ಡ್ಯಾಂಡ್ರಫ್‌‌ನಿಂದ ದಾಂಪತ್ಯದ ವರೆಗೆ; ಇದುವೇ ವಿರುಷ್ಕಾ ಲವ್ ಸ್ಟೋರಿ!

ಬೆಂಗಳೂರು: ಅಂತೂ ಇಂತೂ ಕೊನೆಗೂ ಊಹಾಪೋಹಗಳಿಗೆ ಇತಿಶ್ರೀ ಹಾಡಿರುವ ಭಾರತ ಕ್ರಿಕೆಟ್ ತಂಡದ ನಾಯಕ ವಿರಾಟ್ ಕೊಹ್ಲಿ ಅವರು ಬಾಲಿವುಡ್ ಬೆಡಗಿ ಅನುಷ್ಕಾ ಶರ್ಮಾ ಅವರನ್ನು ವರಿಸಿಕೊಂಡಿದ್ದಾರೆ. ಇಟಲಿಯ ಮಿಲಾನ್‌ನಲ್ಲಿ ನಡೆದ ಮದುವೆ ಸಮಾರಂಭದಲ್ಲಿ ಕುಟುಂಬ ಹಾಗೂ ಆಪ್ತರು ಮಾತ್ರ ಭಾಗವಹಿಸಿದ್ದರು. ತದಾ ಬಳಿಕ ಟ್ವಿಟರ್‌ನಲ್ಲಿ ವಿವಾಹವನ್ನು ಅಧಿಕೃತವಾಗಿ ಘೋಷಿಸಿದ್ದರು.

ವಿರಾಟ್-ಅನುಷ್ಕಾ ಮದುವೆಯನ್ನು ಮೀಡಿಯಾ ಹಬ್ಬದಂತೆ ಆಚರಿಸಿಕೊಂಡಿದೆ. ಅಷ್ಟಕ್ಕೂ ದೇಶದ ಬಹು ಚರ್ಚಿತ ಸೆಲೆಬ್ರಿಟಿ ಪ್ರಣಯ ಜೋಡಿಗಳಾಗಿದ್ದ ಕೊಹ್ಲಿ ಹಾಗೂ ಅನುಷ್ಕಾ ನಡುವೆ ಪ್ರೀತಿ ಹೇಗೆ ಹುಟ್ಟಿಕೊಂಡಿತ್ತು ಎಂಬುದರ ಬಗ್ಗೆ ಕುತೂಹಲದಾಯಕ ಅಂಶಗಳನ್ನು ಇಲ್ಲಿ ವಿವರಿಸಲಾಗಿದೆ.

ಮೊದಲ ಭೇಟಿಯಲ್ಲೇ ಪ್ರೇಮಾಂಕುರ…

ವಿರಾಟ್ ಕೊಹ್ಲಿ ಹಾಗೂ ಅನುಷ್ಕಾ ಶರ್ಮಾ ಅವರ ಪ್ರೀತಿಯನ್ನು ಒಂದೇ ವಾಕ್ಯದಲ್ಲಿ ವಿವರಿಸುವುದಾದರೆ ಡ್ಯಾಂಡ್ರಫ್ ಜಾಹೀರಾತಿನಿಂದ ಆರಂಭವಾದ ಪ್ರಣಯ ವಿವಾಹದಲ್ಲಿ ಶುಭಾಂತ್ಯ ಕಂಡಿತು ಎಂದು ವರ್ಣಿಸಬಹುದು.

2013ನೇ ಇಸವಿಯಲ್ಲಿ ಕೊಹ್ಲಿ ಹಾಗೂ ಅನುಷ್ಕಾ ಮೊದಲ ಬಾರಿಗೆ ಶ್ಯಾಂಪೂ ವಾಣಿಜ್ಯ ಟಿ.ವಿ ಜಾಹೀರಾತುವೊಂದರಲ್ಲಿ ಭಾಗವಹಿಸಿದ್ದರು. ಅಲ್ಲಿಂದ ಬಳಿಕ ಅವರಿಬ್ಬರ ನಡುವೆ ಪ್ರೇಮ ಅಂಕುರಿಸಿತ್ತು.

