ಮೊತ್ತ ಮೊದಲಾಗಿ ಪತ್ನಿಯನ್ನು ಗೌರವಿಸಿ. ನಿಮ್ಮಿಂದ ತಾಳಿಕಟ್ಟಿಸಿಕೊಂಡು ಅದುವರೆಗೂ ಎರಡು ದಶಕಗಳ ಕಾಲ ಹುಟ್ಟಿ ಬೆಳೆದಮನೆ, ತಂದೆ-ತಾಯಿ, ಅಣ್ಣ-ತಮ್ಮ, ತಂಗಿ-ಬಂಧುಗಳನ್ನೆಲ್ಲ ಬಿಟ್ಟು ನಿಂತ ಕಾಲಲ್ಲೆ ನಿಮ್ಮನ್ನು ನಂಬಿ ಹೊರಡುವ, ನಿಮ್ಮ ಮನೆಯ ಹೊಸಿಲ ಮೇಲಿನ ಸೇರನ್ನು ಒದ್ದು ಬಲಗಾಲಿಟ್ಟು ಒಳಬರುವ ಗೃಹಲಕ್ಷ್ಮಿಯನ್ನು ಅರ್ಥ ಮಾಡಿಕೊಂಡು ಅವಳಿಗೆ ಪ್ರೀತಿ ನೀಡಿ. ಅತಿಥಿಗಳು, ಗೆಳೆಯರೆದುರು ಅವಳನ್ನು ಟೀಕಿಸದಿರಿ.
ಆಫೀಸಿನಲ್ಲಿ ಕೆಲಸದ ಒತ್ತಡ, ಬಳಲಿದ್ದೀರಾ? ಮನೆಗೆ ಬಂದು ಸಿಡಿಸಿಡಿ ಎನ್ನಬೇಡಿ. ಅವಳು ನಿಮಗಾಗಿ ಬೆಳಗಿನಿಂದ ಕಾದು ಹಲವು ಆಸೆ ಹೊತ್ತು ಕಾಫಿ ಹಿಡಿದು ನಿಂತಿರುತ್ತಾಳೆ. ಬರುವಾಗ ಅಭಿರುಚಿ ಹೋಟೆಲಿನಲ್ಲಿ ಮಸಾಲೆದೋಸೆ ಕಟ್ಟಿಸಿ ತನ್ನಿ. ಜೊತೆಗೊಂದು ಮೈಸೂರು ಮಲ್ಲಿಗೆ ದಂಡೆಯೂ ಇರಲಿ. ಹೆಣ ್ಣನ ಮನಗೆಲ್ಲಲು ಹೂವು, ಮಸಾಲೆದೋಸೆಗಿರುವಷ್ಟು ಶಕ್ತಿ ಯಾವುದೇ ಅಣ್ವಸ್ತ್ರಕ್ಕೂ ಇಲ್ಲ. ಆಗಾಗ ಬೆಳಿಗ್ಗೆ ಅವಳು ಏಳುವುದಕ್ಕೆ ಮೊದಲೇ ಹಬೆಯಾಡುವ ಕಾಫಿ ಹಿಡಿದು ಅವಳನ್ನು ಎಬ್ಬಿಸಿ ಹಣೆಗೆ ಹೂಮುತ್ತು ಕೊಡಿ. ಮುಂದೆ ನೋಡಿ. ಎಳೆಬಿಸಿಲ ಸೂರ್ಯನೂ ನಾಚಿಯಾನು. ವೀಕೆಂಡ್‌ನಲ್ಲಿ ಪತ್ನಿಯನ್ನು ಅಡುಗೆ, ತಿಂಡಿಗೆ ಸೀಮಿತಗೊಳಿಸಬೇಡಿ. ಹೋಟೆಲ್‌, ಸಿನಿಮಾ ಅಂತೆಲ್ಲ ಸುತ್ತಾಡಿ. ಪ್ರತಿ 