ಕೊರೊನಾ ಪಾಸಿಟಿವ್ ವರದಿ ಬಂದವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯಬೇಕಲ್ಲವೇ? ಆದರೆ ಹಿಂದಿಯ ಜನಪ್ರಿಯ ಧಾರಾವಾಹಿ ‘ಯೇ ರಿಶ್ತಾ ಕ್ಯಾ ಕೆಹಲಾತಾ ಹೈ’ ನಟಿ ಮೋಹಿನಾ ಕುಮಾರಿ ಸಿಂಗ್‌ ಅವರಿಗೆ ಕೊರೊನಾ ಪಾಸಿಟಿವ್ ಇದ್ದರೂ ಕೂಡ ಆಸ್ಪತ್ರೆಯಿಂದ ಮನೆಗೆ ವಾಪಸ್‌ ಬಂದಿದ್ದಾರೆ. ಈ ಬಗ್ಗೆ ಸ್ವತಃ ಅವರೇ ಮಾಹಿತಿ ಬಹಿರಂಗ ಪಡಿಸಿದ್ದಾರೆ.
ಕೆಲವೇ ದಿನಗಳ ಹಿಂದೆ ಮೋಹಿನಾ ಕುಮಾರಿ ಅವರೂ ಸೇರಿದಂತೆ ಕುಟುಂಬದ ಕೆಲವು ಸದಸ್ಯರಿಗೆ ಕೊರೊನಾ ಸೋಂಕು ತಗುಲಿರುವುದು ಧೃಡವಾಗಿತ್ತು. ಕೂಡಲೇ ಆಸ್ಪತ್ರೆಗೆ ದಾಖಲಾಗಿದ್ದರು. ಒಂದು ಹಂತದ ಚಿಕಿತ್ಸೆ ನೀಡಿದ ನಂತರವೂ ಅವರೆಲ್ಲರಿಗೆ ಪಾಸಿಟಿವ್ ವರದಿ ಬಂದಿದೆ. ಆದರೆ ಈಗ ವಾಪಸ್‌ ಮನೆಗೆ ಬಂದಿದ್ದಾರೆ. ಇನ್‌ಸ್ಟಾಗ್ರಾಮ್‌ ಸ್ಟೋರಿ ಮೂಲಕ ಈ ವಿಚಾರವನ್ನು ಮೋಹಿನಾ ಹಂಚಿಕೊಂಡಿದ್ದಾರೆ.
‘ನಾನು ಮನೆಗೆ ಬಂದಿದ್ದೇನೆ. ಆದರೆ ಇನ್ನೂ ಕೋವಿಡ್‌-19 ಪಾಸಿಟಿವ್ ಆಗಿದ್ದೇನೆ. ನಾವು ಸಂಪೂರ್ಣ ಐಸೋಲೇಷನ್‌ನಲ್ಲಿ ಇದ್ದೇವೆ. ನೆಗೆಟಿವ್‌ ವರದಿ ಬರಲು ಇನ್ನೂ ಎಷ್ಟು ಸಮಯ ಬೇಕಾಗುತ್ತದೋ ನಮಗೆ ಗೊತ್ತಿಲ್ಲ. ಒಟ್ಟು 10 ದಿನ ನಾವು ಆಸ್ಪತ್ರೆಯಲ್ಲಿ ಇದ್ದೆವು. ಅದಕ್ಕೂ ಐದು ದಿನ ಮೊದಲೇ ನನ್ನ ದೇಹದಲ್ಲಿ ವೈರಸ್‌ ಇತ್ತು ಎನಿಸುತ್ತದೆ. ಇನ್ನು ಕೆಲವೇ ದಿನಗಳಲ್ಲಿ ನಾವು ವೈರಸ್‌ ವಿರುದ್ಧ ಜಯ ಸಾಧಿಸಲಿದ್ದೇವೆ ಎಂಬ ಭರವಸೆ ಇದೆ. ಆದರೆ ಅಲ್ಲಿಯವರೆಗೂ ನಾವು ಕಟ್ಟುನಿಟ್ಟಾಗಿ ನಿಯಮ ಪಾಲಿಸಬೇಕಿದೆ. ಹಾಗಿದ್ದರೂ ಆರೋಗ್ಯದಲ್ಲಿ ಮತ್ತು ಮಾನಸಿಕವಾಗಿ ತುಂಬ ಸುಧಾರಿಸಿಕೊಂಡಿದ್ದೇವೆ ಎನಿಸುತ್ತಿದೆ. ನಿಮ್ಮೆಲ್ಲರ ಬೆಂಬಲಕ್ಕೆ ಧನ್ಯವಾದಗಳು’ ಎಂದು ಮೋಹಿನಾ ಬರೆದುಕೊಂಡಿದ್ದಾರೆ.
ಮೋಹಿನಾ ಮತ್ತು ಅವರ ಕುಟುಂಬದವರಿಗೆ ಕೊರೊನಾ ಸೋಂಕು ತಗುಲಿದ ವಿಚಾರ ತಿಳಿಯುತ್ತಿದ್ದಂತೆಯೇ ಹಿತೈಷಿಗಳು ಮತ್ತು ಅಭಿಮಾನಿಗಳು ಅವರು ಬೇಗ ಗುಣಮುಖ ಆಗಲಿ ಎಂದು ಹಾರೈಸುತ್ತಿದ್ದಾರೆ. ‘ಯೇ ರಿಶ್ತಾ ಕ್ಯಾ ಕೆಹಲಾತಾ ಹೈ’ ಧಾರಾವಾಹಿಯಲ್ಲಿ ಮೋಹಿನಾಗೆ ಪತಿಯಾಗಿ ನಟಿಸಿದ್ದ ರಿಶಿ ದೇವ್‌ ಸಹ ಇನ್‌ಸ್ಟಾಗ್ರಾಮ್‌ ಮೂಲಕ ಪ್ರಾರ್ಥಿಸಿಕೊಂಡಿದ್ದಾರೆ.
ಮೋಹಿನಾ ಕುಟುಂಬದ ಒಟ್ಟು 7 ಜನರಿಗೆ ಕೊರೊನಾ ವೈರಸ್‌ ತಲುಗಿತ್ತು. ಈ ಸುದ್ದಿಯನ್ನು ಸ್ವತಃ ಮೋಹಿನಾ ಖಚಿತಪಡಿಸಿದ್ದರು. ‘ನಮಗೆ ಕೆಲವು ಲಕ್ಷಣಗಳು ಕಾಣಿಸಿಕೊಂಡಿತ್ತಾದರೂ ವಾತಾವರಣದ ಬದಲಾವಣೆಯಿಂದ ಹೀಗೆ ಆಗಿರಬಹುದು ಎಂದುಕೊಂಡಿದ್ದೆವು. ಯಾರಿಗೂ ಕೊರೊನಾದ ತೀವ್ರ ಲಕ್ಷಣ ಇರಲಿಲ್ಲ. ಕೊರೊನಾ ಕಾಡ್ಗಿಚ್ಚಿನ ರೀತಿ ಹರಡುತ್ತದೆ. ಮೊದಲು ನಮ್ಮ ಅತ್ತೆಗೆ ಬಂತು. ಲಕ್ಷಣಗಳು ಗೋಚರಿಸದ ಕಾರಣ ನಮಗೆ ಬೇಗ ಗೊತ್ತಾಗಲಿಲ್ಲ’ ಎಂದು ಆಸ್ಪತ್ರೆಗೆ ಸೇರಿದ ಎರಡನೇ ದಿನ ಮೋಹಿನಾ ಹೇಳಿದ್ದರು.
Comments are closed.