ಇಬ್ಬರ ವೃತ್ತಿಯನ್ನು ಗಮನಿಸಿದಾಗಲೂ ಅಲ್ಲಿಂದ ಬಳಿಕ ಕೊಹ್ಲಿ ಹಾಗೂ ಅನುಷ್ಕಾ ಕೆರಿಯರ್‌ನಲ್ಲಿ ಉತ್ತುಂಗವನ್ನು ಏರಿದರು. ಕೊಹ್ಲಿ ಟೀಮ್ ಇಂಡಿಯಾದ ನಾಯಕನಾಗಿ ಬಡ್ತಿ ಪಡೆದರೆ ಅನುಷ್ಕಾ ಬಾಲಿವುಡ್‌ನ ಬಿಗ್ ಬಜೆಟ್ ಮೂವೀಗಳಲ್ಲಿ ಅಭಿನಯಿಸುವ ಮೂಲಕ ಹೆಚ್ಚು ಜನಪ್ರಿಯತೆಯನ್ನು ಗಳಿಸಿದರು.

ಆರಂಭದಲ್ಲೆಲ್ಲ ವಿರಾಟ್-ಅನುಷ್ಕಾ ಜೋಡಿಯು ಕದ್ದು ಮುಚ್ಚಿ ಡೇಟಿಂಗ್ ಮಾಡುತ್ತಿದ್ದರು. ಆದರೆ ಮಾಧ್ಯಮಗಳು ಮಾತ್ರ ಸೆಲೆಬ್ರಿಟಿಗಳನ್ನು ಬೆನ್ನು ಹತ್ತಿದರು. ಅಲ್ಲೂ ಗಾಸಿಪ್‌ಗಳಿಗೆ ಹೆದರದ ವಿರುಷ್ಕಾ ಸಾರ್ವಜನಿಕವಾಗಿಯೇ ಕಾಣಿಸಲಾರಂಭಿಸಿದರು.

ಮೂಲಗಳ ಪ್ರಕಾರ 2014ರಲ್ಲಿ ದಕ್ಷಿಣ ಆಫ್ರಿಕಾ ಪ್ರವಾಸದ ಬಳಿಕ ಮುಂಬಯಿಗೆ ಬಂದಿಳಿದ ಕೊಹ್ಲಿ ನೇರವಾಗಿ ಅನುಷ್ಕಾ ಮನೆಗೆ ತೆರಳಿದರು. ಅದೇ ವರ್ಷ ನ್ಯೂಜಿಲೆಂಡ್ ಪ್ರವಾಸದ ಬಳಿಕ ವಿರಾಟ್ ಮನೆಗೂ ಅನುಷ್ಕಾ ಭೇಟಿ ನೀಡಿದರು.

2014-15ರ ಸಾಲಿನಲ್ಲಿ ಭಾರತ ಕಂಡ ಅತ್ಯಂತ ಕಠಿಣ ಆಸ್ಟ್ರೇಲಿಯಾ ಪ್ರವಾಸದಲ್ಲೂ ವಿರಾಟ್ ಹುರಿದುಂಬಿಸಲು ಅನುಷ್ಕಾ ಗ್ಯಾಲರಿಯಲ್ಲಿ ಹಾಜರಾಗಿದ್ದರು. ಮೆಲ್ಬರ್ನ್ ಕ್ರೀಡಾಂಗಣದಲ್ಲಿ ಶತಕ ಬಾರಿಸಿದ ಬಳಿಕ ವಿರಾಟ್ ಬ್ಯಾಟ್ ಮೂಲಕ ಫ್ಲೈಯಿಂಗ್ ಕಿಸ್ ಅನ್ನು ಅನುಷ್ಕಾ ಜತೆ ಹಂಚಿಕೊಂಡರು.

ಆಸ್ಟ್ರೇಲಿಯಾ ಪ್ರವಾಸದಲ್ಲಿ ಇಂಡಿಯನ್ ಹೈ ಕಮಿಷನ್‌ಗೆ ಭೇಟಿ ನೀಡಿದಾಗಲೂ ಹಾಗೂ ಸಿಡ್ನಿಯ ಡಾರ್ಲಿಂಗ್ ಹಾರ್ಬರ್‌ನಲ್ಲೂ ವಿರಾಟ್ ಕೈ ಹಿಡಿಯಲು ಅನುಷ್ಕಾ ಮರೆಯಲಿಲ್ಲ.

