ರಾಷ್ಟ್ರೀಯ

10 ಕೋಟಿ ರೂ. ಠೇವಣಿ: ರಾಹುಲ್‌ ಒಡೆತನದ ಯಂಗ್‌ ಇಂಡಿಯನ್‌ ಕಂಪನಿಗೆ ಕೋರ್ಟ್‌ ಸೂಚನೆ

Pinterest LinkedIn Tumblr


ಹೊಸದಿಲ್ಲಿ : ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ ಹಾಗೂ ಅವರ ತಾಯಿ ಸೋನಿಯಾ ಗಾಂಧಿ ಮುಖ್ಯ ಪಾಲುದಾರರಾಗಿರುವ ಯಂಗ್‌ ಇಂಡಿಯನ್‌ ಪ್ರೈವೇಟ್‌ ಲಿಮಿಟೆಡ್‌ ಕಂಪನಿಗೆ 10 ಕೋಟಿ ರೂ. ಠೇವಣಿ ಇರಿಸಲು ದಿಲ್ಲಿ ಹೈಕೋರ್ಟ್‌ ಸೋಮವಾರ ತಾಕೀತು ಮಾಡಿದೆ.

ಬಹುಕೋಟಿ ರೂ. ತೆರಿಗೆ ವಂಚನೆ ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಎಸ್‌ ರವೀಂದ್ರ ಭಟ್‌ ಮತ್ತು ಎ ಕೆ ಚಾವ್ಲಾ ಒಳಗೊಂಡ ಪೀಠ, ಈ ಆದೇಶ ನೀಡಿದೆ. 10 ಕೋಟಿ ರೂ. ಠೇವಣಿ ಪೈಕಿ ಅರ್ಧದಷ್ಟು ಮೊತ್ತವನ್ನು ಮಾರ್ಚ್‌ 31ರೊಳಗೆ ಹಾಗೂ ಉಳಿದ ಹಣವನ್ನು ಏಪ್ರಿಲ್‌ 15ರೊಳಗೆ ಆದಾಯ ತೆರಿಗೆ ಇಲಾಖೆಗೆ ಸಲ್ಲಿಸುವಂತೆ ಪೀಠವು ನಿರ್ದೇಶನ ನೀಡಿದೆ.

2011-12ರ ಸಾಲಿನಲ್ಲಿ ಯಂಗ್‌ ಇಂಡಿಯನ್‌ ಕಂಪನಿಯಿಂದ ಒಟ್ಟು 249.15 ಕೋಟಿ ರೂ. ತೆರಿಗೆ ವಂಚನೆಯಾಗಿದೆ ಎಂದು ಆದಾಯ ತೆರಿಗೆ ಇಲಾಖೆ (ಐಟಿ) ಆರೋಪಿಸಿದೆ. ರಾಹುಲ್‌ ಗಾಂಧಿ ಈ ಸಂಸ್ಥೆಯ ಅಧ್ಯಕ್ಷರು. ಸದ್ಯದ ತನ್ನ ಆದೇಶ ಠೇವಣಿಗೆ ಮಾತ್ರ ಸೀಮಿತವಾಗಿದ್ದು, ವಂಚನೆ ಆರೋಪಕ್ಕೆ ಸಂಬಂಧಿಸಿದ ಮೊತ್ತ ವಸೂಲಿ ವಿಷಯದಲ್ಲಿ ಯಾವುದೇ ಬಲವಂತ ಮಾಡದಿರುವಂತೆ ನ್ಯಾಯಪೀಠ, ಐಟಿಗೆ ಸೂಚನೆ ನೀಡಿದೆ. ತನ್ನ ವಿರುದ್ಧ ಆರಂಭಿಸಿರುವ ಕಾನೂನು ಪ್ರಕ್ರಿಯೆ ಪ್ರಶ್ನಿಸಿ ಯಂಗ್‌ ಇಂಡಿಯನ್‌ ಕಂಪನಿ ಸಲ್ಲಿಸಿರುವ ಅರ್ಜಿಗೂ ಮನ್ನಣೆ ನೀಡಿರುವ ಹೈಕೋರ್ಟ್‌, ಮುಂದಿನ ವಿಚಾರಣೆಯೊಳಗೆ ಸೂಕ್ತ ಪ್ರತಿಕ್ರಿಯೆ ನೀಡುವಂತೆ ಐಟಿಗೆ ಸೂಚನೆ ರವಾನಿಸಿದೆ. ಮುಂದಿನ ವಿಚಾರಣೆ ಏ.24ರಂದು ನಡೆಯಲಿದೆ.

