ಭಾರತೀಯ ಚಿತ್ರರಂಗದ ಸಂಗೀತ ಕ್ಷೇತ್ರಕ್ಕೆ ಅಪಾರ ಕೊಡುಗೆ ನೀಡಿದ ಮಹಾನ್ ಪತ್ರಿಭೆ ಎಸ್ಪಿ ಬಾಲಸುಬ್ರಹ್ಮಣ್ಯಂ ಅವರು. ಕನ್ನಡ, ತೆಲುಗು ಸೇರಿ ಅನೇಕ ಭಾಷೆಗಳಲ್ಲಿ ಸಾವಿರಾರು ಹಾಡುಗಳನ್ನು ಹಾಡಿ, ಜನಪ್ರಿಯರಾಗಿದ್ದ ಅವರು ನಟನೆಯ ಮೂಲಕವೂ ಗಮನಸೆಳೆದಿದ್ದರು. ಬಹುಭಾಷೆಗಳಲ್ಲಿ 70ಕ್ಕೂ ಅಧಿಕ ಸಿನಿಮಾಗಳಲ್ಲಿ ಎಸ್ಪಿಬಿ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. 8 ವರ್ಷಗಳ ಹಿಂದೆ ಅವರೊಂದು ತೆಲುಗು ಚಿತ್ರದಲ್ಲಿ ನಟಿಸಿದ್ದರು. ಆ ಸಿನಿಮಾವೀಗ ಕನ್ನಡಕ್ಕೆ ಡಬ್ ಆಗಿ ತೆರೆಕಾಣುತ್ತಿದೆ. ಆ ಕುರಿತು ಇಲ್ಲಿದೆ ಮಾಹಿತಿ.
ಕನ್ನಡಕ್ಕೆ ‘ಮಿಥುನಂ’
2012ರಲ್ಲಿ ತೆರೆಕಂಡ ಸಿನಿಮಾ ‘ಮಿಥುನಂ’. ಎಸ್ಪಿಬಿ ಮತ್ತು ಹಿರಿಯ ನಟಿ ಲಕ್ಷ್ಮೀ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಈ ಸಿನಿಮಾವು ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಶ್ರೀರಮಣ ಬರೆದಿದ್ದ ಇದೇ ಹೆಸರಿನ ಕಾದಂಬರಿಗೆ ಸಿನಿಮಾ ರೂಪ ನೀಡಿದ್ದರು ನಟ/ಬರಹಗಾರ/ನಿರ್ದೇಶಕ ತನಿಕೆಳ್ಳ ಭರಣಿ. ಇದೀಗ ಆ ಸಿನಿಮಾವನ್ನು 8 ವರ್ಷಗಳ ಬಳಿಕ ಕನ್ನಡಕ್ಕೆ ಡಬ್ಬಿಂಗ್ ಮಾಡಲಾಗುತ್ತಿದೆ. ಮಿಥುನಂ ನಿರ್ಮಾಪಕರಾದ ಆನಂದ ಮುಯಿದ ರಾವು ಅವರೇ ಕನ್ನಡಕ್ಕೆ ಡಬ್ ಮಾಡಿ, ರಿಲೀಸ್ ಮಾಡುವುದಕ್ಕೆ ಪ್ಲ್ಯಾನ್ ಮಾಡುತ್ತಿದ್ದಾರೆ.
ಸೌಂಡ್ ಆಫ್ ಮ್ಯೂಸಿಕ್ ಗುರುರಾಜ್ ಅವರ ಸ್ಟುಡಿಯೋದಲ್ಲಿ ಡಬ್ಬಿಂಗ್ ಕಾರ್ಯ ನಡೆಯುತ್ತಿದ್ದು, ವರದರಾಜು ಚಿಕ್ಕಬಳ್ಳಾಪುರ ಸಾಹಿತ್ಯ ಮತ್ತು ಸಂಭಾಷಣೆ ಬರೆದಿದ್ದಾರೆ. ಡಬ್ಬಿಂಗ್ ಕಾರ್ಯ ಸಂಪೂರ್ಣಗೊಂಡ ಬಳಿಕ ಡಿಸೆಂಬರ್ ತಿಂಗಳಿನಲ್ಲಿ ರಾಜ್ಯಾದ್ಯಂತ ರಿಲೀಸ್ ಮಾಡುವುದಕ್ಕೆ ಸಿದ್ಧತೆ ಮಾಡಿಕೊಳ್ಳಲಾಗುತ್ತಿದೆ. ಸಾಮಾನ್ಯವಾಗಿ ಈಚಿನ ಪರಭಾಷೆಯ ಹೊಸ ಸಿನಿಮಾಗಳು ಕನ್ನಡಕ್ಕೆ ಡಬ್ ಆಗಿ ತೆರೆಕಾಣುತ್ತಿರುವುದನ್ನು ನೋಡಿದ್ದೇವೆ. ಆದರೆ, 8 ವರ್ಷಗಳ ಹಿಂದಿನ ಸಿನಿಮಾವನ್ನು ಈಗ ಡಬ್ ಮಾಡಿ ರಿಲೀಸ್ ಮಾಡುತ್ತಿರುವುದು ವಿಶೇಷ.
ಅಂದಹಾಗೆ, ‘ಮಿಥುನಂ’ ಚಿತ್ರವು ಕನ್ನಡದಲ್ಲಿ ‘ಮಿಥುನ’ ಆಗಿ ತೆರೆಗೆ ಬರುತ್ತಿದೆ. ಇಡೀ ಸಿನಿಮಾದಲ್ಲಿ ಎಸ್ಪಿಬಿ ಮತ್ತು ಲಕ್ಷ್ಮೀ ಮಾತ್ರ ನಟಿಸಿದ್ದಾರೆ. ಈ ಎರಡು ಪಾತ್ರಗಳೇ ಇಡೀ ಚಿತ್ರದ ಜೀವಾಳ. ಅದೇ ‘ಮಿಥುನಂ’ನ ಮುಖ್ಯ ವಿಶೇಷ. ಈ ಸಿನಿಮಾಕ್ಕೆ 4 ರಾಜ್ಯ ಪ್ರಶಸ್ತಿ ಸಿಕ್ಕಿರುವುದು ಮತ್ತೊಂದು ವಿಶೇಷ. ‘ಮಿಥುನಂ’ ಹಾಡುಗಳಿಗೆ ಸ್ವರವೀಣಾಪಾಣಿ ಸಂಗೀತ ನೀಡಿದ್ದಾರೆ. ಇದರಲ್ಲಿ ಐದು ಗೀತೆಗಳಿದ್ದು, ಒಂದು ಹಾಡಿಗೆ ಎಸ್ಪಿಬಿ ಧ್ವನಿ ನೀಡಿದ್ದರು.
Comments are closed.