ಅದೇ ಸಾಲಿನಲ್ಲಿ ಶ್ರೀಲಂಕಾ ವಿರುದ್ಧ ನಡೆದ ಸರಣಿಯಲ್ಲೂ ಮಗದೊಂದು ಫ್ಲೈಯಿಂಗ್ ಕಿಸ್ ಮೂಲಕ ಕೊಹ್ಲಿ ತಮ್ಮ ಪ್ರೇಮಾಭಿಲಾಷೆಯನ್ನು ಬಹಿರಂಗಪಡಿಸಿದರು.

ಇಂಡಿಯನ್ ಸೂಪರ್ ಲೀಗ್ (ಐಎಸ್‌ಎಲ್) ಫುಟ್ಬಾಲ್ ಟೂರ್ನಮೆಂಟ್‌ನಲ್ಲಿ ಎಫ್‌ಸಿ ಗೋವಾ ತಂಡವನ್ನು ಮಾಲಿಕನಾದ ಕೊಹ್ಲಿ, ತಮ್ಮ ಪ್ರೇಯಸಿ ಜತೆ ಬಂದು ತಂಡವನ್ನು ಹುರಿದುಂಬಿಸಿದರು. ಅತ್ತ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ಹಾಗೂ ತಮ್ಮ ಬಾಯ್‌ಫ್ರೆಂಡ್ ವಿರಾಟ್ ಕೊಹ್ಲಿ ಪರ ಅನುಷ್ಕಾ ಬಾವುಟ ಬೀಸಿದರು.

ಬರ ಬರುತ್ತಾ ವಿರುಷ್ಕಾ ಪ್ರಣಯದ ಅಡಿಪಾಯ ಮತ್ತಷ್ಟು ಗಟ್ಟಿಯಾಯಿತು. ಸಂಬಂಧ ವಿವಾಹ ಪ್ರಸ್ತಾಪದತ್ತ ಮುಂದುವರಿಯಿತು. ಭಾರತೀಯ ಕ್ರಿಕೆಟಿಗರಾದ ಯುವರಾಜ್ ಸಿಂಗ್ ಹಾಗೂ ಮಾಜಿ ವೇಗಿ ಜಹೀರ್ ಖಾನ್ ವಿವಾಹ ಸಮಾರಂಭದಲ್ಲೂ ವಿರುಷ್ಕಾ ಜತೆಯಾಗಿಯೇ ವಿಷ್ ಮಾಡಿ ಡ್ಯಾನ್ಸ್ ಮಾಡಿ ಸಂಭ್ರಮಾಚರಿಸಿದರು.

ಅನುಷ್ಕಾ ಬೆನ್ನಿಗೆ ನಿಂತ ವಿರಾಟ್…

ತಮ್ಮ ಪ್ರೇಯಸಿಯ ರಕ್ಷಣೆಗೆ ವಿರಾಟ್ ಎಂದೂ ಬದ್ಧವಾಗಿದ್ದರು. ಈ ನಡುವೆ ಪದೇ ಪದೇ ಗ್ಯಾಲರಿಯಲ್ಲಿ ಅನುಷ್ಕಾ ಕಾಣಿಸಿಕೊಳ್ಳುತ್ತಿರುವುದು ವಿರಾಟ್ ಕೆಟ್ಟ ಪ್ರದರ್ಶನಕ್ಕೆ ಕಾರಣವಾಗುತ್ತಿದೆ ಎಂಬ ಬಲವಾದ ಆರೋಪ ಮಾಧ್ಯಮಗಳಲ್ಲಿ ಕೇಳಿ ಬಂದಿತ್ತು.

2014ರ ಇಂಗ್ಲೆಂಡ್ ಪ್ರವಾಸ ವಿರಾಟ್ ಪಾಲಿಗೆ ಕಬ್ಬಿಣದ ಕಡಲೆಯಾಗಿತ್ತು. ಬಳಿಕ 2015 ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೆಮಿಫೈನಲ್‌ನಲ್ಲಿ ಸೋಲು, 2016 ಟ್ವೆಂಟಿ-20 ವಿಶ್ವಕಪ್‌ನಲ್ಲಿ ವೆಸ್ಟ್‌ಇಂಡೀಸ್ ವಿರುದ್ಧದ ಪರಾಭವಕ್ಕೆ ಹಾಗೂ ವಿರಾಟ್ ಕೆಟ್ಟ ಪ್ರದರ್ಶನಕ್ಕೆ ಅನುಷ್ಕಾ ಕಾರಣ ಎಂದು ಬೊಟ್ಟು ಮಾಡಲಾಯಿತು.

