ರಾಷ್ಟ್ರೀಯ

ಆಧಾರ್‌ ವಿಳಾಸ ಪರಿಷ್ಕರಣೆ ಆನ್‌ಲೈನ್‌ನಲ್ಲಿ ಮಾಡಿ

Pinterest LinkedIn Tumblr


ಜನ ನಾನಾ ಕಾರಣಗಳೊಗೋಸ್ಕರ ವಾಸ್ತವ್ಯವನ್ನು ಬದಲಿಸುವುದು ಸಾಮಾನ್ಯ. ಇಂಥ ಸಂದರ್ಭ ಆಧಾರ್‌ ಕಾರ್ಡ್‌ನಲ್ಲಿ ವಿಳಾಸವನ್ನು ಬದಲಿಸಲು ಆಧಾರ್‌ ಕೇಂದ್ರಕ್ಕೇ ಹೋಗಬೇಕಿಲ್ಲ. ನೀವೆಲ್ಲೇ ಇದ್ದರೂ ಇಂಟರ್‌ನೆಟ್‌ ಸಂಪರ್ಕ ಇರುವ ಮೊಬೈಲ್‌, ಲ್ಯಾಪ್‌ಟಾಪ್‌, ಡೆಸ್ಕ್‌ ಟಾಪ್‌ ಕಂಪ್ಯೂಟರ್‌ ಮೂಲಕ ಆನ್‌ಲೈನ್‌ ಮೂಲಕ ಆಧಾರ್‌ ವಿಳಾಸವನ್ನು ಸುಲಭವಾಗಿ ಬದಲಿಸಬಹುದು.

ಅನುಕೂಲಗಳೇನು?
-ಆಧಾರ್‌ ಸೇವೆ ನೀಡುವ ಕೇಂದ್ರಗಳಲ್ಲಿ ಟೋಕನ್‌ ತೆಗೆದುಕೊಂಡು ಗಂಟೆಗಟ್ಟಲೆ ಕಾದು ನಿಲ್ಲಬೇಕಾದ ಅಗತ್ಯ ಇಲ್ಲ.
-ಆನ್‌ಲೈನ್‌ನಲ್ಲಿ ಈ ಸೇವೆ ಉಚಿತ.
– ನೀವು ಎಲ್ಲೇ ಇದ್ದರೂ, ಯಾವುದೇ ದಿನಗಳಲ್ಲಾದರೂ ಆನ್‌ಲೈನ್‌ ಮೂಲಕ ವಿಳಾಸ ಬದಲಿಸಬಹುದು.
-ಆನ್‌ಲೈನ್‌ ಮೂಲಕ ಡೌನ್‌ಲೋಡ್‌ ಮಾಡಿಕೊಳ್ಳಬಹುದು. ಜತೆಗೆ ನಮೂದಿಸಿದ ವಿಳಾಸಕ್ಕೆ ಅಂಚೆ ಮೂಲಕ ಪರಿಷ್ಕೃತ ಕಾರ್ಡ್‌ ತಲುಪುತ್ತದೆ.
-ಸ್ವತಃ ನೀವೇ ವಿಳಾಸವನ್ನು ಪರಿಷ್ಕರಿಸಬಹುದು.

ಅಗತ್ಯವಿರುವ ದಾಖಲೆಗಳು
ಬ್ಯಾಂಕ್‌ ಸ್ಟೇಟ್‌ಮೆಂಟ್‌, ರೇಷನ್‌ ಕಾರ್ಡ್‌, ಪಾಸ್‌ಪೋರ್ಟ್‌, ಮತದಾರರ ಗುರುತಿನ ಚೀಟಿ, ಡ್ರೈವಿಂಗ್‌ ಲೈಸನ್ಸ್‌, ಇತ್ತೀಚಿನ ವಿದ್ಯುತ್‌ ಬಿಲ್‌, ಇತ್ತೀಚಿನ ಅಡುಗೆ ಅನಿಲ ಸಂಪರ್ಕ (ಎಲ್ಪಿಜಿ) ಬಿಲ್‌, ನೀರಿನ ಬಿಲ್‌, ನರೇಗಾ ಜಾಬ್‌ ಕಾರ್ಡ್‌, ಇನ್ಷೂರೆನ್ಸ್‌ ಪಾಲಿಸಿ, ಕಿಸಾನ್‌ ಪಾಸ್‌ಬುಕ್‌ ಇತ್ಯಾದಿ 25ಕ್ಕೂ ಹೆಚ್ಚು ದಾಖಲೆಗಳಲ್ಲಿ ಯಾವುದಾದರೂ ಒಂದಿದ್ದರೂ ವಿಳಾಸ ಬದಲಿಸಬಹುದು.

ಮೊಬೈಲ್‌ ಸಂಖ್ಯೆ ನೋಂದಣಿ ಕಡ್ಡಾಯ
ಆಧಾರ್‌ ಕಾರ್ಡ್‌ನಲ್ಲಿ ನಿಮ್ಮ ಮೊಬೈಲ್‌ ಸಂಖ್ಯೆ ನೋಂದಣಿಯಾಗಿರಬೇಕು. ಹಾಗಿದ್ದರೆ ಮಾತ್ರ ಆನ್‌ಲೈನ್‌ ಮೂಲಕ ವಿಳಾಸ ಪರಿಷ್ಕರಣೆ ಸಾಧ್ಯ. ಯಾಕೆಂದರೆ ಇದಕ್ಕೆ ಒಟಿಪಿ ಬರುತ್ತದೆ. ಇಲ್ಲದಿದ್ದರೆ ಆಧಾರ್‌ ಸೇವೆ ಒದಗಿಸುವ ಕೇಂದ್ರಕ್ಕೆ ತೆರಳಿ ಮೊಬೈಲ್‌ ಸಂಖ್ಯೆಯನ್ನು ನೋಂದಣಿ ಮಾಡಿಸಿಕೊಳ್ಳಬೇಕು.

ಆನ್‌ಲೈನ್‌ ಮೂಲಕ ವಿಳಾಸ ಬದಲಾವಣೆ ಹೀಗೆ:

1. ಆಧಾರ್‌ ವೆಬ್‌ಸೈಟ್‌https://uidai.gov.in ನಲ್ಲಿ ಲಾಗಿನ್‌ ಆಗಿ.
2. ಮೈ ಆಧಾರ್‌ ಕ್ಲಿಕ್ಕಿಸಿ-ಅಪ್‌ಡೇಟ್‌ ಯುವರ್‌ ಅಡ್ರೆಸ್‌ಗೆ ತೆರಳಿ.
3. ಅಪ್‌ಡೇಟ್‌ ಯುವರ್‌ ಅಡ್ರೆಸ್‌ ಪುಟದಲ್ಲಿ ನಿಮಗೆ ಬೇಕಾದ ಎಲ್ಲ ವಿವರಗಳು ಲಭ್ಯ.
4. ಪ್ರೊಸೀಡ್‌ ಟು ಅಪ್‌ಡೇಟ್‌ ಅಡ್ರೆಸ್‌ ಕ್ಲಿಕ್ಕಿಸಿ
5. 12 ಅಂಕಿಗಳ ಆಧಾರ್‌ ಸಂಖ್ಯೆ, ಕ್ಯಾಪ್ಚಾ ವೆರಿಫಿಕೇಶನ್‌ ಆದ ನಂತರ ನಿಮ್ಮ ಮೊಬೈಲ್‌ಗೆ ಒಟಿಪಿ ಬರುತ್ತದೆ. ಅದನ್ನೂ ನಮೂದಿಸಿ.
6. ನಂತರ ಹೊಸ ವಿಳಾಸದ ವಿವರಗಳನ್ನು ಭರ್ತಿಗೊಳಿಸಿರಿ. ಸಂಬಂಧಿಸಿದ ದಾಖಲೆಯ ಮೂಲಪ್ರತಿಯನ್ನು ಮೊದಲೇ ಸ್ಕ್ಯಾ‌ನ್‌ ಮಾಡಿಟ್ಟುಕೊಳ್ಳಬೇಕು. ಅದನ್ನು ಅಪ್‌ಲೋಡ್‌ ಮಾಡಿಕೊಳ್ಳಿ.
7. ವಿವರಗಳನ್ನು ಸಲ್ಲಿಸಿದ ನಂತರ ನಿಮ್ಮ ಮೊಬೈಲ್‌ಗೆ ‘ಅಪ್‌ಡೇಟ್‌ ರಿಕ್ವೆಸ್ಟ್‌ ನಂಬರ್‌’ ಬರುತ್ತದೆ.
8. ಮನವಿ ಅಪ್ರೂವ್‌ ಆದ ಬಳಿಕ ಹಾಗೂ ಪರಿಷ್ಕರಣೆ ಆದ ನಂತರ ಕೂಡ ಮೊಬೈಲ್‌ಗೆ ಎಸ್ಸೆಮ್ಮೆಸ್‌ ಬರುತ್ತದೆ.
9. ಆನ್‌ಲೈನ್‌ ಮೂಲಕ ಇ-ಆಧಾರ್‌ ಅನ್ನು ಡೌನ್‌ಲೋಡ್‌ ಮಾಡಬಹುದು.
10. ಕೆಲ ದಿನಗಳಲ್ಲಿ ಅಂಚೆ ಮೂಲಕ ಪರಿಷ್ಕೃತ ಆಧಾರ್‌ ಕಾರ್ಡ್‌ ನಿಮ್ಮ ಕೈ ಸೇರುತ್ತದೆ.