2 ತಿಂಗಳಿಗೊಂದು ಸೀರೆ, ವರ್ಷಕ್ಕೊಮ್ಮೆ 100ಗ್ರಾಂ ಬಂಗಾರ ಕೊಡಿಸಿ. ಸೀರೆ, ಬಂಗಾರ ನಿಮ್ಮಿಷ್ಟದಂತೆ ಆರಿಸಬೇಡಿ. ಯಾವುದೇ ಪತ್ನಿಗೆ ಗಂಡನ ಸೀರೆ, ಬಂಗಾರದ ಸೆಲೆಕ್ಷ ನ್‌ ತೃಪ್ತಿಯಾಗುವುದಿಲ್ಲ. ಆಯ್ಕೆ ಅವಳದು. ಆಗಾಗ ಪತ್ನಿಯನ್ನು ತವರು ಮನೆಗೆ ಕಳಿಸುತ್ತಿರಿ. ಅವಳು ಹೊರಡುವ ಮುನ್ನ ‘ಚಿನ್ನಾ, ನಿನ್ನನ್ನು ಬಿಟ್ಟು ಹೇಗಿರಲಿ?’ ಎಂದು ಕಣ್ಣೆರೆಸಿಕೊಂಡಂತೆ ಮಾಡಿ. ಹೆಂಡತಿ ಫಿದಾ ಆಗಿ ಬಿಡುತ್ತಾಳೆ.
ಎರಡು ವಾರದ ಪ್ರವಾಸದ ಬದಲು ಒಂದೇ ವಾರಕ್ಕೆ ಹಿಂತಿರುಗುತ್ತಾಳೆ. ವಾಪಾಸ್‌ ಬರುವ ದಿನ ಬಸ್‌ ನಿಲ್ದಾಣದಲ್ಲಿ ಹಾಜರಿರಿ. ನಿತ್ಯ ಮೊಬೈಲಿನಲ್ಲಿ ಮಾತನಾಡುವುದನ್ನು ಮರೆಯಬೇಡಿ. ಅತ್ತೆ, ಮಾವ, ನಾದಿನಿ ಮತ್ತಿತರೆ ಯಾರೇ ಹೆಂಡತಿಯ ಕಡೆಯವರು ಬಂದರೆ ಚೆನ್ನಾಗಿ ಉಪಚರಿಸಿ. ನಿಮ್ಮ ಸ್ಮಾರ್ಟ್‌ಫೋನ್‌ನಲ್ಲಿ ಮರೆತು ಕೂಡ ನಿಮ್ಮ ಕಾಲೇಜ್‌ಮೇಟ್‌ಗಳ, ಗರ್ಲ್‌ಫ್ರೆಂಡ್ಸ್‌ಗಳ ನಂಬರ್‌, ಭಾವಚಿತ್ರ ಇಟ್ಟುಕೊಳ್ಳಬೇಡಿ. ವಾಟ್ಸಪ್‌ನಲ್ಲಿ ಯಾವುದೋ ಹೆಸರಿನಲ್ಲಿರಲಿ. ಆಕ್ಷೇಪಾರ್ಹ ಮೆಸೇಜ್‌ಗಳಿದ್ದಲ್ಲಿ ಲಗುಬಗೆ ಡಿಲೀಟ್‌ ಮಾಡಿಕೊಳ್ಳಿ. ಯಾಕಪ್ಪಾ ಅಂದ್ರೆ ಸಂಶಯಕ್ಕೆ ಮತ್ತೊಂದು ಹೆಸರೇ ಹೆಣ್ಣು! ನೀವು ಸ್ನಾನ ಮಾಡಿ ಬರುವಷ್ಟರಲ್ಲಿ ನಿಮ್ಮ ಫೋನ್‌ನಲ್ಲಿ ಗೂಢಚರ್ಯೆ ನಡೆದಿರುತ್ತದೆ. ಪತ್ನಿಯ ನೂರಾರು ಪ್ರಶ್ನೆಗಳಿಗೆ ಉತ್ತರಿಸಲು ಸಿದ್ಧರಿರಬೇಕಾಗುತ್ತದೆ. ನಿಮ್ಮ ಸ್ವಾರ್ಟ್‌ಫೋನಿನಲ್ಲಿ . ಪತ್ನಿಯ ಹೆಸರನ್ನು ಹೀಗೆ ಫೀಡ್‌ ಮಾಡಿಕೊಳ್ಳಿ – ಬಂಗಾರಿ, ಸ್ವೀಟಿ, ಚಿನ್ನಾರಿ, ಮೈಲವ್‌, ಇತರೆ, ಇತರೆ. ಪತ್ನಿಯ ಹೆಸರಿನಲ್ಲಿ ಬ್ಯಾಂಕ್‌ ಖಾತೆಯಲ್ಲಿ ಸಾಧ್ಯವಾದಷ್ಟೂ ಹಣ ಜಮಾ ಇರಲಿ. ಇದರಿಂದ ನಿಮ್ಮ ಅರ್ಧಾಂಗಿಗೂ ಜೀವನ ಭದ್ರತೆ ಇರುತ್ತದೆ.
ಅಯ್ಯೋ, ಬೆಳಿಗ್ಗೆ ಉಪ್ಪಿಟ್ಟಿಗೆ ಉಪ್ಪೇ ಹಾಕಿರಲಿಲ್ಲ. ಕಾಫಿ ಕಹಿ ಕಹಿಯಾಗಿತ್ತು. ಈಗ ಸಾರಿಗೆ ಕಾರಜಾಸ್ತಿ. ಹೀಗಾದರೆ ಹೇಗೆ? ಅಷ್ಟಕ್ಕೆಲ್ಲ ಮನೆಯಾಕೆಗೆ ಬಾಯಿಗೆ ಬಂದಂತೆ ಬಯ್ಯಬೇಡಿ. ಬದಲಾಗಿ ‘ಅನ್ನಪೂರ್ಣೆ ಕಣೇ ನೀನು ಎಲ್ಲಿಂದ ಕಲಿತೆಯೇ ಈ ರುಚಿರುಚಿ ಅಡುಗೆಯನ್ನ? ನಿಮ್ಮಮ್ಮನಿಗೆ ಮೊದಲು ಥ್ಯಾಂಕ್ಸ್‌ ಹೇಳಬೇಕು’ ಎಂದು ನೋಡಿ. ಮರುದಿನದಿಂದ ಈ ಅವಗುಣಗಳೆಲ್ಲ ಸುಗುಣಗಳಾಗಿ ಹೊಟ್ಟೆ ಬಿರಿಯೆ ಊಟ ನಿಮ್ಮದಾಗುತ್ತದೆ. ಮಕ್ಕಳಾದ ನಂತರ ಅವರ ಆಟ-ಪಾಟ, ಊಟ-ನೋಟ, ಬೆಳಿಗ್ಗೆ ಹಲ್ಲುಜ್ಜಿಸುವುದರಿಂದ ಹಿಡಿದು ಶಾಲಾ ಬಸ್‌ ಹತ್ತಿಸುವವರೆಗೂ ಪತ್ನಿಗೆ ಸಹಾಯಮಾಡಿ. ಎರಡು ಕೈಗಳಿಗಿಂತ ನಾಲ್ಕು ಕೈ ಮೇಲಲ್ಲವೇ? ಅಡುಗೆಯಲ್ಲಿಯೂ ಸಹಾಯ ಮಾಡಿ. ವರ್ಷಕ್ಕೊಮ್ಮೆ ದೂರದ ಪ್ರವಾಸ ಹೋಗಿ ಚಕ್ರವಾಕ ಪಕ್ಷಿಗಳಂತೆ ವಿಹರಿಸಿ ಬನ್ನಿ.
Comments are closed.