ರಾಷ್ಟ್ರೀಯ

ಜಾಗತಿಕ ಅಪಾಯಕಾರಿ ಪರಿಸ್ಥಿತಿ ಪಟ್ಟಿಯಲ್ಲಿ ಭಾರತಕ್ಕೆ 5ನೇ ಸ್ಥಾನ!

Pinterest LinkedIn Tumblr


ಹೊಸದಿಲ್ಲಿ: 2020ನೇ ಸಾಲಿನ ಜಾಗತಿಕ ಅಪಾಯಕಾರಿ ಪರಿಸ್ಥಿತಿ ಪಟ್ಟಿಯಲ್ಲಿ ನರೇಂದ್ರ ಮೋದಿ ಆಡಳಿತದ ಭಾರತಕ್ಕೆ 5ನೇ ಸ್ಥಾನ ನೀಡಿರುವ ಅಪಾಯ ವಿಶ್ಲೇಷಣೆ ಸಂಸ್ಥೆ ‘ಯುರೇಷ್ಯಾ ಗ್ರೂಪ್‌’, ಕೇಂದ್ರ ಸರಕಾರದ ನೀತಿಗಳಲ್ಲಿ ಮಹತ್ವದ ಬದಲಾವಣೆಗೆ ಗೃಹ ಸಚಿವ ಅಮಿತ್‌ ಶಾ ಅವರೇ ಕಾರಣ ಎಂದು ಅಭಿಪ್ರಾಯಪಟ್ಟಿದೆ.

‘ಯುರೇಷ್ಯಾ ಗ್ರೂಪ್‌’ ಅಧ್ಯಕ್ಷರೂ ಆಗಿರುವ ಲೇಖಕ ಇಯಾನ್‌ ಬ್ರೆಮ್ಮರ್‌ ಅವರು ತಮ್ಮ ‘ಇಂಡಿಯಾ ಗೆಟ್ಸ್‌ ಮೋದಿ ಫೈಡ್‌’ ಹೆಸರಿನ ವಿಶ್ಲೇಷಣಾ ವರದಿಯಲ್ಲಿಈ ವಿಷಯ ಪ್ರಸ್ತಾಪಿಸಿದ್ದಾರೆ. ಮೋದಿ ನೀತಿಗಳಲ್ಲಿ ಭಾರಿ ಬದಲಾವಣೆಗೆ ಅಮಿತ್‌ ಶಾ ಅವರು ಹೇಗೆ ಕಾರಣರಾದರು ಎಂದು ವರದಿಯಲ್ಲಿ ಚರ್ಚಿಸಲಾಗಿದೆ.

”2019ರ ಮೇನಲ್ಲಿ ಸಾರ್ವತ್ರಿಕ ಚುನಾವಣೆ ಬಳಿಕ ಮೋದಿ ಸರಕಾರ ಅಳವಡಿಸಿಕೊಂಡ ‘ವಿವಾದಾತ್ಮಕ ಸಾಮಾಜಿಕ ಅಜೆಂಡಾ’ದಿಂದಾಗಿ ಭಾರತದ ಆರ್ಥಿಕತೆಗೆ ಪೆಟ್ಟು ಬಿದ್ದಿರುವುದು ಮಾತ್ರವಲ್ಲದೆ, ಭಾರತದ ಜಾತ್ಯತೀತ ಮತ್ತು ಪ್ರಜಾಸತ್ತಾತ್ಮಕತೆಯ ಅಡಿಪಾಯವನ್ನೇ ಅಲುಗಾಡಿಸಿವೆ. ಮೋದಿ ಮತ್ತು ಅವರ ಸರಕಾರ ಇತ್ತೀಚೆಗೆ ತುಂಬಾ ಬ್ಯುಸಿಯಾಗಿದೆ.

ಜಮ್ಮು-ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನವನ್ನು ರದ್ದುಗೊಳಿಸಲಾಗಿದೆ. ಈಶಾನ್ಯ ಭಾರತದಲ್ಲಿಅಕ್ರಮ ವಲಸಿಗರನ್ನು ಗುರುತಿಸುವ ಯೋಜನೆಯನ್ನು ಆರಂಭಿಸಲಾಗಿದೆ. ಇದರಿಂದ 19 ಲಕ್ಷ ಜನರು ಪೌರತ್ವ ಕಳೆದುಕೊಳ್ಳಲಿದ್ದಾರೆ. ಇದೇ ಮೊದಲ ಬಾರಿಗೆ ಸರಕಾರ ಇತರೆ ದೇಶಗಳ ವಲಸಿಗರು ಭಾರತದ ಪೌರತ್ವ ಪಡೆಯಲು ಧರ್ಮವನ್ನು ಮಾನದಂಡವಾಗಿ ಗುರುತಿಸಿದೆ,” ಎಂದು ವರದಿ ಹೇಳಿದೆ. ಭಾರತೀಯ ಜನತಾ ಪಕ್ಷದ ಅಧ್ಯಕ್ಷರಾಗಿದ್ದ ಮತ್ತು ಈಗ ಕೇಂದ್ರ ಗೃಹ ಸಚಿವರಾಗಿರುವ ಅಮಿತ್‌ ಶಾ ಅವರು ಸರಕಾರದ ಈ ನಡೆಗಳಿಗೆ ಕಾರಣ ಎಂದು ಲೇಖಕರು ಅಭಿಪ್ರಾಯಪಟ್ಟಿದ್ದಾರೆ.

