ದುಬೈ: ಎಲ್ಲೆಂದರಲ್ಲಿ ಕಸ ಎಸೆಯುವ ಮಂದಿ ಹೆಚ್ಚಿರುವ ಈ ಸಂದರ್ಭದಲ್ಲಿ 8 ವರ್ಷದ ಪುಟಾಣಿ ತ್ಯಾಜ್ಯದಿಂದ ಪರಿಸರಕ್ಕೆ ಎಷ್ಟು ಹಾನಿಯಿದೆ ಎಂಬುದನ್ನು ಗ್ರಹಿಸಿ ಬರೋಬ್ಬರು 15 ಟನ್‌ ಕಾಗದದ ತ್ಯಾಜ್ಯ ಸಂಗ್ರಹಿಸಿ ಎಲ್ಲರ ಮೆಚ್ಚುಗೆಗೆ ಪಾತ್ರಳಾಗಿದ್ದಾಳೆ.
ದುಬೈನಲ್ಲಿ ಪೋಷಕರ ಜತೆ ನೆಲೆಸಿರುವ ಭಾರತೀಯ ಮೂಲದ ನಿಯಾ ಟೋನಿ 15,000 ಕೆಜಿ ತೂಕದ ಪೇಪರ್‌ ತ್ಯಾಜ್ಯ ಸಂಗ್ರಹಿಸಿರುವುದಾಗಿ ಐಎಎನ್‌ಎಸ್‌ ವರದಿ ಮಾಡಿದೆ.
ಎಮಿರೇಟ್ಸ್‌ ಎನ್ವಿರಾನ್ಮೆಂಟ್‌ ಗ್ರೂಪ್‌ನ ರಾಷ್ಟ್ರೀಯ ಪುನರ್‌ ಬಳಕೆ ಅಭಿಯಾನದಲ್ಲಿ ಪಾಲ್ಗೊಂಡ ನಿಯಾ ಬರೋಬ್ಬರಿ 15 ಟನ್‌ ತ್ಯಾಜ್ಯಗಳನ್ನು ಸಂಗ್ರಹಿಸಿದ್ದಾರೆ. ಈ ಸಾಧನೆಗೆ ಎಮಿರೇಟ್ಸ್‌ ರಿಸೈಕ್ಲಿಂಗ್‌ ಅವಾರ್ಡ್‌ನ 22ನೇ ಎಡಿಷನ್‌ನಲ್ಲಿ ಗೌರವಿಸಲಾಗಿದೆ ಎಂದು ಖಲೀಜಾ ಟೈಮ್ಸ್‌ ವರದಿ ಮಾಡಿದೆ.
ಇಂಗಾಲದ ಡೈಆಕ್ಸೈಡ್‌ ಹೊರಹೊಮ್ಮುವುದನ್ನು ತಡೆಯುವ ನಿಟ್ಟಿನಲ್ಲಿ ಎಮಿರೇಟ್ಸ್‌ ಗ್ರೂಪ್‌ ಕೈಗೊಂಡ ಅಭಿಯಾನದಲ್ಲಿ ಬರೋಬ್ಬರಿ 73,393 ಮೆಟ್ರಿಕ್‌ ಟನ್‌ ತ್ಯಾಜ್ಯವನ್ನು ಸಂಗ್ರಹಿಸಲಾಗಿದೆ. ಇದರಲ್ಲಿ ಕಾಗದ, ಪ್ಲಾಸ್ಟಿಕ್‌, ಗಾಜು, ಕ್ಯಾನ್‌ಗಳು ಮತ್ತು ಮೊಬೈಲ್‌ ಫೋನ್‌ಗಳು ಸೇರಿವೆ.
ಈ ಪೈಕಿ ನಿಯಾ 14,914 ಕೆಜಿ ತ್ಯಾಜ್ಯ ಸಂಗ್ರಹಿಸಿ ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾಳೆ.
ನಾನು ವಸ್ತುಗಳ ಪುನರ್‌ ಬಳಕೆ ಬಗ್ಗೆ ನಾನಿದ್ದ ಪ್ರದೇಶದಲ್ಲಿ ನಿರಂತರವಾಗಿ ಅಭಿಯಾನ ನಡೆಸುತ್ತಿದ್ದೆ. ಪ್ರತಿಯೊಬ್ಬರ ಮನೆಗೆ ಹೋಗಿ ಕಾಗದ ತ್ಯಾಜ್ಯ, ಓದಿ ಮುಗಿದ ಪತ್ರಿಕೆ ಇತ್ಯಾದಿಗಳನ್ನು ಸಂಗ್ರಹಿಸಿ ತರುತ್ತಿದ್ದೆ ಎಂದು ಟೋನಿ ಖಲೀಜಾ ಟೈಮ್ಸ್‌ಗೆ ಪ್ರತಿಕ್ರಿಯಿಸಿದ್ದಾಳೆ.
Comments are closed.