ಫುಟ್ಬಾಲ್ ಐಎಸ್​ಎಲ್ ಟೂರ್ನಿ: ಬೆಂಗಳೂರಲ್ಲಿ ಮಿಂಚಿದ ಬೆಂಗಳೂರಿಗರು

ಬೆಂಗಳೂರು: ಬೆಂಗಳೂರು ಫುಟ್ಬಾಲ್ ಕ್ಲಬ್ ತಂಡ ತನ್ನ ಚೊಚ್ಚಲ ಐಎಸ್​ಎಲ್ ಟೂರ್ನಿಯಲ್ಲಿ ಫೈನಲ್ ಏರುವಲ್ಲಿ ಸಫಲವಾಗಿದೆ. ಕಂಠೀರವ ಸ್ಟೇಡಿಯಂನಲ್ಲಿ ಇವತ್ತು ನಡೆದ ಸೆಮಿಫೈನಲ್​ನ ಎರಡನೇ ಲೆಗ್ ಪಂದ್ಯದಲ್ಲಿ ನಾರ್ಥ್ ಈಸ್ಟ್ ಯುನೈಟೆಡ್ ವಿರುದ್ಧ 3-0 ಗೋಲುಗಳಿಂದ ಭರ್ಜರಿ ಗೆಲುವು ಸಾಧಿಸಿತು. ಈ ಮೂಲಕ ಎರಡು ಲೆಗ್​ನ ಸೆಮಿಫೈನಲ್​ನಲ್ಲಿ ಬೆಂಗಳೂರಿಗರು 4-2 ಅಂತರದಿಂದ ಗೆಲುವಿನ ಮಂದಹಾಸ ಬೀರಿದರು. ಮೂರು ದಿನಗಳ ಹಿಂದೆ ನಡೆದ ಮೊದಲ ಲೆಗ್ ಪಂದ್ಯದಲ್ಲಿ ನಾರ್ಥ್ ಈಸ್ಟ್ ತಂಡದವರು 2-1 ಗೋಲುಗಳಿಂದ ಗೆಲುವು ಕಂಡಿದ್ದರು.

ಇಂದು ನಡೆದ ಎರಡನೇ ಲೆಗ್ ಪಂದ್ಯದಲ್ಲಿ ಬೆಂಗಳೂರು ತಂಡದ ಪರ ಮೀಕು, ಡಿಮಾಸ್ ಡೆಲ್ಗಾಡೋ ಮತ್ತು ಸುನೀಲ್ ಛೆಟ್ರಿ ಗೋಲು ಗಳಿಸಿದರು.

ಏಷ್ಯನ್ ಕಪ್ ಟೂರ್ನಿಗೆಂದು ನೀಡಿದ್ದ ಅಲ್ಪವಿರಾಮದ ನಂತರ ಮತ್ತೆ ಶುರುವಾದ ಐಎಸ್​ಎಲ್ ಟೂರ್ನಿಯಲ್ಲಿ ಬೆಂಗಳೂರಿಗರು ಯಾವ ಪಂದ್ಯದಲ್ಲೂ ಪ್ರಾಬಲ್ಯ ತೋರಲು ವಿಫಲರಾಗಿದ್ದರು. ಅದಾಗಲೇ ಅಗ್ರಸ್ಥಾನದಲ್ಲಿದ್ದ ಬೆಂಗಳೂರು ಎಫ್​ಸಿ ತನ್ನ ಎಂದಿನ ಲಯದಲ್ಲಿ ಆಡಲು ವಿಫಲವಾಗಿತ್ತಾದರೂ ಸೆಮಿಫೈನಲ್ ಅವಕಾಶದಿಂದ ವಂಚಿತವಾಗದಂತೆ ಜಾಗ್ರತೆ ವಹಿಸಿತ್ತು. ಸೆಮಿಫೈನಲ್​ನ ಮೊದಲ ಲೆಗ್ ಪಂದ್ಯದಲ್ಲೂ ನಾರ್ಥ್ ಈಸ್ಟ್​ನವರೇ ಹೆಚ್ಚು ಆಟ ಆಡಿದ್ದರು. ಆದರೆ, ತವರಿನಲ್ಲಿ ನಡೆದ ಎರಡನೇ ಲೆಗ್​ನಲ್ಲಿ ಬೆಂಗಳೂರು ಎಫ್​ಸಿ ಅಕ್ಷರಶಃ ಎದುರಾಳಿಗಳನ್ನು ಹತ್ತಿಕ್ಕಿದರು. ಆಡಲೇ ಬೇಕಾದ ಪಂದ್ಯದಲ್ಲಿ ಸ್ಫೂರ್ತಿಯುತ ಆಟವಾಡಿ ಗೆದ್ದು ಮರೆದರು.

