ವರದಿ ಹಾಗೂ ಚಿತ್ರ : ಸತೀಶ್ ಕಾಪಿಕಾಡ್
ಮಂಗಳೂರು,ಮೇ.07: ಬ್ಲೆಂಡರ್‍ಸ್ ಪ್ರೈಡ್ ವತಿಯಿಂದ ನಗರದ ಪ್ರಸಿದ್ಧ ಹೋಟೆಲೊಂದರಲ್ಲಿ ಶುಕ್ರವಾರ ಅಯೋಜಿಸಲಾದ ಫ್ಯಾಷನ್ ಶೋ ಕಾರ್ಯಕ್ರಮದಲ್ಲಿ ಬಾಲಿವುಡ್ ನಟಿ ಕಲ್ಕಿ ಕೊಚಿಲಿನ್ ಭಾಗವಹಿಸುವ ಮೂಲಕ ಫ್ಯಾಷನ್ ಪ್ರಿಯರನ್ನು ರೋಮಾಂಚನಗೊಳಿಸಿದರು.
ಬ್ಲೆಂಡರ್‍ಸ್ ಪ್ರೈಡ್ ದೇಶದ ಎಂಟು ಮಹಾನಗರಗಳಲ್ಲಿ ವಿಶೇಷ ಸಂಗೀತಾ ಹಾಗೂ ಫ್ಯಾಷನ್ ಶೋ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದ್ದು, ಫೆಬ್ರವರಿಯಲ್ಲಿ ಜೈಪುರದಲ್ಲಿ ಇದು ಆರಂಭಗೊಂಡಿದೆ. ಇದೀಗ ಗುವಾಹಟಿ, ಭುವನೇಶ್ವರ, ನಾಗ್ಪುರ, ಇಂದೋರ್ ಪ್ರವಾಸ ಮುಗಿಸಿ ಮಂಗಳೂರಿಗೆ ಆಗಮಿಸಿರುವ ತಂಡ ಮಂಗಳೂರಿನಲ್ಲಿ ವಿಶೇಷ ಕಾರ್ಯಕ್ರಮವನ್ನು ಮುಗಿಸಿ, ಇದೀಗ ಚಂಡೀಘಢ ಮತ್ತು ಲುಧಿಯಾನದತ್ತ ತನ್ನ ಪ್ರವಾಸವನ್ನು ಮುಂದುವರಿಸಿದೆ.
Mob Pics..
ಮಂಗಳೂರಿನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ವಿಶೇಷ ಆಕರ್ಷಣೆಯಾಗಿ ಪಾಲ್ಗೊಂಡಿದ್ದ ಬಾಲಿವುಡ್ ನಟಿ ಕಲ್ಕಿ ಕೊಚಿಲಿನ್ ತಮ್ಮ ಕಾರ್ಯಕ್ರಮದ ಬಳಿಕ ಮಾದ್ಯಮದೊಂದಿಗೆ ತಮ್ಮ ಅನಿಸಿಕೆಯನ್ನು ಹಂಚಿಕೊಂಡರು. ಈ ವರ್ಷ ಎರಡು ಚಿತ್ರಗಳಲ್ಲಿ ತಾನು ನಟಿಸಿದ್ದಾಗಿ ತಿಳಿಸಿದ ಅವರು, , ‘ವೈಟಿಂಗ್’ ಈ ತಿಂಗಳಲ್ಲಿ ಬಿಡುಗಡೆಯಾಗಲಿದೆ. ಕೊಂಕಣ್ ಸೇನ್ ಅವರ ನಿರ್ದೇಶನದ ‘ಡೆತ್ ಇನ್ ಗಂಜ್’ ಚಿತ್ರದಲ್ಲೂ ತಾನು ನಟಿಸಿದ್ದು, ಈ ಚಿತ್ರದಲ್ಲಿ ತಾನು ಉತ್ತಮ ಪಾತ್ರವನ್ನು ನಿರ್ವಾಹಿಸಿರುವುದಾಗಿ ತಿಳಿಸಿದರು.
ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುವುದರಲ್ಲಿ ತಾನು ತುಂಬಾ ಚ್ಯೂಸಿ, ಚಿತ್ರ ಕಥೆ ಹಾಗೂ ಪಾತ್ರ ನೋಡಿಯೇ ತಾನು ಚಿತ್ರಗಳಲ್ಲಿ ನಟಿಸುತ್ತಿದ್ದೇನೆ.ಗಾಸಿಪ್‌ಗಳಿಗೆ ತಲೆಕೊಡುವುದಿಲ್ಲ ಎಂದು ಹೇಳಿದರು.
ಬಾಲಿವುಡ್‌ನಲ್ಲಿ ಮಹಿಳೆಯರಿಗೆ ಒಳ್ಳೆಯ ವಾತಾವರಣವಿದೆ. ಜೊತೆಗೆ ಹೊಸಬರಿಗೂ ಉತ್ತಮ ಅವಕಾಶ ನೀಡಲಾಗುತ್ತಿದೆ ಎಂದ ಅವರು, ಮಹಿಳೆಯರು ಸಮಸ್ಯೆಗಳನ್ನು ಎದುರಿಸಿ ಹೋರಾಡುವ ಮನೋಭಾವ ಬೆಳೆಸಿಕೊಂಡಾಗ ಮಾತ್ರ ಉತ್ತಮ ಸಾಧನೆ ಮಾಡಲು ಸಾಧ್ಯ ಎಂದು ಹೇಳಿದರು.
ತಾನು ಹುಟ್ಟಿಬೆಳೆದದ್ದು ತಮಿಳುನಾಡಿನಲ್ಲಾಗಿದ್ದರಿಂದ ತಮಿಳು ಚೆನ್ನಾಗಿ ಬರುತ್ತದೆ. ತನ್ನ ಫೋಷಕರು ಬೆಂಗಳೂರಿನಲ್ಲಿ ನೆಲೆಸಿದ್ದರಿಂದ ಕನ್ನಡ ಅರ್ಥವಾಗುತ್ತದೆ ಆದರೆ ಮಾತನಾಡಲು ಮಾತ್ರ ಕಷ್ಟವಾಗುತ್ತದೆ ಎಂದು ನಗುನಗುತ ಹೇಳಿದ ಅವರು,ಮಂಗಳೂರಿನ ಬೀಚ್ ಇಷ್ಟವಾಯಿತು. ಜೊತೆಗೆ ಇಲ್ಲಿಯ ಫಿಶ್ ಕರಿ ತುಂಬಾ ಇಷ್ಟವಾಯಿತು ಎಂದು ಹೇಳಿದರು.
ವರದಿ ಹಾಗೂ ಚಿತ್ರ : ಸತೀಶ್ ಕಾಪಿಕಾಡ್
