ಮಹಿಳಾ ಪೇದೆ ಗಂಡಾಗಿ ಬದಲಾಗುವ ಚಿಕಿತ್ಸೆಗೆ ಮಹಾರಾಷ್ಟ್ರ ಸರಕಾರ ಅನುಮತಿ!

ಬೀಡ್‌: ಮಹಾರಾಷ್ಟ್ರದ 29 ವರ್ಷದ ಮಹಿಳಾ ಪೇದೆ ಲಲಿತಾ ಸಾಳ್ವೆ ಅವರಿಗೆ ಇತ್ತೀಚಿನ ವರ್ಷಗಳಲ್ಲಿ ತಾವು ಗಂಡಾಗಿ ಬದಲಾಗುವ ಆಸೆ ಮೊಳಗಿತ್ತು. ಅಗತ್ಯ ವೈದ್ಯಕೀಯ ಪರವಾನಗಿ ಹಾಗೂ ಲಿಂಗ ಪರಿವರ್ತನೆ ಚಿಕಿತ್ಸೆಗೆ ಇಲಾಖೆಯಿಂದ ರಜೆ ಪಡೆಯಲು ನಡೆಸಿದ ಕಾನೂನು ಹೋರಾಟ ಕೊನೆಗೂ ಈಡೇರಿದೆ. ಚಿಕಿತ್ಸೆಗೆ ಒಳಪಡಲು ಮಹಾರಾಷ್ಟ್ರ ಸರಕಾರ ಅನುಮತಿ ನೀಡಿದ್ದು, ಮುಂದಿನ ದಿನಗಳಲ್ಲಿ ಇಲಾಖೆಯು ಅವರನ್ನು ‘ಲಲಿತ್‌’ ಎಂದು ಕರೆದರೂ ಅಚ್ಚರಿಪಡಬೇಕಿಲ್ಲ.

1988ರಲ್ಲಿ ಜನಿಸಿದ ಲಲಿತಾ ಸಾಳ್ವೆ ಅವರು ಇತ್ತೀಚಿನ ವರ್ಷಗಳಲ್ಲಿ ತಮ್ಮ ದೇಹದಲ್ಲಾಗುತ್ತಿರುವ ಲೈಂಗಿಕ ಹಾರ್ಮೋನು ಏರಿಳಿತಗಳನ್ನು ಸೂಕ್ಷ್ಮವಾಗಿ ಗಮನಿಸಿದ್ದರು. ಬಳಿಕ ಸಾಕಷ್ಟು ವೈದ್ಯಕೀಯ ಪರೀಕ್ಷೆಗಳಿಗೆ ಒಳಪಟ್ಟಾಗ ಅವರಲ್ಲಿ, ಪುರುಷರಲ್ಲಿ ಇರುವ ‘ಎಕ್ಸ್‌’ ಮತ್ತು ‘ವೈ’ ಕ್ರೋಮೋಸೋಮ್‌ಗಳು ಇರುವುದು ಪತ್ತೆಯಾಗಿತ್ತು. ಇದನ್ನೇ ಮುಂದಿಟ್ಟುಕೊಂಡು ಅವರು ಗಂಡಾಗಿ ಬದಲಾಗಲು ನಿರ್ಧರಿಸಿದರು. ನಂತರದಲ್ಲಿ ಲಿಂಗ ಪರಿವರ್ತನೆ ಚಿಕಿತ್ಸೆಗೆ ಒಳಪಡಲು ರಜೆ ನೀಡಬೇಕೆಂದು ಕೋರಿ ರಾಜ್ಯದ ಡಿಜಿಪಿಗಷ್ಟೇ ಅಲ್ಲದೇ ಬೀಡ್‌ ಎಸ್ಪಿ ಜಿ.ಶ್ರೀಧರ್‌ಗೆ ಪತ್ರ ಬರೆದರಾದರೂ ಎರಡೂ ಕಡೆಯಿಂದ ನಾನಾ ಕಾರಣಗಳಿಂದ ಅನುಮತಿ ಸಿಗಲಿಲ್ಲ.

ಇಷ್ಟಕ್ಕೇ ಸುಮ್ಮನಾಗದ ಅವರು, ಕಳೆದ ಮಾರ್ಚ್‌ 21ರಂದು ಸಿಎಂ ದೇವೇಂದ್ರ ಫಡ್ನವಿಸ್‌ ಅವರನ್ನು ಭೇಟಿಯಾಗಿ ಲಿಂಗ ಪರಿವರ್ತನೆ ಚಿಕಿತ್ಸೆಗೆ ಅನುಮತಿಸಲು ಇಲಾಖೆಗೆ ಸೂಚಿಸುವಂತೆ ಮನವಿ ಸಲ್ಲಿಸಿದ್ದರು. ಇದಕ್ಕೂ ಮೊದಲು ಇದೇ ವಿಚಾರದಲ್ಲಿ ಡಿಜಿಪಿಗೆ ನಿರ್ದೇಶನ ನೀಡುವಂತೆ ಕೋರಿ ಬಾಂಬೆ ಹೈಕೋರ್ಟ್‌ ಮೊರೆ ಹೋಗಿದ್ದರು. ಕೋರ್ಟ್‌, ಮಹಾರಾಷ್ಟ್ರ ಆಡಳಿತ ಪ್ರಾಧಿಕಾರದಲ್ಲಿ ವಿಷಯ ಬಗೆಹರಿಸಿಕೊಳ್ಳುವಂತೆ ಹೇಳಿ ಕಳುಹಿಸಿತ್ತು. ಅಲ್ಲಿ ಅವರಿಗೆ ಲಿಂಗ ಪರಿವರ್ತನೆ ಚಿಕಿತ್ಸೆಗೆ ಒಳಗಾಗಲು ಒಪ್ಪಿಗೆ ಸಿಕ್ಕಿದೆ. ”ಮುಂಬಯಿಯ ಜೆಜೆ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ಒಳಪಟ್ಟು ಒಂದು ತಿಂಗಳ ಬಳಿಕ ಪುರುಷ ಪೇದೆಯಾಗಿ ಸೇವೆಗೆ ಸೇರುತ್ತೇನೆ,” ಎಂದು ವಿಶ್ವಾಸ ವ್ಯಕ್ತಪಡಿಸುತ್ತಾರೆ ಲಲಿತಾ ಸಾಳ್ವೆ.