ಈ ಪಂದ್ಯದಲ್ಲಿ ಮೊದಲ ಅರ್ಧ ಅವಧಿಯಲ್ಲಿ ಯಾವ ತಂಡವೂ ಗೋಲು ಗಳಿಸಲಿಲ್ಲ. ಆದರೆ, ದ್ವಿತೀಯಾರ್ಧದಲ್ಲಿ ಬೆಂಗಳೂರಿಗರು 3 ಗೋಲುಗಳ ಮಳೆ ಸುರಿಸಿದರು. 72ನೇ ನಿಮಿಷದಲ್ಲಿ ಸ್ಟಾರ್ ಆಟಗಾರ ಮೀಕು ಗೋಲು ಗಳಿಸಿದರೆ, ಡೆಲ್ಗಾಡೋ 87ನೇ ನಿಮಿಷದಲ್ಲಿ ಗೋಲು ಗಳಿಸಿದರು. ನಾರ್ಥ್ ಈಸ್ಟ್ ಗಾಯದ ಮೇಲೆ ಬರೆ ಎಳೆದಂತೆ ಸುನೀಲ್ ಛೇಟ್ರಿ ಹೆಚ್ಚುವರಿ ಸಮಯದಲ್ಲಿ ಗೋಲು ಗಳಿಸಿದರು.

ಮೊದಲ ಲೆಗ್​ನಲ್ಲಿ ಒಂದು ಗೋಲಿನ ಮುನ್ನಡೆ ಹೊಂದಿದ್ದ ನಾರ್ಥ್ ಈಸ್ಟ್ ತಂಡದವರು ಈ ಪಂದ್ಯದಲ್ಲಿ ಒಂದೆರಡು ಗೋಲು ಗಳಿಸಿದ್ದರೆ ಬೆಂಗಳೂರಿಗರ ಹಾದಿ ತೀರಾ ಕಠಿಣವಾಗಿರುತ್ತಿತ್ತು. ಆದರೆ, ಬೆಂಗಳೂರು ಇದಕ್ಕೆ ಆಸ್ಪದ ಕೊಡಲಿಲ್ಲ.

ಮತ್ತೊಂದು ಸೆಮಿಫೈನಲ್​ನಲ್ಲಿ ಮುಂಬೈ ಸಿಟಿ ಮತ್ತು ಗೋವಾ ತಂಡಗಳು ಮುಖಾಮುಖಿಯಾಗಿವೆ. ಮೊದಲ ಲೆಗ್​ನಲ್ಲಿ ಗೋವಾ ತಂಡ 5-1 ಗೋಲುಗಳಿಂದ ಗೆಲುವು ಕಂಡಿರುವ ಹಿನ್ನೆಲೆಯಲ್ಲಿ ಫೈನಲ್ ಏರಲು ನೆಚ್ಚಿನ ತಂಡವೆನಿಸಿದೆ.

ಮಾರ್ಚ್ 17ರಂದು ಫೈನಲ್ ಪಂದ್ಯ ನಡೆಯಲಿದೆ. ಈ ಇಂಡಿಯನ್ ಸೂಪರ್ ಲೀಗ್​ನಲ್ಲಿ ಚಾಂಪಿಯನ್ ಆದವರು ಎಎಫ್​ಸಿ ಕಪ್ ಟೂರ್ನಿಯಲ್ಲಿ ಆಡುವ ಅರ್ಹತೆ ಗಿಟ್ಟಿಸಲಿದ್ದಾರೆ.

ದೇಶದ ಮತ್ತೊಂದು ಪ್ರಮುಖ ಫುಟ್ಬಾಲ್ ಟೂರ್ನಿಯಾಗಿರುವ ಐ-ಲೀಗ್​ನ ಈ ಸೀಸನ್​ನಲ್ಲಿ ಮಿನರ್ವಾ ಎಫ್​ಸಿ ತಂಡ ತನ್ನ ಪದಾರ್ಪಣೆಯಲ್ಲೇ ಚಾಂಪಿಯನ್ ಎನಿಸಿದೆ. ಈ ಐಲೀಗ್ ಚಾಂಪಿಯನ್ ಕೂಡ ಎಎಫ್​ಸಿ ಕಪ್ ಟೂರ್ನಿಗೆ ಅರ್ಹತೆ ಪಡೆದಿದೆ.

ಬೆಂಗಳೂರು ಎಫ್​ಸಿ ತಂಡ ಕೂಡ ತನ್ನ ಚೊಚ್ಚಲ ಐಲೀಗ್ ಟೂರ್ನಿಯನ್ನು ಗೆದ್ದು ಭಾರತೀಯ ಫುಟ್ಬಾಲ್ ಲೋಕವನ್ನು ನಿಬ್ಬೆರಗಾಗಿಸಿತ್ತು. ಪಕ್ಕಾ ವೃತ್ತಿಪರ ತಂಡವೆಂದು ಖ್ಯಾತವಾದ ಬೆಂಗಳೂರಿಗರು ಐಲೀಗ್ ಮತ್ತು ಎಎಫ್​ಸಿ ಟೂರ್ನಿಯಲ್ಲಿ ಅನೇಕ ಮೈಲಿಗಲ್ಲು ಸೃಷ್ಟಿಸಿ ಇದೀಗ ಐಎಸ್​ಎಲ್ ಟೂರ್ನಿಗೆ ಅಡಿ ಇಟ್ಟಿದೆ. ಇದರಲ್ಲೂ ಫೈನಲ್ ತಲುಪಿ ಗಮನ ಸೆಳೆದಿದೆ.