ಹೊಸದಿಲ್ಲಿ: ವಿವಾದಗಳು ಏನೇ ಇರಲಿ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ ಮಾತ್ರ ವರ್ಷದಿಂದ ವರ್ಷಕ್ಕೆ ತನ್ನ ಮೌಲ್ಯವನ್ನು ಹೆಚ್ಚಿಸಿಕೊಳ್ಳುತ್ತಿದೆ, ಆಟಗಾರರನ್ನೂ ಶ್ರೀಮಂತಗೊಳಿಸುತ್ತಿದೆ. 11 ಆವೃತ್ತಿಯ ಐಪಿಎಲ್‌ನಲ್ಲಿ ಪ್ರತಿಯೊಂದು ಪಂದ್ಯದ ಮೌಲ್ಯ 55 ಕೋಟಿ ರೂ.ಗಳೆಂದು ಅಂದಾಜಿಸಲಾಗಿದೆ. ಇಂದು ಇಂಗ್ಲಿಷ್‌ ಪ್ರೀಮಿಯರ್‌ ಲೀಗ್‌ಗಿಂತ ಸ್ವಲ್ಪ ಕಡಿಮೆಯಾಗಿರುತ್ತದೆ. ಇಂಗ್ಲಿಷ್‌ ಪ್ರೀಮಿಯರ್‌ ಲೀಗ್‌ನ ಒಂದು ಪಂದ್ಯದ ಮೌಲ್ಯ 62 ಕೋಟಿ ರೂ.
ಸ್ಟಾರ್‌ ಸಮೂಹವು 16,347.5 ಕೋಟಿ ರೂ.ಗಳಿಗೆ ಐಪಿಎಲ್ ಪ್ರಸಾರದ ಹಕ್ಕನ್ನು ಪಡೆದಾಗಿನಿಂದ ಆಟಗಾರರ ಮೌಲ್ಯ ಹೆಚ್ಚಾಗಿದೆ. ಈ ಬಾರಿಯ ಐಪಿಎಲ್‌ನಲ್ಲಿ ಬಿಸಿಸಿಐ ಹೆಚ್ಚಿನ ಆದಾಯದ ನಿರೀಕ್ಷೆಯಲ್ಲಿರುವುದು ಸಹಜ. ಫ್ರಾಂಚೈಸಿಗಳು ಅಂದಾಜು 450ಕ್ಕೂ ಹೆಚ್ಚು ಕೋಟಿ ರೂ.ಗಳನ್ನು ವ್ಯಯ ಮಾಡಿ ಉತ್ತಮ ಆಟಗಾರರನ್ನು ಖರೀದಿಸಿವೆ. ಇದರಿಂದಾಗಿ ತಂಡದ ಮಾಲೀಕರು ಆಟಗಾರರಿಂದಲೂ ಉತ್ತಮ ಆಟವನ್ನು ನಿರೀಕ್ಷಿಸುತ್ತಿರುವುದು ಸಹಜ. ಇಂಗ್ಲಿಷ್‌ ಪ್ರೀಮಿಯರ್‌ ಲೀಗ್‌ನಲ್ಲಿ ಮ್ಯಾಂಚೆಸ್ಟರ್‌ ಯುನೈಟೆಡ್‌ ಹಾಗೂ ರಿಯಲ್‌ ಮ್ಯಾಡ್ರಿಡ್‌ ತಂಡಗಳ ನಡುವಿನ ಫ್ಯಾನ್‌ ಫೈಟ್‌ ಇರುವಂತೆ ಐಪಿಎಲ್‌ನಲ್ಲಿ ಕೋಲ್ಕೊತಾ ನೈಟ್‌ ರೈಡರ್ಸ್‌ ಹಾಗೂ ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ತಂಡಗಳು ಬದ್ಧ ಎದುರಾಳಿಗಳೆನಿಸಿವೆ. ಸ್ಫೋಟಕ ಆಟಗಾರ ಕ್ರಿಸ್‌ ಗೇಲ್‌ ಅಲ್ಪ ಮೊತ್ತಕ್ಕೆ ಕಿಂಗ್ಸ್ ಇಲೆವೆನ್‌ ತಂಡವನ್ನು ಸೇರಿರಬಹುದು, ಆದರೆ ಈಗಲೂ ಕ್ರಿಕೆಟ್ ಅಭಿಮಾನಿಗಳು ಅವರ ಆಟದ ಬಗ್ಗೆ ಕುತೂಹಲದಲ್ಲಿದ್ದಾರೆ.
100 ಇನಿಂಗ್ಸ್‌ಗಳಲ್ಲಿ ಗೇಲ್‌ 265 ಸಿಕ್ಸರ್‌ ಸಿಡಿಸಿ ಅಗ್ರ ಸ್ಥಾನದಲ್ಲಿದ್ದಾರೆ, ಅದೇ ರೀತಿ ವಿರಾಟ್‌ ಕೊಹ್ಲಿ ಹತ್ತು ಋುತುವಿನಲ್ಲಿ 160 ಸಿಕ್ಸರ್‌ ಸಿಡಿಸಿದ್ದಾರೆ. ಎರಡು ವರ್ಷ ನಿಷೇಧಕ್ಕೊಳಗಾಗಿದ್ದರೂ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ರಾಜಸ್ಥಾನ್‌ ರಾಯಲ್ಸ್‌ ತಂಡಗಳ ಬಗ್ಗೆ ಕ್ರಿಕೆಟ್ ಅಭಿಮಾನಿಗಳಿಗಿದ್ದ ಪ್ರೀತಿ ಕಡಿಮೆಯಾಗಿಲ್ಲ. ರಾಜಸ್ಥಾನದಲ್ಲಿ ‘ಹಲ್ಲಾ ಬೋಲ್‌’ ಮೊಳಗಿದರೆ ಚೆನ್ನೈನಲ್ಲಿ ‘ವಿಜಿಲ್‌ ಪೋಡ್‌’ ಧ್ವನಿ ಮಾಡಿದೆ.
Comments are closed.