ಸಾಮಾಜಿಕ ಜಾಲತಾಣಗಳನ್ನು ಬಳಸಲ್ಲ ಎಂಬ ಪ್ರಧಾನಿ ಮೋದಿ ಟ್ವೀಟ್​ನ ರಹಸ್ಯ ಬಯಲು !

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಯವರು ಮುಂದಿನ ಭಾನುವಾರ (ಮಾರ್ಚ್​ 8)ರಂದು ತಮ್ಮ ಸಾಮಾಜಿಕ ಜಾಲತಾಣಗಳನ್ನು ಬಳಸುವುದಿಲ್ಲ ಎಂದು ಟ್ವೀಟ್ ಮಾಡುವ ಮೂಲಕ ಸಖತ್​ ಶಾಕ್​ ಕೊಟ್ಟಿದ್ದರು.

ಹೆಚ್ಚೇನೂ ಹೇಳದೆ ಮೂರು ಸಾಲಿನಲ್ಲಿ ಟ್ವೀಟ್ ಮಾಡಿದ್ದರು. ನರೇಂದ್ರ ಮೋದಿಯವರ ಈ ಟ್ವೀಟ್​ಗೆ ಅಪಾರ ಅರ್ಥ ಕಲ್ಪಿಸಿದ ನೆಟ್ಟಿಗರು ಸಾವಿರ ಸಾವಿರ ಪ್ರತಿಕ್ರಿಯೆ ಮಾಡಿದ್ದರು. ಏನಿರಬಹುದು ಇದರ ಅರ್ಥ ಎಂಬುದೇ ದೊಡ್ಡ ಚರ್ಚೆಯಾಗಿ ಹೋಗಿತ್ತು.

ಆದರೆ ಪ್ರಧಾನಿ ನರೇಂದ್ರ ಮೋದಿ ಇಂದು ಮತ್ತೊಮ್ಮೆ ಟ್ವೀಟ್ ಮಾಡಿದ್ದಾರೆ. ಸೋಮವಾರ ತಾವು ಮಾಡಿದ ಟ್ವೀಟ್​ ಏನೆಂದು ಹೇಳಿದ್ದಾರೆ. ತಾವ್ಯಾಕೆ ಮಾರ್ಚ್​ 8ರಂದು ತಮ್ಮ ಇನ್ಸ್ಟಾಗ್ರಾಂ, ಫೇಸ್​ಬುಕ್​, ಟ್ವಿಟರ್​, ಯೂಟ್ಯೂಬ್​ ಅಕೌಂಟ್​ಗಳನ್ನು ಬಳಸುವುದಿಲ್ಲ ಎಂಬುದಕ್ಕೆ ಕಾರಣವನ್ನು ತಿಳಿಸಿದ್ದಾರೆ.

ಈ ಭಾನುವಾರ ಮಹಿಳಾ ದಿನಾಚರಣೆಯಂದು ನಾನು ನನ್ನ ಎಲ್ಲ ಸಾಮಾಜಿಕ ಜಾಲತಾಣಗಳ ಅಕೌಂಟ್​ನ್ನೂ ಸಾಧಕ ಮಹಿಳೆಯರಿಗೆ ಬಿಟ್ಟುಕೊಡುತ್ತಿದ್ದೇನೆ. ತಮ್ಮ ಜೀವನ ಮತ್ತು ಕೆಲಸದ ಮೂಲಕ ಸ್ಫೂರ್ತಿಯಾದ ಮಹಿಳೆಯರು ನನ್ನ ಸಾಮಾಜಿಕ ಜಾಲತಾಣಗಳನ್ನು ಬಳಸಿಕೊಳ್ಳಲಿದ್ದಾರೆ. ಈ ಮೂಲಕ ದೇಶದ ಕೋಟ್ಯಂತರ ಜನರಿಗೆ ಅವರು ಪ್ರೇರಣೆ ತುಂಬಲು ಸಾಧ್ಯವಾಗುತ್ತದೆ ಎಂದು ನರೇಂದ್ರ ಮೋದಿ ಟ್ವೀಟ್ ಮೂಲಕ ತಿಳಿಸಿದ್ದಾರೆ.

ಹಾಗೇ #SheInspiresUs ಎಂಬ ಹ್ಯಾಷ್​ಟ್ಯಾಗ್​ನ್ನೂ ಮೋದಿಯವರು ನೀಡಿದ್ದು, ಸಾಧಕ ಮಹಿಳೆಯರು ತಮ್ಮ ಜೀವನದ ಸ್ಫೂರ್ತಿದಾಯಕ ಕತೆಯನ್ನು ಇದೇ ಹ್ಯಾಷ್​ಟ್ಯಾಗ್ ಮೂಲಕ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲು ಹೇಳಿದ್ದಾರೆ.

ನೀವು ಅಂತಹ ಸಾಧಕ ಮಹಿಳೆಯರಲ್ಲಿ ಒಬ್ಬರಾದರೆ ಅಥವಾ ನಿಮಗೆ ಅಂತಹವರ ಪರಿಚಯವಿದ್ದರೆ, ನೀವು ಯಾರಿಂದಲಾದರೂ ಪ್ರೇರಣೆಗೆ ಒಳಗಾಗಿದ್ದರೆ ಆ ಬಗ್ಗೆ#SheInspiresUs ಹ್ಯಾಷ್​ಟ್ಯಾಗ್​ ಬಳಸಿ ನಮ್ಮೊಂದಿಗೆ ಹಂಚಿಕೊಳ್ಳಿ. ಅದಕ್ಕಾಗಿಯೇ ನಾನು ನನ್ನ ಎಲ್ಲ ಸೋಷಿಯಲ್​ ಮೀಡಿಯಾಗಳನ್ನು ಬಿಟ್ಟುಕೊಡುತ್ತಿದ್ದೇನೆ ಎಂದಿದ್ದಾರೆ. ಹಾಗೇ ಒಂದು ಫೋಟೋವನ್ನು ಕೂಡ ಪೋಸ್ಟ್ ಮಾಡಿದ್ದಾರೆ.