ಲಂಡನ್: ಕ್ರಿಕೆಟ್ ಜನಕ ಇಂಗ್ಲೆಂಡ್ ಚೊಚ್ಚಲ ವಿಶ್ವಕಪ್ ಪ್ರಶಸ್ತಿಗೆ ಮುತ್ತಿಕ್ಕಿದೆ. ಭಾನುವಾರ ನಡೆದ ರೋಚಕ ಫೈನಲ್ ಮುಖಾಮುಖಿಯಲ್ಲಿ ನ್ಯೂಜಿಲೆಂಡ್ ತಂಡದ ವಿರುದ್ಧ ಎರಡೆರಡು ಬಾರಿ ಟೈ ಫಲಿತಾಂಶದಲ್ಲಿ ಅಂತ್ಯಗೊಂಡ ಪಂದ್ಯದಲ್ಲಿ ಅತಿ ಹೆಚ್ಚು ಬೌಂಡರಿ ಗಳಿಸಿದ ಆಧಾರದಲ್ಲಿ ಇಂಗ್ಲೆಂಡ್ ತಂಡವನ್ನು ವಿಜಯಿಯೆಂದು ಘೋಷಿಸಲಾಯಿತು.
ನ್ಯೂಜಿಲೆಂಡ್ ಒಡ್ಡಿದ 241 ರನ್ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ ನಿಗದಿತ 50 ಓವರ್‌ಗಳಲ್ಲಿ ಅಷ್ಟೇ ರನ್‌ಗಳಿಗೆ ಆಲೌಟ್ ಆಗುವ ಮೂಲಕ ರೋಚಕ ಟೈನಲ್ಲಿ ಅಂತ್ಯಕಂಡಿತ್ತು.
ಕೊನೆಯ ಓವರ್‌ನಲ್ಲಿ ಬೆನ್ ಸ್ಟೋಕ್ಸ್ ಪಂದ್ಯದ ಚಿತ್ರಣವನ್ನೇ ಬದಲಾಯಿಸಿದರು. ಆಂಗ್ಲರಿಗೆ ಅದೃಷ್ಟದ ಸಾಥ್ ಕೂಡಾ ಲಭಿಸಿತ್ತು. ಟ್ರೆಂಟ್ ಬೌಲ್ಟ್ ಎಸೆದ ನಾಲ್ಕನೇ ಎಸೆತದಲ್ಲಿ ಎರಡು ರನ್ ಕದಿಯಲೆತ್ನಿಸುವ ವೇಳೆಯಲ್ಲಿ ಬೆನ್ ಸ್ಟೋಕ್ಸ್ ಡೈವ್ ಹೊಡೆದಾಗ ಫೀಲ್ಡರ್ ಮಾಡಿದ ನೇರ ಥ್ರೋ ಬ್ಯಾಟ್‌ಗೆ ತಗುಲಿ ಬೌಂಡರಿ ಗೆರೆ ದಾಟಿತು. ಇದರಿಂದಾಗಿ ಎರಡು ರನ್ ಸಿಗಬೇಕಾದ ಸಂದರ್ಭದಲ್ಲಿ ಮತ್ತಷ್ಟು ನಾಲ್ಕು ರನ್ ಸೇರಿದಂತೆ ಇಂಗ್ಲೆಂಡ್ ಖಾತೆಗೆ ಆರು ರನ್‌ಗಳು ಸೇರಿದವು.
ಬಳಿಕ ಸೂಪರ್ ಓವರ್‌ನಲ್ಲೂ ಪಂದ್ಯ ಟೈ ಗೊಂಡಾಗ ಅತಿ ಹೆಚ್ಚು ಬೌಂಡರಿ ಹಾಗೂ ಸಿಕ್ಸರ್‌ಗಳನ್ನು ಗಳಿಸಿದ ಕಾರಣಕ್ಕಾಗಿ ಇಂಗ್ಲೆಂಡ್ ತಂಡವನ್ನು ನೂತನ ವಿಶ್ವ ಚಾಂಪಿಯನ್ ಆಗಿ ಘೋಷಿಸಲಾಯಿತು. ಈ ಮೂಲಕ ಬೆನ್ ಸ್ಟೋಕ್ಸ್ ಪಂದ್ಯದ ಹೀರೊ ಎನಿಸಿಕೊಂಡಿದ್ದರು.
ಪ್ರಸ್ತುತ ಉದ್ದೇಶಪೂರ್ವಕವಾಗಿಯೇ ಮಾಡದ ತಪ್ಪಿಗಾಗಿ ಬೆನ್ ಸ್ಟೋಕ್ಸ್ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಅವರಲ್ಲಿ ಕ್ಷಮೆಯಾಚಿಸಿದ್ದಾರೆ.
ನನ್ನ ಜೀವನದುದ್ಧಕ್ಕೂ ಕ್ಷಮೆಯಾಚಿಸುತ್ತೇನೆ ಎಂದು ನಾನು ಕೇನ್ ಅವರಲ್ಲಿ ಹೇಳಿದ್ದೇನೆ. ನಾನು ಈ ರೀತಿಯಾಗಿ ಮಾಡಲು ಬಯಸಿರಲಿಲ್ಲ. ಆದರೆ ನನ್ನ ಬ್ಯಾಟ್‌ಗೆ ತಗುಲಿದ ಚೆಂಡು ಬೌಂಡರಿ ಗೆರೆ ದಾಟಿತು. ಇದಕ್ಕಾಗಿ ಕೇನ್‌ರಲ್ಲಿ ಕ್ಷಮೆಯಾಚಿಸಿದ್ದೇನೆ ಎಂದಿದ್ದಾರೆ.
ಕಳೆದ ನಾಲ್ಕು ವರ್ಷಗಳಿಂದ ಕಠಿಣ ಪರಶ್ರಮ ವಹಿಸಿದ್ದೇವೆ. ಅತ್ಯಂತ ರೋಚಕ ಪಂದ್ಯದಲ್ಲಿ ಪಂದ್ಯ ಗೆಲ್ಲಲು ಸಾಧ್ಯವಾಗಿರುವುದಕ್ಕೆ ಅತೀತ ಹೆಮ್ಮೆಯಿದೆ. ಬಹುಶ: ಕ್ರಿಕೆಟ್ ಇತಿಹಾಸದಲ್ಲೇ ಇಂತಹದೊಂದು ಪಂದ್ಯ ಬೇರೆ ಇರಲಾರದು ಎಂದು ಸೇರಿಸಿದರು .
Comments are closed.