ಪಟೌಡಿ ಅರಮನೆಗೆ 800 ಕೋಟಿ ರೂ. ನೀಡಿ ಹಿಂಪಡೆದ ಬಾಲಿವುಡ್ ನಟ ಸೈಫ್ ಅಲಿ ಖಾನ್‌!

ಹರಿಯಾಣದ ಗುರುಗಾವ್‌ನಲ್ಲಿರುವ ಪಟೌಡಿ ಮನೆತನಕ್ಕೆ ಸೇರಿದ ಅರಮನೆಯೊಂದಿದೆ. ಎಲ್ಲ ವಿವಾದಗಳ ಬಳಿಕ ಈ ಅರಮನೆ ಸೈಫ್‌ ಅಲಿಖಾನ್ ಗೆ ಸೇರಿದೆ.

ಪಟೌಡಿ ಕುಟುಂಬದ 10ನೇ ನವಾಬ ಸೈಫ್ ಅಲಿ ಖಾನ್. ಇತ್ತೀಚೆಗೆ ಸೈಫ್ ಮತ್ತು ಕರೀನಾ ಕಪೂರ್ ಅವರು ಹರಿಯಾಣದ ಪಟೌಡಿ ಅರಮನೆಯಲ್ಲಿ ಅವರ 8ನೇ ವರ್ಷದ ವಿವಾಹ ವಾರ್ಷಿಕೋತ್ಸವ ಆಚರಿಸಿಕೊಂಡಿದ್ದರು. ಆದರೆ ಈ ಅರಮನೆ ಪಡೆಯಲು ಎಷ್ಟು ಹಣ ಹೂಡಿದ್ದಾರೆ ಎಂದು ತಿಳಿದರೆ ನಿಜಕ್ಕೂ ಆಶ್ಚರ್ಯವಾಗುತ್ತದೆ. ಅಲ್ಲಿ ಯಾವುದೇ ಅನುವಂಶಿಕತೆ ಇರಲಿಲ್ಲ. ಈ ಅರಮನೆಯನ್ನು ಅವರು ಸಿನಿಮಾದಿಂದ ದುಡಿದ 800 ಕೋಟಿ ರೂ. ನೀಡಿ ಹಿಂಪಡೆದರು.

ಪಡೌಡಿ ಅರಮನೆಯು 10 ಎಕರೆ ವಿಸ್ತಾರದಿಂದ ಕೂಡಿದೆ. ಅಲ್ಲಿ 150 ಕೊಠಡಿಗಳಿವೆ. ಅವುಗಳಲ್ಲಿ 7 ಡ್ರೆಸ್ಸಿಂಗ್ ರೂಮ್, 7 ಬೆಡ್‌ರೂಮ್, 7 ಬಿಲಿಯರ್ಡ್ ರೂಮ್ ಇವೆ. ಸೈಫ್ ತಂದೆ ಕ್ರಿಕೆಟರ್ ಮಾನ್ಸೂರ್ ಅಲಿ ಖಾನ್ ಪಟೌಡಿ ನಿಧನದ ನಂತರದಲ್ಲಿ ಆ ಅರಮನೆಯನ್ನು ನೀಮ್ರಾನಾ ಹೋಟೆಲ್‌ನವರಿಗೆ ಲೀಸ್ ಕೊಡಲಾಗಿತ್ತು. 2014ರವರೆಗೆ ಆ ಅರಮನೆಯನ್ನು ವೈಭೋಗಯುತ ಹೋಟೆಲ್‌ ಆಗಿ ಮಾರ್ಪಡಿಸಲಾಗಿತ್ತು.

ಈ ಬಗ್ಗೆ ಸಂದರ್ಶನದಲ್ಲಿ ಮಾತನಾಡಿದ್ದ ಸೈಫ್ ಅಲಿ ಖಾನ್ ಅವರು, ‘ಜನರಿಗೆ ಒಂದು ಕಲ್ಪನೆಯಿದೆ. ನನ್ನ ತಂದೆ ತೀರಿಕೊಂಡಾಗ ನೀಮ್ರಾನಾ ಹೋಟೆಲ್‌ನವರಿಗೆ ಬಾಡಿಗೆ ರೂಪದಲ್ಲಿ ಆ ಅರಮನೆ ನೀಡಿದೆವು. ಅದನ್ನು ಹೋಟೆಲ್ ಆಗಿ ಫ್ರಾನ್ಸಿಸ್, ಅಮಾನ್ ನಡೆಸಿಕೊಂಡು ಹೋಗುತ್ತಿದ್ದರು. ಫ್ರಾನ್ಸಿಸ್ ತೀರಿಕೊಂಡರು, ಆಮೇಲೆ ಈ ಅರಮನೆ ನನಗೆ ಬೇಕು ಅಂದರೆ ದೊಡ್ಡ ಮೊತ್ತದ ಹಣ ನೀಡಬೇಕು ಅಂತ ಹೇಳಿದರು. ನನಗೆ ಆ ಮನೆ ಬೇಕಿತ್ತು. ಹೀಗಾಗಿ ನಾನು ಸಂಪಾದನೆ ಮಾಡಿದ ಹಣ ಬಳಸಿ ಮತ್ತೆ ಅರಮನೆ ಪಡೆದುಕೊಂಡೆ’ ಎಂದು ಹೇಳಿದ್ದಾರೆ.

‘ಅನುವಂಶಿಕವಾಗಿ ಬಂದ ಮನೆಯನ್ನು ಸಿನಿಮಾಗಳಿಂದ ಬಂದ ಹಣ ನೀಡಿ ಪಡೆದುಕೊಳ್ಳುವಂತಾಯಿತು. ಹಳೇ ಬದುಕನ್ನಂತೂ ಜೀವಿಸಲು ಆಗದು. ಅಲ್ಲಿ ಏನೂ ಇಲ್ಲ ಅಂತಾದರೆ ನಾವು ಕುಟುಂಬದವರು ಏನೂ ಅಲ್ಲ ಅಂತಾಗುತ್ತದೆ. ಅಲ್ಲಿ ಇತಿಹಾಸವಿದೆ, ಸಂಸ್ಕೃತಿಯಿದೆ, ಸುಂದರ ಫೋಟೋಗ್ರಾಫ್‌ಗಳಿವೆ. ಅಷ್ಟೇ ಅಲ್ಲದೆ ಭೂಮಿಯಿದೆ. ಇದು ನಿಜಕ್ಕೂ ಅಭಿವೃದ್ಧಿಪಡಿಸಬಹುದಾದ ಸೌಲತ್ತುಗಳಾಗಿವೆ. ಆದರೆ ಅಲ್ಲಿ ಅನುವಂಶಿಕತೆ ಇಲ್ಲ’ ಎಂದು ಸೈಫ್ ಅಲಿ ಖಾನ್ ಹೇಳಿದ್ದಾರೆ.