ಗೋಏರ್ ವಿಮಾನ ಸೇವೆ ಆರಂಭ: ಮಂಗಳೂರು – ಮುಂಬೈ ಮಧ್ಯೆ ಪ್ರತಿದಿನ ನೇರ ವಿಮಾನ ಸೌಲಭ್ಯ

ಮಂಗಳೂರು: ಭಾರತದ ಅತ್ಯಂತ ವಿಶ್ವಾಸಾರ್ಹ ಏರ್‍ಲೈನ್ ಸಂಸ್ಥೆಯಾದ ಗೋಏರ್ ತನ್ನ ದೇಶೀಯ ಜಾಲವನ್ನು ಮತ್ತಷ್ಟು ಬಲಪಡಿಸಲು ನಿರ್ಧರಿಸಿದ್ದು, ಮುಂಬೈನಿಂದ ಮಂಗಳೂರಿಗೆ ಪ್ರತಿದಿನ ನೇರ ವಿಮಾನ ಸೌಲಭ್ಯವನ್ನು ಆರಂಭಿಸಿದೆ.

ಗುರುವಾರ (ಡಿ. 24) ದಿಂದ ಹೊಸ ಸೇವೆ ಆರಂಭವಾಗಿದ್ದು, ಅತ್ಯಾಧುನಿಕ ಏರ್‍ಬಸ್ 320ನಿಯೋ ಮೂಲಕ ಗೋಏರ್ ಮಂಗಳೂರು ಮತ್ತು ಮುಂಬೈಯನ್ನು ಸಂಪರ್ಕಿಸಲಿದೆ.

ಮಂಗಳೂರಿಗೆ ತ್ವರಿತ ಮತ್ತು ಅನುಕೂಲಕರ ಸಂಪರ್ಕವನ್ನು ಒದಗಿಸುವ ದೃಷ್ಟಿಯಿಂದ ಈ ವಿಮಾನದ ವೇಳಾಪಟ್ಟಿಯನ್ನು ಸಿದ್ಧಪಡಿಸಲಾಗಿದೆ. ಈ ವಿಮಾನ ಪ್ರಯಾಣದ ಟಿಕೆಟ್ ಬುಕ್ಕಿಂಗ್ ಅನ್ನು ಎಲ್ಲ ಕಾಯ್ದಿರಿಸುವಿಕೆ ಚಾನಲ್‍ಗಳ ಮೂಲಕ ಮಾಡಲು ಅವಕಾಶವಿದೆ ಎಂದು ಗೋಏರ್‍ನ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ ಕೌಶಿಕ್ ಖೋನಾ ವರ್ಚುವಲ್ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಗೋಏರ್ ವಿಮಾನ ಜಿ8 0338 ಬೆಳಿಗ್ಗೆ 9.30ಕ್ಕೆ ಮಂಗಳೂರಿನಿಂದ ಹೊರಟು, 11.00 ಗಂಟೆಗೆ ಮುಂಬೈ ತಲುಪಲಿದೆ. ಅಂತೆಯೇ ಜಿ8 0335 ವಿಮಾನ ಮುಂಬೈನಿಂದ 7.40ಕ್ಕೆ ಹೊರಟು 9.00 ಗಂಟೆಗೆ ಮಂಗಳೂರು ತಲುಪಲಿದೆ.

ದೇಶದಲ್ಲಿ ಅತಿವೇಗವಾಗಿ ಬೆಳೆಯುತ್ತಿರುವ ಹಾಗೂ ಕರ್ನಾಟಕದ ಪ್ರಮುಖ ಬಂದರು ನಗರವಾಗಿರುವ ಮಂಗಳೂರು ಮತ್ತು ಮುಂಬೈನ ವ್ಯವಹಾರ ಮತ್ತು ಪ್ರವಾಸೋದ್ಯಮ ಇನ್ನಷ್ಟು ಪ್ರಗತಿ ಹೊಂದಲು ಇದು ಪೂರಕವಾಗಲಿದೆ ಎಂದು ಅವರು ತಿಳಿಸಿದ್ದಾರೆ.

ದೇಶದ ಕಾಫಿ ಮತ್ತು ಗೋಡಂಬಿ ರಫ್ತಿನ ಶೇಕಡ 75ನ್ನು ನಿರ್ವಹಿಸುತ್ತಿದೆ. ಕರ್ನಾಟಕದ ಪ್ರವೇಶದ್ವಾರ ಮತ್ತು ಹಲವು ರಾಸಾಯನಿಕ ಕಾರ್ಖಾನೆಗಳ ತವರೂರಾಗಿರುವ ಈ ನಗರದ ಆರ್ಥಿಕತೆಯು ಕೈಗಾರಿಕೆ, ವಾಣಿಜ್ಯ ಮತ್ತು ಕೃಷಿ ಸಂಸ್ಕರಣೆ ಘಟಕಗಳನ್ನೂ ಹೊಂದಿದ್ದು, ದೇಶದ ವಾಣಿಜ್ಯ ರಾಜಧಾನಿಯಾದ ಮುಂಬೈ ಜತೆಗೆ ನೇರ ಹಾಗೂ ಕ್ಷಿಪ್ರ ಸಂಪರ್ಕ ಸಾಧ್ಯವಾಗುವ ಹಿನ್ನೆಲೆಯಲ್ಲಿ ವ್ಯಾಪಾರ- ವ್ಯವಹಾರಕ್ಕೆ ಉತ್ತೇಜನ ದೊರೆಕಲಿದೆ ಎಂದು ಅವರು ಈ ವೇಳೆ ಅಭಿಪ್ರಾಯಪಟ್ಟರು.

“ದೇಶೀಯ ವಿಮಾನ ಯಾನ ಬೇಡಿಕೆಯ ಪುನಶ್ಚೇತನ ಕಂಡುಬರುತ್ತಿದ್ದು, ಕಳೆದ ತಿಂಗಳಿಗೆ ಹೋಲಿಸಿದರೆ ಈ ತಿಂಗಳು ಶೇಕಡ 10ರಷ್ಟು ಪ್ರಯಾಣಿಕರ ಸಂಖ್ಯೆ ಹೆಚ್ಚಿದ್ದು, ನವೆಂಬರ್ 2020ರ ವೇಳೆಗೆ ಸುಮಾರು 63.54 ಲಕ್ಷ ತಲುಪಿದೆ. ಈ ಬೇಡಿಕೆಗೆ ಸ್ಪಂದಿಸಿ, ಮುಂಬೈನಿಂದ ಮಂಗಳೂರಿಗೆ ದೈನಿಕ ನೇರ ವಿಮಾನ ಸೇವೆ ಆರಂಭಿಸಲಾಗುತ್ತಿದೆ ಎಂದು ಹೇಳಿದರು.