ಬೆಂಗಳೂರು ಮೂಲದ ಮೂವರು ವಿದ್ಯಾರ್ಥಿಗಳು ಸಮುದ್ರದಲ್ಲಿ ಮುಳುಗಿ ಮೃತ್ಯು | ಕುಂದಾಪುರದ ಗೋಪಾಡಿ‌ ಕಡಲಿನಲ್ಲಿ ದುರಂತ

ಕುಂದಾಪುರ: ಈಜಲು ತೆರಳಿದ್ದ ಬೆಂಗಳೂರು ಮೂಲದ 9 ಮಂದಿ ವಿದ್ಯಾರ್ಥಿಗಳ ಪೈಕಿ ಮೂವರು ಯುವಕರು ನೀರುಪಾಲಾದ ಘಟನೆ ತಾಲೂಕಿನ ಗೋಪಾಡಿ‌ ಗ್ರಾ.‌ಪಂ ವ್ಯಾಪ್ತಿಯ ಚರ್ಕಿಕಡು ಎಂಬಲ್ಲಿನ ಕಡಲ ತೀರದಲ್ಲಿ ಸೆ.7ರ ರವಿವಾರ ನಡೆದಿದೆ.

ಬೆಂಗಳೂರು ಮೂಲದ 10 ಮಂದಿ ಕಾಲೇಜು ವಿದ್ಯಾರ್ಥಿಗಳ ತಂಡದಿಂದ 9 ಮಂದಿ ಕಡಲಿಗಿಳಿದಿದ್ದು, ಈ ಪೈಕಿ ಮೂವರು ಸಮುದ್ರ ಅಲೆಗಳಿಗೆ ಸಿಕ್ಕು ನೀರಿನಲ್ಲಿ ಮುಳುಗಿ ಮೃತಪಟ್ಟಿದ್ದಾರೆ. ಗೌತಮ್ (19), ಲೋಕೇಶ್ (19), ಆಶೀಶ್ (18) ಮೃತರು. ನಿರೂಪ್ ಎನ್ನುವಾತನನ್ನು ಸ್ಥಳೀಯರಾದ ಉಮೇಶ್ ಪೂಜಾರಿ ಎನ್ನುವರು ರಕ್ಷಿಸಿದ್ದು ಗಂಭೀರ ಸ್ಥಿತಿಯಲ್ಲಿರುವ ನಿರೂಪ್ ಮಣಿಪಾಲ ಕೆ.ಎಂ.ಸಿ.ಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಘಟನೆ ವಿವರ: ಬೆಂಗಳೂರಿನ ವಿವಿದೆಡೆ ಕಾಲೇಜು ವಿದ್ಯಾಭ್ಯಾಸದಲ್ಲಿ ತೊಡಗಿಸಿಕೊಂಡ ತಂಡವು ಎಲ್ಲರಿಗೂ ಸಂಪರ್ಕದಲ್ಲಿದ್ದ ಸ್ನೇಹಿತನೊಬ್ಬನ ನೇತೃತ್ವದಲ್ಲಿ 10 ಮಂದಿ ಒಗ್ಗೂಡಿ ಉಡುಪಿ ಜಿಲ್ಲಾ ಪ್ರವಾಸ ಕೈಗೊಂಡಿದ್ದರು. ಸದರಂತೆ ಕಳೆದೆರಡು ದಿನಗಳ ಹಿಂದೆ ರೈಲಿನ ಮೂಲಕ ಉಡುಪಿಗೆ ಬಂದು ಉಡುಪಿ ಶ್ರೀಕೃಷ್ಣ ಮಠ, ಮಲ್ಪೆ‌ಬೀಚ್ ಮೊದಲಾದೆಡೆ ತಿರುಗಾಡಿ ಬಳಿಕ ಕುಂಭಾಶಿಯ ವಸತಿಗೃಹವೊಂದಕ್ಕೆ ಬಂದು ಕೊಠಡಿ ಬಾಡಿಗೆ ಪಡೆದಿದ್ದರು. ಗೌತಮ್, ಲೋಕೇಶ್, ಆಶೀಶ್, ನಿರೂಪ್, ಧನುಷ್, ಅಂಜನ್, ಕುಶಲ್, ರಾಹುಲ್, ಅನೀಶ್, ನಿತಿನ್ ಎನ್ನುವ 18-19 ಹರೆಯದ ಕಾಲೇಜ್ ಯುವಕರ ತಂಡ ಇದಾಗಿದ್ದು 10 ಮಂದಿ ರವಿವಾರ ಮೊಬೈಲ್ ಲೋಕೇಶನ್ ನೋಡಿ ತಮ್ಮ ರೂಮ್‌ನಿಂದ ನಡೆದು ಸಮುದ್ರ ತೀರಕ್ಕೆ ಸಾಗಿದ್ದರು. ಇವರಲ್ಲಿ ಅಂಜನ್ ಸಮುದ್ರಕ್ಕಿಳಿಯದೆ ವಾಪಾಸ್ಸಾಗಿದ್ದು ಉಳಿದ 9 ಮಂದಿ ನೀರಿಗೆ ಇಳಿದಿದ್ದರು. ಈ ವೇಳೆ ಅಲೆಗಳ ಅಬ್ಬರಕ್ಕೆ ಸಿಕ್ಕಿ ಮುಳುಗಿದ್ದು ದಡದ ಸಮೀಪವೇ ಇದ್ದ ಇಬ್ಬರು ಮೇಲೆ ಬಂದು ಮತ್ತಿಬ್ಬರನ್ನು ರಕ್ಷಿಸಿದ್ದಾರೆ. ಇನ್ನೋರ್ವನನ್ನು ಉಮೇಶ್ ಪೂಜಾರಿ ರಕ್ಷಿಸಿದ್ದು ಅಸ್ವಸ್ಥಗೊಂಡ ಯುವಕನಿಗೆ ಚಿಕಿತ್ಸೆ ಕೊಡಿಸಲಾಗುತ್ತಿದೆ. ನೀರುಪಾಲಾದ ಮೃತದೇಹಗಳನ್ನು ಪತ್ತೆ ಮಾಡುವಲ್ಲಿ ತಕ್ಷಣ ಕಾರ್ಯಪ್ರವೃತ್ತರಾದ ಮುಳುಗು ತಜ್ಞ ಈಶ್ವರ್ ಮಲ್ಪೆ ಹಾಗೂ ಸ್ಥಳೀಯರು‌ ಸಹಕರಿಸಿದ್ದು ಹೀಗಾಗಿ ಮೃತದೇಹ ನೀರುಪಾಲಾಗುದು ತಪ್ಪಿದಂತಾಗಿದೆ. ಅಗ್ನಿ ಶಾಮಕದಳ ಹಾಗೂ ಪೊಲೀಸರು ಇದ್ದರು. ಮೂರು ಮೃತದೇಹಗಳನ್ನು ಹೆಚ್ಚಿನ ಮರಣೋತ್ತರ ಪರೀಕ್ಷೆಗಾಗಿ ಮಣಿಪಾಲ ಕೆ.ಎಂ.ಸಿ. ಆಸ್ಪತ್ರೆಗೆ ರವಾನಿಸಲಾಗಿದೆ. ಕರಾವಳಿ ಪ್ರವಾಸ ಮುಗಿಸಿ ಈ ಯುವಕರ ತಂಡ ರವಿವಾರ ಸಂಜೆ ವಾಪಾಸ್ ಬೆಂಗಳೂರಿಗೆ ರೈಲು ಟಿಕೆಟ್ ಬುಕ್ ಮಾಡಿದ್ದರು ಎಂದು ತಿಳಿದುಬಂದಿದೆ.