ತಕ್ಷಣವೇ ಅನುಷ್ಕಾ ಪರ ಹೇಳಿಕೆ ಕೊಟ್ಟ ವಿರಾಟ್, ಟೀಕಾಕಾರರ ವಿರುದ್ಧ ಸಿಡಿದೆದ್ದರು. ಪ್ರತಿ ವಿಷಯಕ್ಕೂ ಅನುಷ್ಕಾರನ್ನು ದೂಷಿಸುವ ನಿಮಗೆಲ್ಲರಿಗೂ ಲಜ್ಜೆಯಾಗಬೇಕು. ನಿಮ್ಮ ಸೋದರಿ ಅಥವಾ ಗೆಳತಿ ಅಥವಾ ಪತ್ನಿ ವಿರುದ್ಧ ಸಾರ್ವಜನಿಕವಾಗಿ ಇದೇ ರೀತಿ ಟ್ರೋಲ್ ಮಾಡಿದರೆ ಹೇಗಾಗಬಹುದೆಂಬುದನ್ನು ಯೋಚಿಸಿ ನೋಡಿ. ಆಕೆ ಯಾವತ್ತೂ ತನಗೆ ಪ್ರಚೋದನೆ ಹಾಗೂ ಧನಾತ್ಮಕ ಚಿಂತನೆಯನ್ನು ನೀಡಿದ್ದಾರೆ ಎಂದು ಸ್ಪಷ್ಟನೆ ಕೊಟ್ಟರು.

ಈ ನಡುವೆ 2016ರಲ್ಲಿ ಹೃದಯ ಒಡೆದು ಹೋಯಿತೆಂಬ ವಿರಾಟ್ ಪೋಸ್ಟ್ ಇಬ್ಬರ ನಡುವೆ ಸಂಬಂಧ ಬೇರ್ಪಟ್ಟಿತ್ತು ಎಂಬುದು ಅನುಮಾನಕ್ಕೆ ಕಾರಣವಾಗಿತ್ತು. ಆದರೆ ಅಲ್ಪ ವಿರಾಮದ ಬಳಿಕ ವಿರುಷ್ಕಾ ಮಾತ್ರ ಸಂಬಂಧವನ್ನು ಮತ್ತಷ್ಟು ಗಟ್ಟಿಪಡಿಸಿಕೊಂಡರು.

ವರ್ಷಗಳ ಬಳಿಕವೂ ಅನುಷ್ಕಾ ಬಗೆಗಿನ ಅನುಭವವನ್ನು ಕೊಹ್ಲಿ ಹಲವು ಸಂದರ್ಶನಗಳಲ್ಲಿ ಹಂಚಿಕೊಂಡಿದ್ದಾರೆ. ತಮಗೆ ಅನುಷ್ಕಾ ಸ್ಫೂರ್ತಿಯಾಗಿದ್ದಾರೆ ಎಂದು ಮನ ಬಿಚ್ಚಿ ಹೇಳಿರುವ ವಿರಾಟ್, ತಮ್ಮ ಪ್ರೇಯಸಿಯ ಬಗ್ಗೆ ಮಾತನಾಡುವಾಗ ಅತ್ಯಂತ ಆವೇಶಕ್ಕೆ ಒಳಗಾಗುತ್ತಾರೆ.

ಕೊನೆಗೂ 2017 ವರ್ಷಾಂತ್ಯದಲ್ಲಿ ಡಿಸೆಂಬರ್ 11ರಂದು ಕೊಹ್ಲಿ-ಅನುಷ್ಕಾ ವಿವಾಹವು ಇಟಲಿಯಲ್ಲಿ ನೇರವೇರಿದೆ. ಈ ಮೂಲಕ ಬಾಲಿವುಡ್ ನಟಿಯರನ್ನು ವಿವಾಹ ಮಾಡಿದ ಕ್ರಿಕೆಟಿಗರ ಸಾಲಿಗೆ ಕಿಂಗ್ ಕೊಹ್ಲಿ ಸೇರ್ಪಡೆಯಾಗಿದ್ದಾರೆ.