ರಾಷ್ಟ್ರೀಯ

ಮನುಷ್ಯನ ಮುಖವನ್ನು ಹೋಲುವ ಈ ಪ್ರಾಣಿಯನ್ನು ನೀವು ಎಲ್ಲಿಯಾದರೂ ಕಂಡಿದ್ದೀರಾ…? ಈ ಫೋಟೋವಿನ ಹಿಂದಿರುವ ಸತ್ಯಾಸತ್ಯತೆ ಏನು..?

Pinterest LinkedIn Tumblr

ನವದೆಹಲಿ: ಮನುಷ್ಯನ ಮುಖವನ್ನು ಹೋಲುವ ಈ ಪ್ರಾಣಿಯನ್ನು ನೀವು ಎಲ್ಲಿಯಾದರೂ ಕಂಡಿದ್ದೀರಾ…? ಈ ಫೋಟೋ ಸಾಮಾಜಿಕ ತಾಣಗಳಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಪ್ರಾಣಿಯ ಬಗ್ಗೆ ಜನ ಭಯ ಭೀತರಾಗುತ್ತಿದ್ದಾರೆ.

ಆದರೆ ಮಾನವನ ಮುಖ ಹೋಲುವ ನಾಲ್ಕು ಕಾಲುಗಳ ವಿಚಿತ್ರ ಪ್ರಾಣಿ ಇರುವುದಾದರೂ ನಿಜಾನಾ…? ಇದೊಂದು ಅಪಾಯಕಾರಿ ಪ್ರಾಣಿ ಎಂದು ಹೇಳಲಾಗಿದೆ. ಕೆಲ ನೆಟ್ಟಿಗರು ಇದೊಂದು ಏಲಿಯನ್​ ಇರಬಹುದು ಎಂದು ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ….ಅಷ್ಟಕ್ಕೂ ಸಾಮಾಜಿಕ ತಾಣಗಳಲ್ಲಿ ಹರಿದಾಡುತ್ತಿರುವ ಸುದ್ದಿಯ ಸತ್ಯಾಸತ್ಯತೆ ಏನು…?

ಹಿತೇಶ್​ ಭಟಿ ಎಂಬ ಟ್ವಿಟರ್​​ ಬಳಕೆದಾರರು ವಿಚಿತ್ರ ಜೀವಿಯ ಫೋಟೋವನ್ನು ಪೋಸ್ಟ್​ ಮಾಡಿಕೊಂಡು, ಯಾರಿಗಾದರೂ ಈ ಪ್ರಾಣಿಯ ಬಗ್ಗೆ ಗೊತ್ತಿದೆಯೇ? ಎಂದು ಪ್ರಶ್ನಿಸಿದ್ದಾರೆ. ಇದೇ ಫೋಟೋವನ್ನು ದೀಪಕ್​ ಅಶರ್​ ಎಂಬ ಫೇಸ್​ಬುಕ್​ ಬಳಕೆದಾರ ಶೇರ್​ ಮಾಡಿಕೊಂಡಿದ್ದು, ಸೆಪ್ಟೆಂಬರ್ 2ರಂದು ಈ ಪ್ರಾಣಿ ಕಾಣಿಸಿಕೊಂಡಿತು. ಇದು ಏಲಿಯನಾ? ಎಂದು ಪ್ರಶ್ನಿಸಿದ್ದಾರೆ. ಇದೀಗ ಪೋಸ್ಟ್​ ಡಿಲೀಟ್​ ಮಾಡಲಾಗಿದೆ.

ತೆಲುಗು ಮಾಧ್ಯಮವೊಂದು ಸಹ ಸುಳ್ಳು ವರದಿಯನ್ನು ಮಾಡಿ, ತೆಲಂಗಾಣದ ಜಗತಿಯಲ್ ಜಿಲ್ಲೆಯ ಗೊಲ್ಲಪಲ್ಲಿ ಗ್ರಾಮದ ಸುತ್ತಲೂ ಈ ವಿಚಿತ್ರ ಪ್ರಾಣಿ ತಿರುಗಾಡುತ್ತಿದೆ ಎಂದು ಹೇಳಿದೆ.