ನಿಮ್ಮ ಹೆಸರಿನಲ್ಲಿ ವಿಳಾಸದ ದಾಖಲೆ ಇಲ್ಲದಿದ್ದರೂ, ವಿಳಾಸ ಬದಲಿಸಬಹುದು!
ನಿಮ್ಮ ಹೆಸರಿನಲ್ಲಿ ವಿಳಾಸದ ದೃಢೀಕರಣಕ್ಕಾಗಿ ಯಾವುದೇ ಒಂದು ದಾಖಲೆ ಕೂಡ ಇಲ್ಲದಿದ್ದರೂ, ಚಿಂತಿಸಬೇಕಿಲ್ಲ. ದೃಢೀಕರಣ ಪತ್ರ ಅಥವಾ ‘ರಿಕ್ವೆಸ್ಟ್‌ ಫಾರ್‌ ಅಡ್ರೆಸ್‌ ವ್ಯಾಲಿಡೇಷನ್‌ ಲೆಟರ್‌’ ಪ್ರಕ್ರಿಯೆ ಮೂಲಕ ಮಾಡಬಹುದು. ಅಂದರೆ ನೀವು ಯಾವ ಮನೆಯಲ್ಲಿ ವಾಸ್ತವ್ಯದಲ್ಲಿ ಇದ್ದಾರೆಯೋ, ಅದರ ಮಾಲೀಕರಿಂದ ದೃಢೀಕರಣ. ವಿಳಾಸದ ದೃಢೀಕರಣ ಮಾಡುವವರು ನಿಮ್ಮ ಕುಟುಂಬದ ಸದಸ್ಯರು, ಸಂಬಂಧಿಕರು, ಸ್ನೇಹಿತರು ಅಥವಾ ಮನೆಯ ಮಾಲೀಕರು ಯಾರಾದರೂ ಆಗಿರಬಹುದು. ಅವರಿಂದ ಒಪ್ಪಿಗೆ ಪಡೆದ ನಂತರ ಯುಐಡಿಎಐ ವೆಬ್‌ ಸೈಟ್‌ಗೆ ತೆರಳಿ ‘ವಿಳಾಸ ದೃಢೀಕರಣ ಪತ್ರ’ ಸೃಷ್ಟಿಸಬಹುದು.

ಪ್ರಕ್ರಿಯೆ ಹೀಗೆ
1. ಯುಐಡಿಎಐ ವೆಬ್‌ಸೈಟ್‌ಗೆ ಲಾಗಿನ್‌ ಆಗಿ.
2. ನಿಮ್ಮ ಆಧಾರ್‌ ಸಂಖ್ಯೆ ನಮೂದಿಸಿದ ನಂತರ ಅಡ್ರೆಸ್‌ ವ್ಯಾಲಿಡೇಶನ್‌ ಲೆಟರ್‌ ಪ್ರಕ್ರಿಯೆ ಆರಂಭಿಸಿ.
3. ವಿಳಾಸ ದೃಢೀಕರಣ ಮಾಡುವವರ ವಿಳಾಸಕ್ಕೆ ರಹಸ್ಯ ಕೋಡ್‌ ರವಾನೆಯಾಗುತ್ತದೆ.
4. ದೃಢೀಕರಣ ಮಾಡುವವರು ಅಂಚೆ ಮೂಲಕ ವಿಳಾಸ ದೃಢೀರಣ ಪತ್ರ ಪಡೆದ ನಂತರ ಮತ್ತೆ ವೆಬ್‌ಸೈಟ್‌ಗೆ ಲಾಗಿನ್‌ ಆಗಬೇಕು.
5. ರಹಸ್ಯ ಕೋಡ್‌ ಅನ್ನು ನಮೂದಿಸಿ ವಿಳಾಸವನ್ನು ಪರಿಷ್ಕರಿಸಬಹುದು.

ನೆನಪಿಡಿ
ಆಧಾರ್‌ ವಿಳಾಸವನ್ನು ಮಾತ್ರ ಆನ್‌ಲೈನ್‌ ಮೂಲಕ ನೀವೇ ಬದಲಾವಣೆ ಮಾಡಬಹುದು. ಆದರೆ ಹೆಸರು, ಲಿಂಗ, ಮೊಬೈಲ್‌ ಸಂಖ್ಯೆ, ಜನ್ಮ ದಿನಾಂಕ, ಇ-ಮೇಲ್‌ ಹಾಗೂ ಬೆರಳಿನ ಗುರುತು, ಭಾವಚಿತ್ರ ಇತ್ಯಾದಿ ಬಯೋಮೆಟ್ರಿಕ್‌ ವಿವರಗಳ ಬದಲಾವಣೆಗೆ ನೀವು ಆಧಾರ್‌ ಸೇವಾ ಕೇಂದ್ರಗಳಿಗೆ ತೆರಳಲೇಬೇಕು.

Comments are closed.