ಪತ್ನಿಯ ಕೊಂದು ಆಕೆಯ ದೇಹವನ್ನು ಪತಿ ಮುಚ್ಚಿಟ್ಟಿದ್ದು ಎಲ್ಲಿ ಗೊತ್ತೇ…?

ನವದೆಹಲಿ: ಪತ್ನಿಯನ್ನು ಕೊಂದು ಬಳಿಕ ಆಕೆಯ ಶವವನ್ನು ಬೆಡ್ ಬಾಕ್ಸ್ ನಲ್ಲಿ ಮುಚ್ಚಿಟ್ಟಿದ್ದ ಆರೋಪಿ ಪತಿಯನ್ನು ಪೊಲೀಸರು ಬಂಧಿಸಿರುವ ಘಟನೆ ದೆಹಲಿಯ ತುಘಲಕಾಬಾದ್ ನಲ್ಲಿ ನಡೆದಿದೆ.

30 ವರ್ಷದ ಮರಿಯಾ ಪತಿಯಿಂದಲೇ ಕೊಲೆಯಾದ ದುರ್ದೈವಿ. ಈಗ ಆರೋಪಿ ಪತಿ ಸುರೇಶ್‍ನನ್ನು ಪೊಲೀಸರು ಬಂಧಿಸಿದ್ದಾರೆ. ಆರೋಪಿ ಸುರೇಶ್ ಬೇರೊಬ್ಬ ಹುಡುಗಿಯನ್ನು ಮದುವೆಯಾಗಿದ್ದನು. ಹೀಗಾಗಿ ಮೊದಲನೇ ಪತ್ನಿಯನ್ನು ಕೊಲೆ ಮಾಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.

ಸುರೇಶ್ ಬೇರೆ ಹುಡುಗಿಯ ಜೊತೆ ಮದುವೆಯಾಗಿದ್ದು, ಆಕೆಯ ಜೊತೆ ಜೀವನ ನಡೆಸಲು ಮೊದಲನೇ ಪತ್ನಿ ಮರಿಯಾ ಅಡ್ಡಿಯಾಗುತ್ತಾಳೆ ಎಂದು ಜನವರಿ 11 ರಂದು ಮರಿಯಾರನ್ನು ಕೊಂದು ತನ್ನ ರೂಮಿನ ಹಾಸಿಗೆಯ ಬಾಕ್ಸ್ ನಲ್ಲಿ ಹಾಕಿ ಮುಚ್ಚಿಟ್ಟಿದ್ದಾನೆ. ನಂತರ ಸುಮಾರು ದಿನಗಳಾದ ಮೇಲೆ ಪಕ್ಕದ ಮನೆಯವರಿಗೆ ಶವದ ವಾಸನೆ ಬಂದಿದೆ. ಹೀಗಾಗಿ ಅವರು ಮರಿಯಾ ಮನೆಗೆ ಬಂದು ನೋಡಿದಾಗ ಬಾಗಿಲು ಲಾಕ್ ಆಗಿತ್ತು. ಈ ಬಗ್ಗೆ ಆಕೆಯ ಸಹೋದರನಿಗೆ ಮಾಹಿತಿ ನೀಡಿದ್ದಾರೆ. ಬಳಿಕ ಪತಿಯೇ ಬೆಂಗಳೂರಿಗೆ ಹೋಗಿದ್ದಾಳೆ ಎಂದು ಮೆಸೇಜ್ ಮಾಡಿದ್ದಾನೆ.

ಆದ್ರೆ ನೆರೆ ಮನೆಯವರಿಗೆ ಅವನ ಮಾತಿನ ಮೇಲೆ ನಂಬಿಕೆ ಬಾರದೆ ಪೊಲೀಸ್ ಠಾಣೆಗೆ ಹೋಗಿ ದೂರು ನೀಡಿದ್ದಾರೆ. ಪೊಲೀಸರು ಜನವರಿ 29 ರಂದು ಬಂದು ಮನೆಯಲ್ಲಿ ಹುಡುಕಾಡಿದಾಗ ಹಾಸಿಗೆ ಬಾಕ್ಸ್ ನಲ್ಲಿ ಮರಿಯಾ ದೇಹ ಪತ್ತೆಯಾಗಿದೆ. ಬಳಿಕ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಆಸ್ಪತ್ರೆಗೆ ರವಾನಿಸಿದ್ದು, ಕೂಡಲೇ ಆರೋಪಿ ಪತಿಯನ್ನು ಪೊಲೀಸರು ಬಂಧಿಸಿದ್ದಾರೆ.