ವಿದೇಶಾಂಗ ನೀತಿಯ ಮೇಲೆ ಪರಿಣಾಮ: ಮೋದಿ ಸರಕಾರದ ಸಾಮಾಜಿಕ ಅಜೆಂಡಾ ಭಾರತದ ವಿದೇಶಾಂಗ ನೀತಿಯ ಮೇಲೆ ಪ್ರತಿಕೂಲ ಪರಿಣಾಮ ಬೀರಿದೆ. ಮಾನವ ಹಕ್ಕುಗಳಿಗೆ ಸಂಬಂಧಿಧಿಸಿದಂತೆ ಸರಕಾರ ಕೈಗೊಳ್ಳುತ್ತಿರುವ ಕ್ರಮಗಳನ್ನು ಇತರೆ ದೇಶಗಳು ತುಂಬಾ ಸೂಕ್ಷ್ಮವಾಗಿ ಪರಿಶೀಲಿಸುತ್ತಿವೆ. ಇದರಿಂದ ಭಾರತದ ಖ್ಯಾತಿಗೆ ಧಕ್ಕೆಯಾಗಲಿದೆ,” ಎಂದು ವರದಿ ಹೇಳಿದೆ. ಭಾರತದ ಬಗ್ಗೆ ಬದಲಾಗುತ್ತಿರುವ ಅಮೆರಿಕ ಸಂಸತ್ತಿನ ಧೋರಣೆಯು ಅಮೆರಿಕ-ಭಾರತದ ಸಂಬಂಧದ ಮೇಲೆ ಮತ್ತಷ್ಟು ಪ್ರತಿಕೂಲ ಪರಿಣಾಮ ಬೀರಲಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಆರೆಸ್ಸೆಸ್‌, ಬಿಜೆಪಿ ಛಾಯೆ: ಆರ್ಥಿಕತೆಗೆ ಸಂಬಂಧಿಸಿದಂತೆ ಈ ಬಾರಿ ಮೋದಿ ಸರಕಾರದ ನೀತಿಗಳಲ್ಲಿ, ಬಿಜೆಪಿಯ ಮೂಲ ಸಂಘಟನೆಯಾದ ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಛಾಯೆ ಮತ್ತಷ್ಟು ಪ್ರಬಲವಾಗಿದೆ. ಇತ್ತೀಚೆಗೆ ಆರ್‌ಸಿಇಪಿ ಒಪ್ಪಂದದಿಂದ ಹಿಂದೆ ಸರಿಯುವಲ್ಲಿಮೋದಿ ಅವರ ಮೇಲೆ ಆರೆಸ್ಸೆಸ್‌ ಪ್ರಭಾವ ನಿಚ್ಚಳವಾಗಿದೆ. ಸರಕಾರದ ಮೇಲೆ ಆರೆಸ್ಸೆಸ್‌ ಪ್ರಾಬಲ್ಯ ಹೆಚ್ಚಿದಷ್ಟೂ ರಚನಾತ್ಮಕ ಸುಧಾರಣೆಗಳ ವಿಚಾರದಲ್ಲಿ ಮೋದಿ ಕೈ ಕಟ್ಟಿಹಾಕಿದಂತಾಗುತ್ತದೆ. ಈಗಾಗಲೇ 6 ವರ್ಷದ ಕನಿಷ್ಠ ಮಟ್ಟಕ್ಕೆ ಜಾರಿರುವ ಜಿಡಿಪಿ ದರವು ಮುನ್ಸೂಚನೆ ನೀಡಿದೆ ಎಂದು ವರದಿ ಹೇಳಿದೆ. ಮೊದಲ ಸ್ಥಾನದಲ್ಲಿ ಟ್ರಂಪ್‌ ಸರಕಾರವಿದೆ.

Comments are closed.