಥ್ ಪ್ರದೇಶದ ಕಣ್ಗಾವಲಿಗೆ ವಿಶೇಷ ರಕ್ಷಣಾ ಪಡೆ (ಎಸ್‌ಪಿಜಿ) ಹಾಗೂ ‘ಅಮೆರಿಕನ್ ಸಿಕ್ರೆಟ್ ಸರ್ವಿಸ್’ (ಎಎಸ್‌ಎಸ್) ಏಜೆನ್ಸಿಯ ಸಿಬ್ಬಂದಿ ನೇತೃತ್ವದಲ್ಲಿ ಏಳು ಹಂತದ ತಪಾಸಣೆ ನಡೆಯಲಿದೆ. ಇದರ ಜತೆಗೆ 80 ಸಾವಿರ ಪೊಲೀಸ್ ಸಿಬ್ಬಂದಿ, 20 ಸಾವಿರ ಅರೆಸೇನಾಪಡೆ ಸಿಬ್ಬಂದಿ ಹಾಗೂ ‘ಕಾನ್ಸೀಲ್ಡ್ ಆ್ಯಂಟಿ ಟೆರರಿಸ್ಟ್ ಸ್ಕ್ಯಾಡ್’ನ (ಸಿಎಟಿ) ಯೋಧರು ಅಂದು ದಿಲ್ಲಿಯನ್ನು ಕಾಯಲಿದ್ದಾರೆ. ಇನ್ನು ವಿವಿಐಪಿಗಳು ಕೂರುವ ಸ್ಥಳದ ಸುತ್ತ ಗುಂಡು ನಿರೋಧಕ ಗಾಜಿನ ಕವಚ ನಿರ್ಮಿಸುವ ಸಾಧ್ಯತೆಯೂ ಇದೆ. ಇದರ ಜತೆಗೆ ದಿಲ್ಲಿಯಾದ್ಯಂತ 15 ಸಾವಿರ ಸಿಸಿಟಿವಿ ಕ್ಯಾಮೆರಾಗಳನ್ನು ಅಳವಡಿಸಲಾಗಿದ್ದು, ಇಲ್ಲಿ ದಾಖಲಾಗುವ ದೃಶ್ಯಾವಳಿಗಳ ಮೇಲೆ ಉಭಯ ದೇಶಗಳ ಭದ್ರತಾ ಪಡೆಗಳು ಕಣ್ಣಿಡಲಿವೆ ಎಂದು ಮೂಲಗಳು ಹೇಳಿವೆ.
ನೋ ಫ್ಲೈ ಜೋನ್: ಸಮಾರಂಭ ನಡೆಯುವ ರಾಜಪಥ್ ಪ್ರದೇಶದ ಆಕಾಶದಲ್ಲಿ ‘ನೋ ಫ್ಲೈ ವಲಯ’ ಎಂದು ಗುರುತಿಸಲಾಗಿದ್ದು, ಒಂದೊಮ್ಮೆ ಯಾವುದಾದರೂ ಅನುಮಾನಾಸ್ಪದ ವಿಮಾನಗಳು ಹಾರಾಡಿದರೆ ಅವನ್ನು ಹೊಡೆದುರುಳಿಸಲು ‘ಆ್ಯಂಟಿ ಏರ್‌ಕ್ರಾಫ್ಟ್ ಗನ್’ಗಳನ್ನು ಸಜ್ಜು ಮಾಡಿ ಇಟ್ಟುಕೊಳ್ಳಲಾಗಿದೆ. ಇದರ ಮೇಲ್ವಿಚಾರಣೆಗೆ ಪ್ರತ್ಯೇಕ ರಾಡಾರ್ ವ್ಯವಸ್ಥೆಯನ್ನೂ ರೂಪಿಸಲಾಗಿದೆ. ಇವೆಲ್ಲದರ ನಿರ್ವಹಣೆಗೆ ಭಾರತೀಯ ವಾಯುಪಡೆ ಭಾರಿ ಮಹತ್ವ ನೀಡಿದೆ. ಇನ್ನು ರಾಜಪಥ ಮಾರ್ಗಕ್ಕೆ ಸಂಪರ್ಕ ಬೆಸೆಯು ರಫಿ ಮಾರ್ಗ್, ಜನಪಥ್ ಹಾಗೂ ಮಾನ್ ಸಿಂಗ್ ರಸ್ತೆಯನ್ನು ಎರಡು ದಿನ ಮುಂಚೆಯೇ ಬಂದ್ ಆಗಲಿದೆ. ಹಾಗೆಯೇ ರಾಜಪಥ ಮಾರ್ಗದ ಸುತ್ತಮುತ್ತ ಮೆಟ್ರೊ ರೈಲು ಸಂಚಾರ 72 ಗಂಟೆಗಳ ಮುಂಚೆಯೇ ಸ್ತಬ್ಧಗೊಳ್ಳಲಿದೆ.
