ಬೀಜಿಂಗ್: ಹುಲಿಗಳನ್ನು ಕೊಂದು ತಿಂದ ಆರೋಪದಲ್ಲಿ ಚೀನಾದ ಉದ್ಯಮಿಯೊಬ್ಬನಿಗೆ 13 ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ.
ಚೀನಾದ ಶ್ರೀಮಂತ ರಿಯಲ್ ಎಸ್ಟೇಟ್ ಉದ್ಯಮಿ ಕ್ಸು ಎಂಬಾತ ಗುವಾಂಗ್ಕ್ಸಿಯ ರಾಜಧಾನಿ ನಾನ್ನಿಂಗ್ ಪಟ್ಟಣದಲ್ಲಿರುವ ತನ್ನ ಹೋಟೆಲ್ನಲ್ಲಿ ಹುಲಿಮಾಂಸದ ಅಡುಗೆ ಮಾಡಿಸಿ 14 ಮಂದಿ ಸ್ನೇಹಿತರ ಜತೆಗೆ ಅದನ್ನು ಭಕ್ಷಿಸಿದ್ದ ಎಂದು ಕಿಂಝೌ ಸಿಟಿ ಇಂಟರ್ಮೀಡಿಯೇಟ್ ಪೀಪಲ್ಸ್ ಕೋರ್ಟ್ ಹೇಳಿದೆ.
ಗುವಾಂಗ್ಡಾಂಗ್ ಪ್ರಾಂತ್ಯದ ಲೀಝೌನಲ್ಲಿರುವ ಲಾಂಗ್ಮೆನ್ ಟೌನ್ಶಿಪ್ನಲ್ಲಿ ಆರೋಪಿ ಕ್ಸು, 2013ರ ಮಾರ್ಚ್ 13ರಂದು ವಿದ್ಯುತ್ ಶಾಕ್ ನೀಡಿ ಹುಲಿಯೊಂದನ್ನು ಕೊಂದಿದ್ದ. ಬಳಿಕ ಅದರ ಮಾಂಸವನ್ನು ಬೇಯಿಸಿ ತಿಂದಿದ್ದ. ನಂತರ 2013ರ ಏಪ್ರಿಲ್ 21ರಂದು ಹಾಗೂ ಮೇ 20ರಂದು ಇದೇ ರೀತಿ ಮತ್ತೆರಡು ಹುಲಿಗಳನ್ನು ಕೊಂದು ಬೇಯಿಸಿ ತಿಂದಿದ್ದ. ಹುಲಿಯ ರಕ್ತ, ಮೂಳೆಗಳು ಮತ್ತು ಆಂತರಿಕ ಅಂಗಾಂಗಳು ಸ್ಥಳದಲ್ಲಿ ಪತ್ತೆಯಾಗಿದ್ದವು ಎಂದು ಸರಕಾರಿ ಸುದ್ದಿಸಂಸ್ಥೆ ಕ್ಷಿನುವಾ ಹೇಳಿದೆ.
ಪ್ರತಿಯೊಂದು ಹುಲಿಗೂ 4,40,000 ಯುವಾನ್ (70,950 ಅಮೆರಿಕನ್ ಡಾಲರ್) ಹಣ ನೀಡಿ ಖರೀದಿಸಿದ್ದಾಗಿ ವಿಚಾರಣೆ ವೇಳೆ ಈತ ಬಾಯಿಬಿಟ್ಟಿದ್ದಾನೆ. ಹುಲಿಗಳನ್ನು ಎಲ್ಲಿಂದ ತರಲಾಗಿದೆ ಎಂಬ ಮಾಹಿತಿ ದೊರೆತಿಲ್ಲವಾದರೂ ಕಳ್ಳಸಾಗಣೆ ಮಾಡಿ ತರಿಸಿರಬೇಕು ಎನ್ನಲಾಗಿದೆ.
ಮೊದಲ ಹುಲಿಯ ಸಾವಿನ ಕುರಿತ ವೀಡಿಯೋ ರೆಕಾರ್ಡಿಂಗ್ನಲ್ಲಿ ಕ್ಸು ಕಾಣಿಸಿಕೊಂಡಿದ್ದ. ಇದನ್ನು ಆಧರಿಸಿ ಪೊಲೀಸರು ಆತನನ್ನು ಬಂಧಿಸಿದ್ದರು.
ಈತನ ಬಂಗಲೆಯಲ್ಲೂ ಕೆಲವು ಮೂಳೆಗಳು, ಮಾಂಸ ಪತ್ತೆಯಾಗಿದ್ದವು. ಇವುಗಳು ಅಳಿವಿನಂಚಿಲ್ಲಿರುವ ಜೆಕೋ ಮತ್ತು ಹೆಬ್ಬಾವಿನ ಅವಶೇಷಗಳೆಂಬುದು ನಂತರವಷ್ಟೇ ಗೊತ್ತಾಗಿತ್ತು.
ಹುಲಿಯ ಮೂಳೆಗಳನ್ನು ಚೀನಾದಲ್ಲಿ ಔಷಧ ತಯಾರಿಕೆಗೂ ಬಳಸುತ್ತಾರೆ.
ಹುಲಿಯ ಸಾಗಣೆ ಮತ್ತು ಭಕ್ಷಣೆಯಲ್ಲಿ ಸಹಕರಿಸಿದ ಇತರ 14 ಮಂದಿಗೆ ಆರು ವರ್ಷಗಳ ಜೈಲು ಶಿಕ್ಷೆ ವಿಧಿಸಲಾಗಿದೆ.