ಘಟನಾ ಸ್ಥಳಕ್ಕೆ ಕುಂದಾಪುರ ಶಾಸಕ ಎ. ಕಿರಣ್ ಕುಮಾರ್ ಕೊಡ್ಗಿ, ಡಿವೈಎಸ್ಪಿ ಎಚ್.ಡಿ. ಕುಲಕರ್ಣಿ, ಠಾಣೆ ಪ್ರಭಾರ ಪೊಲೀಸ್ ನಿರೀಕ್ಷಕ ಜಯರಾಮ್ ಗೌಡ, ಪಿಎಸ್ಐಗಳಾದ ನಂಜಾ ನಾಯ್ಕ್, ನೂತನ್ ಗೌಡ, ಕರಾವಳಿ ಕಾವಲು ಪಡೆ ಪೊಲೀಸರು, ಕೆ.ಎನ್.ಡಿ ಸಿಬ್ಬಂದಿಗಳು ಭೇಟಿ ನೀಡಿದ್ದಾರೆ. ಗೋಪಾಡಿ ಗ್ರಾ.ಪಂ ಅಧ್ಯಕ್ಷ ಸುರೇಶ್ ಶೆಟ್ಟಿ, ಸದಸ್ಯ ಪ್ರಕಾಶ್ ಮೊದಲಾದವರಿದ್ದರು.

ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಈ ಬಗ್ಗೆ ಪ್ರಕರಣ ದಾಖಲಾಗಿದೆ.