ತಮ್ಮ ಅಭಿಮಾನಿಗಳಿಗೆ ಬ್ಯಾಕ್‌ ಟು ಬ್ಯಾಕ್‌ ಸಿಹಿ ಸುದ್ದಿ ನೀಡುತ್ತಿದ್ದಾರೆ ಖ್ಯಾತ ಬಾಲಿವುಡ್‌ ನಟ ಸಂಜಯ್‌ ದತ್. ತಾವು ಕ್ಯಾನ್ಸರ್‌ ಗೆದ್ದು ಬಂದಿರುವ ವಿಷಯವನ್ನು ಇತ್ತೀಚೆಗಷ್ಟೇ ಅವರು ಹಂಚಿಕೊಂಡಿದ್ದರು. ಈಗ ಹೊಸ ಕೇಶವಿನ್ಯಾಸದ ಮೂಲಕ ಗಮನ ಸೆಳೆಯುತ್ತಿದ್ದಾರೆ. ಸಂಜು ಅವರ ಹೊಸ ಹೇರ್‌ಸ್ಟೈಲ್‌ ಕಂಡು ಅಭಿಮಾನಿಗಳು ಸಖತ್ ಥ್ರಿಲ್‌ ಆಗಿದ್ದಾರೆ.
ಶ್ವಾಸಕೋಶದ ಕ್ಯಾನ್ಸರ್‌ಗೆ ಒಳಗಾಗಿದ್ದ ಸಂಜಯ್‌ ದತ್ ಬೇಗ ಗುಣಮುಖರಾಗುತ್ತಾರೋ ಇಲ್ಲವೋ ಎಂಬ ಚಿಂತೆ ಎಲ್ಲರಿಗೂ ಇತ್ತು. ಆದರೆ ಅಂಥ ಅನುಮಾನಗಳಿಗೆ ಎಡೆಮಾಡಿಕೊಡದೇ, ಕೆಲವೇ ತಿಂಗಳುಗಳಲ್ಲಿ ಸಂಜು ಬಾಬಾ ಗುಣಮುಖರಾಗಿದ್ದಾರೆ. ಅಷ್ಟೇ ಅಲ್ಲ, ಈಗ ಬಗೆಬಗೆಯ ಫ್ಯಾಷನ್‌ ಮಾಡುತ್ತ ಅವರು ಜೀವನೋತ್ಸಾಹ ಮೆರೆಯುತ್ತಿದ್ದಾರೆ. ಸದ್ಯ ವೈರಲ್‌ ಆಗಿರುವ ಅವರ ಹೊಸ ಫೋಟೋ ಇದಕ್ಕೆ ಸಾಕ್ಷಿ.
61ರ ಪ್ರಾಯದ ಸಂಜಯ್‌ ದತ್ ಈಗ ಫ್ಯಾಮಿಲಿ ಜೊತೆ ಕಾಲ ಕಳೆಯುತ್ತಿದ್ದಾರೆ. ಇತ್ತೀಚೆಗಷ್ಟೇ ಅವರು ಹೊಸ ಹೇರ್‌ಸ್ಟೈಲ್‌ ಮಾಡಿಕೊಂಡಿದ್ದು ಅದನ್ನು ಅವರ ಸ್ನೇಹಿತ, ಕೇಶವಿನ್ಯಾಸಕಾರ ಹಕಿಮ್‌ ಅಲಿಂ ಸೋಶಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿಕೊಂಡಿದ್ದಾರೆ. ಪ್ಲಾಟಿನಮ್‌ ಬ್ಲಾಂಡ್‌ ಹೇರ್‌ಸ್ಟೈಲ್‌ನಲ್ಲಿ ಸಂಜಯ್‌ ದತ್ ಮಿಂಚುತ್ತಿದ್ದಾರೆ. ಈ ಲುಕ್‌ ಅಭಿಮಾನಿಗಳಿಗೆ ತುಂಬ ಇಷ್ಟ ಆಗಿದೆ.
ಇಲ್ಲೊಂದು ಟ್ವಿಸ್ಟ್‌ ಕೂಡ ಇದೆ. ‘ಕೆಜಿಎಫ್‌: ಚಾಪ್ಟರ್‌ 2’ ಚಿತ್ರಕ್ಕಾಗಿ ಸಂಜಯ್‌ ದತ್ ಈ ರೀತಿ ಸಜ್ಜಾಗುತ್ತಿದ್ದಾರಾ ಎಂಬ ಅನುಮಾನ ಮೂಡುತ್ತಿದೆ. ಯಾಕೆಂದರೆ, ಯಶ್‌ ನಾಯಕತ್ವದ ಈ ಸಿನಿಮಾದಲ್ಲಿ ಅಧೀರ ಎಂಬ ಖಡಕ್‌ ಪಾತ್ರ ಸಂಜಯ್‌ ಮಾಡುತ್ತಿದ್ದು ನವೆಂಬರ್‌ನಲ್ಲಿ ಶೂಟಿಂಗ್‌ಗೆ ಮರಳಲಿದ್ದಾರೆ ಎನ್ನಲಾಗಿದೆ. ಚಿತ್ರೀಕರಣದಲ್ಲಿ ಭಾಗಿಯಾಗುವ ದಿನ ಹತ್ತಿರ ಬರುತ್ತಿದ್ದಂತೆಯೇ ಅವರು ಹೀಗೆ ಹೊಸ ಗೆಟಪ್‌ನಲ್ಲಿ ಕಾಣಿಸಿಕೊಂಡಿರುವುದು ಅಚ್ಚರಿ ಮೂಡಿಸುತ್ತಿದೆ.
Comments are closed.