ಚಂದ್ರಬಾಬು ನಾಯ್ಡುಗಿಂತ ಮೂರುವರೆ ವರ್ಷದ ಮೊಮ್ಮಗನೇ ಶ್ರೀಮಂತ

ಹೈದರಾಬಾದ್: ಇದು ಸಿರಿವಂತಿಕೆಯಲ್ಲಿ ಅಜ್ಜನನ್ನೇ ಮೀರಿಸಿದ ಮೊಮ್ಮಗನ ಕಥೆ. ಆ ಮೊಮ್ಮಗ ಮತ್ಯಾರೂ ಅಲ್ಲ, ಆಂಧ್ರ ಪ್ರದೇಶ ಸಿಎಂ ಎನ್. ಚಂದ್ರಬಾಬು ನಾಯ್ಡು ಅವರ ಮೊಮ್ಮಗ ನರ ದೇವಾಂಶ್.

ಮೂರೂವರೆ ವರ್ಷದ ಈತನ ಒಟ್ಟು ಆಸ್ತಿ ಮೌಲ್ಯ 18.71 ಕೋಟಿ ರೂ. ಆದರೆ ಅಜ್ಜ ಚಂದ್ರಬಾಬು ನಾಯ್ಡು ಬಳಿ ಇರುವುದು 2.99 ಕೋಟಿ ರೂ. ಮೌಲ್ಯದ ಆಸ್ತಿ ಮಾತ್ರ.

ಆಡಳಿತ ಮತ್ತು ರಾಜಕೀಯ ಜೀವನದಲ್ಲಿ ಪಾರದರ್ಶಕತೆ ಕಾಯ್ಡುಕೊಳ್ಳಲು ಚಂದ್ರಬಾಬು ನಾಯ್ಡು ಪ್ರತಿವರ್ಷ ತಮ್ಮ ಮತ್ತು ಕುಟುಂಬ ಸದಸ್ಯರ ಆಸ್ತಿ ವಿವರ ಘೋಷಿಸುತ್ತಾರೆ.

ನಾಯ್ಡು ಕುಟುಂಬದಲ್ಲಿ ಒಟ್ಟು ಐದು ಮಂದಿ ಸದಸ್ಯರಿದ್ದು, ಒಟ್ಟಾರೆ 88.66 ಕೋಟಿ ರೂ.ಮೌಲ್ಯದ ಆಸ್ತಿ ಹೊಂದಿದ್ದಾರೆ. ದೇವಾಂಶ್ ಹೆಸರಿನಲ್ಲಿ 16.17 ಕೋಟಿ ರೂ. ಆಸ್ತಿ ಮತ್ತು 2.49 ಕೋಟಿ ರೂ. ಮೌಲ್ಯದ ಎಫ್‌ಡಿ ಇದೆ. ದೇವಾಂಶ್ ಆಸ್ತಿ 2017ರಲ್ಲಿ 11.54 ಕೋಟಿ ರೂ. ಇತ್ತು.

ಚಂದ್ರಬಾಬು ನಾಯ್ಡು 8 ಕೋಟಿ ರೂ.ಗೂ ಅಧಿಕ ಮೌಲ್ಯದ ಆಸ್ತಿ ಹೊಂದಿದ್ದರೂ, 5.31 ಕೋಟಿ ರೂ. ಸಾಲ ಹೊಂದಿದ್ದು, ಹೀಗಾಗಿ 2.99 ಕೋಟಿ ರೂ. ಮೌಲ್ಯದ ಆಸ್ತಿ ಮಾತ್ರ ಇದೆ.

ಚಂದ್ರಬಾಬು ಪತ್ನಿ ಭುವನೇಶ್ವರಿ ಹೆಸರಿನಲ್ಲಿ 31.01 ಕೋಟಿ ರೂ. ಮೌಲ್ಯದ ಆಸ್ತಿ ಇದೆ. ಪುತ್ರ ಲೋಕೇಶ್ ಬಳಿ ಬಳಿ 21.40 ಕೋಟಿ ರೂ. ಮೌಲ್ಯದ ಸ್ಥಿರ ಮತ್ತು ಚರಾಸ್ತಿ ಇದೆ. ಜತೆಗೆ ಉದ್ಯಮ, ವಿವಿಧ ಹೂಡಿಕೆ ಹೀಗೆ ಕುಟುಂಬ ಸದಸ್ಯರ ಒಟ್ಟಾರೆ ಆಸ್ತಿ ಮೌಲ್ಯ 88.66 ಕೋಟಿ ರೂ. ಆಗಿದೆ.