ಹೋಟೆಲ್‌ನಲ್ಲಿ ಭದ್ರತಾ ಸಿಬ್ಬಂದಿ ಠಿಕಾಣಿ: ಈಗಾಗಲೇ ದಿಲ್ಲಿ ಹಾಗೂ ಉತ್ತರ ಪ್ರದೇಶದ ಆಗ್ರಾದಲ್ಲಿ ಬೀಡುಬಿಟ್ಟಿರುವ ‘ಅಮೆರಿಕನ್ ಸಿಕ್ರೆಟ್ ಸರ್ವಿಸ್’ ಏಜೆನ್ಸಿಯ ಸಿಬ್ಬಂದಿ ಒಬಾಮಾ ಅವರು ಕೂರುವ, ತಂಗುವ ಸ್ಥಳ ಹಾಗೂ ಓಡಾಡುವ ದಾರಿಗಳನ್ನೆಲ್ಲ ಪರಿಶೀಲನೆ ನಡೆಸಿದ್ದಾರೆ. ಒಬಾಮಾ ಅವರು ‘ಐಟಿಸಿ ಮಯೂರ’ ಹೋಟೆಲ್‌ನಲ್ಲಿ ಉಳಿದುಕೊಳ್ಳಲಿದ್ದು, ಈ ಹೋಟೆಲ್‌ನಲ್ಲಿ ಬರೀ ಹಲವು ಸುತ್ತಿನ ಭದ್ರತಾ ಸಿಬ್ಬಂದಿ ಮಾತ್ರ ಠಿಕಾಣಿ ಹೂಡಲಿದ್ದಾರೆ.
—
ಶಿಷ್ಟಾಚಾರಕ್ಕೆ ಭಂಗ ಸಾಧ್ಯತೆ
ಸಾಮಾನ್ಯವಾಗಿ ಗಣರಾಜ್ಯೋತ್ಸವದಲ್ಲಿ ಪಾಲ್ಗೊಳ್ಳುವ ಮುಖ್ಯ ಅತಿಥಿಯನ್ನು ರಾಷ್ಟ್ರಪತಿ ಭವನದಿಂದ ರಾಷ್ಟ್ರಪತಿಗಳು ತಮ್ಮ ಗುಂಡು ನಿರೋಧಕ ಕಾರಿನಲ್ಲಿಯೇ ರಾಜಪಥ್ ಮಾರ್ಗದ ವೇದಿಕೆಗೆ ಕರೆತರುವುದು ಶಿಷ್ಟಾಚಾರ. ಆದರೆ ಈ ಬಾರಿ ಒಬಾಮಾ ಅವರು ಭದ್ರತೆಯ ನೆಪದಲ್ಲಿ ಈ ಶಿಷ್ಟಾಚಾರ ಪಾಲಿಸುವ ಸಾಧ್ಯತೆಗಳು ವಿರಳ ಎಂದು ಮೂಲಗಳು ಹೇಳಿವೆ. ಅಮೆರಿಕ ಅಧ್ಯಕ್ಷರು ಭಾರಿ ಭದ್ರತೆಯುಳ್ಳ ತಮ್ಮ ಅಧಿಕೃತ ‘ಬೀಸ್ಟ್’ ಕಾರಿನಲ್ಲಿಯೇ ಕಾರ್ಯಕ್ರಮಕ್ಕೆ ಆಗಮಿಸುವ ನಿರೀಕ್ಷೆ ಇದೆ. ಒಂದೊಮ್ಮೆ ಅವರು ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ ಅವರ ಕಾರಿನಲ್ಲಿಯೇ ಆಗಮಿಸಿದರೆ ಅದೊಂದು ದಾಖಲೆಯಾಗಲಿದೆ. ಏಕೆಂದರೆ ಅಮೆರಿಕ ಅಧ್ಯಕ್ಷರಾದವರು ಇದುವರೆಗೂ ತಮ್ಮ ಅಧಿಕೃತ ಕಾರನ್ನು ಬಿಟ್ಟು ಬೇರೆ ಕಾರನ್ನು ಏರಿಲ್ಲ.