ಇದರ ಸತ್ಯಾಸತ್ಯತೆ ಏನು…?
ವೈರಲ್​ ಫೋಟೋ ಹಿಂದಿನ ಅಸಲಿಯತ್ತು ಏನೆಂಬುದನ್ನು ತಿಳಿಯಲು ನ್ಯೂಸ್​ ಮೀಟರ್​ ವೆಬ್​ಸೈಟ್​ ಫ್ಯಾಕ್ಟ್​ಚೆಕ್​ ನಡೆಸಿದಾಗ ಪ್ರಾಣಿ ಕುರಿತು ಹರಿದಾಡುತ್ತಿರುವ ಸುದ್ದಿ ಸುಳ್ಳು ಎಂಬುದು ಬಯಲಾಗಿದೆ. ಗೂಗಲ್​ ರಿವರ್ಸ್​ ಸರ್ಚ್​ ಇಂಜಿನ್​ ಸಹಾಯದಿಂದ ಫೋಟೋವನ್ನು ಹುಡುಕಾಡಿದಾಗ “ಲೈರಾ ಮಾಗನುಕೊ ಅವರಿಂದ ನಂಬಲಾಗದ ತೆವಳುವ ಹೈಪರ್ ರಿಯಲಿಸ್ಟಿಕ್ ಕ್ರಿಯೇಚರ್ಸ್” ಎಂಬ ಬ್ಲಾಗ್​ನಲ್ಲಿ ಇದೇ ಪ್ರಾಣಿಯ ಫೋಟೋವನ್ನು ಬಳಸಿಕೊಳ್ಳಲಾಗಿದೆ.

ಅಂದಹಾಗೆ ಲೈರಾ ಮಾಗನುಕೊ ಅವರು ಇಟಲಿಯ ಮಿಲನ್ ನಗರದ ಹೈಪರ್-ರಿಯಲಿಸ್ಟಿಕ್​ ಸಿಲಿಕಾನ್ ಶಿಲ್ಪಿಯಾಗಿದ್ದಾರೆ. ತಮ್ಮ ಜೀವನಚರಿತ್ರೆಯಲ್ಲಿ ಹೇಳಿರುವ ಪ್ರಕಾರ ಹಲವಾರು ಪ್ರಯೋಗಗಳ ಬಳಿಕ ನನ್ನ ಶಿಲ್ಪಗಳನ್ನು ದೃಷ್ಟಿಗೋಚರವಾಗಿ ಮತ್ತು ಸ್ಪರ್ಶಕ್ಕೆ ಹೆಚ್ಚು ನೈಜವಾಗಿಸುವ ಸಾಮರ್ಥ್ಯ ಸಿಲಿಕಾನ್​ಗಿದೆ ಎಂಬ ತೀರ್ಮಾನಕ್ಕೆ ಬಂದಿದ್ದೇನೆ ಎಂದು ಬರೆದುಕೊಂಡಿದ್ದಾರೆ.

ಹೀಗಾಗಿ ವೈರಲ್​ ಆಗಿರುವ ಚಿತ್ರವು ನೈಜವಾದುದ್ದಲ್ಲ. ಅದನ್ನು ಸಿಲಿಕಾನ್​ನಿಂದ ಮಾಡಲಾಗಿದೆ. ಲೈರಾ ಮಾಗನುಕೊ ಅವರು ತಮ್ಮ ಶಿಲ್ಪಗಳಿಗೆ ಸಿಲಿಕಾನ್​ ಮೂಲಕ ಹೆಚ್ಚು ರಿಲಯಲಿಸ್ಟಿಕ್​ ಲುಕ್​ ನೀಡುತ್ತಾರೆ. ಅಂದಹಾಗೆ ವೈರಲ್​ ಆಗಿರುವ ಶಿಲ್ಪಕಲೆಯನ್ನು ಅಮೆರಿಕ ಎಟ್ಸಿಯಲ್ಲಿ 8,088.64 ಡಾಲರ್​ ಮಾರಾಟಕ್ಕೆ ಇಡಲಾಗಿದೆ ಮತ್ತು ಶಿಲ್ಪಕ್ಕೆ ‘ಅರ್ಮಡಿಲೊ’ ಎಂದು ಹೆಸರಿಸಲಾಗಿದೆ.

ಇನ್ನು ಲೈರಾ ಮಾಗನುಕೊ ಅವರ ಇನ್​ಸ್ಟಾಗ್ರಾಂ ಖಾತೆಯಲ್ಲೂ ಇದೇ ಫೋಟೋವನ್ನು ಜುಲೈ 2019ರಲ್ಲಿ ಪೋಸ್ಟ್​ ಮಾಡಲಾಗಿದೆ. ಹೀಗಾಗಿ ಸದ್ಯ ಹರಿದಾಡುತ್ತಿರುವ ಸುದ್ದಿಗೂ ಫೋಟೋಗೂ ಯಾವುದೇ ಸಂಬಂಧವಿಲ್ಲ ಎಂಬುದು ಇದರಿಂದಲೇ ಗೊತ್ತಾಗುತ್ತದೆ.

Comments are closed.