ಈ ಮೊದಲು, ನ್ಯಾಷನಲ್‌ ಹೆರಾಲ್ಡ್‌ ಆಸ್ತಿ ವಂಚನೆ ಪ್ರಕರಣದಲ್ಲಿ ರಾಹುಲ್‌ ಗಾಂಧಿ ಮತ್ತು ಸೋನಿಯಾ ಗಾಂಧಿ ಅವರನ್ನು ಆರೋಪಿಗಳೆಂದು ಪರಿಗಣಿಸಿ ಅಧೀನ ನ್ಯಾಯಾಲಯ ಸಮನ್ಸ್‌ ಜಾರಿ ಮಾಡಿತ್ತು. 249.15 ಕೋಟಿ ರೂಪಾಯಿ ತೆರಿಗೆ ವಂಚನೆ ಆರೋಪ ಯಂಗ್‌ ಇಂಡಿಯನ್‌ ಕಂಪನಿ ಮೇಲಿದೆ.

ಏನಿದು ಪ್ರಕರಣ?:

2010, ನವೆಂಬರ್‌ ತಿಂಗಳಲ್ಲಿ 50 ಕೋಟಿ ರೂ.ಮೂಲ ಬಂಡವಾಳದೊಂದಿಗೆ ಅಸ್ತಿತ್ವಕ್ಕೆ ಬಂದ ಯಂಗ್‌ ಇಂಡಿಯಾ, ಆ ಬಳಿಕ ನ್ಯಾಷನಲ್‌ ಹೆರಾಲ್ಡ್‌ ಪತ್ರಿಕೆ ಒಡೆತನದ ಅಸೋಸಿಯೇಟೆಡ್‌ ಜರ್ನಲ್‌ ಲಿಮಿಟೆಡ್‌ (ಎಜೆಎಲ್‌)ನ ಬಹುತೇಕ ಎಲ್ಲ ಸ್ವತ್ತುಗಳನ್ನು ಸ್ವಾದೀನಕ್ಕೆ ತೆಗೆದುಕೊಂಡಿತ್ತು. ಇವುಗಳ ನಡುವಿನ ಪರಭಾರೆ ಪ್ರಕ್ರಿಯೆ ಸಂದರ್ಭ ಸುಳ್ಳು ಲೆಕ್ಕ ತೋರಿಸುವುದರೊಂದಿಗೆ ಕೋಟ್ಯಂತರ ರೂ. ತೆರಿಗೆ ವಂಚನೆ ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಮುಖ್ಯ ಪಾಲುದಾರ ಎನಿಸಿದ ಗಾಂಧಿ ಕುಟುಂಬವು ಈ ವ್ಯವಹಾರದಲ್ಲಿ ಭಾರಿ ವಂಚನೆ ಎಸಗಿದೆ ಎಂದು ಬಿಜೆಪಿ ನಾಯಕ ಸುಬ್ರಮಣಿಯನ್‌ ಸ್ವಾಮಿ ದೂರಿದ್ದಾರೆ. ಐಟಿ ಪ್ರಕಾರ, ಈ ಕಂಪನಿಯಲ್ಲಿ ಸೋನಿಯಾ ಗಾಂಧಿ ಶೇ.83.3ರಷ್ಟು , ರಾಹುಲ್‌ ಗಾಂಧಿ ಶೇ.15.5ರಷ್ಟು ಹಾಗೂ ಉಳಿಕೆ 1.2ರಷ್ಟು ಷೇರನ್ನು ಆಸ್ಕರ್‌ ಫರ್ನಾಂಡೀಸ್‌ ಹೊಂದಿದ್ದಾರೆ.

Comments are closed.