‘ಸೇವಂತಿ’ ಧಾರಾವಾಹಿಯಲ್ಲಿ ನಟಿ ಪ್ರಿಯಾಂಕಾ ಉಪೇಂದ್ರ!

ನಟಿ ಪ್ರಿಯಾಂಕಾ ಉಪೇಂದ್ರ ಒಂದು ಕಾಲದಲ್ಲಿ ನಾಯಕಿಯಾಗಿ ಮಿಂಚಿದವರು. ನಂತರ ‘ರಿಯಲ್‌ ಸ್ಟಾರ್’ ಉಪೇಂದ್ರ ಅವರೊಂದಿಗೆ ಮದುವೆಯಾದ ಅವರು, ನಟನೆಯಿಂದ ದೂರ ಉಳಿದು ಕುಟುಂಬಕ್ಕೆ ಸಮಯ ನೀಡಿದ್ದರು. ಆನಂತರ ಬಣ್ಣದ ಲೋಕಕ್ಕೆ ಮರಳಿದ ಪ್ರಿಯಾಂಕಾ, ಮಹಿಳಾ ಪ್ರಧಾನ ಸಿನಿಮಾಗಳಲ್ಲಿ ನಟಿಸುತ್ತ, ಗಮನಸೆಳೆಯುತ್ತಿದ್ದಾರೆ. ಸದ್ಯ ಅವರೀಗ ಕಿರುತೆರೆಯತ್ತ ಮುಖ ಮಾಡಿದ್ದಾರೆ!

ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತಿರುವ ‘ಸೇವಂತಿ’ ಧಾರಾವಾಹಿಯು ಈಗಾಗಲೇ ಮುನ್ನೂರು ಸಂಚಿಕೆಗಳನ್ನು ಪೂರೈಸಿ, ವೀಕ್ಷಕರ ಪ್ರೀತಿಯನ್ನು ಗಳಿಸಿದೆ. ಇದೀಗ ಈ ಧಾರಾವಾಹಿಯಲ್ಲಿ ಪ್ರಿಯಾಂಕಾ ಒಂದು ಪಾತ್ರ ಮಾಡಲಿದ್ದಾರೆ. ಹಾಗಂತ, ಇದು ಪೂರ್ಣಪ್ರಮಾಣದ ಪಾತ್ರವಲ್ಲ, ಅತಿಥಿ ಪಾತ್ರ. ಆದರೆ, ‘ಸೇವಂತಿ’ ಕಥೆಯೊಳಗೆ ಅವರು ನಿಭಾಯಿಸಲಿರುವ ಪಾತ್ರ ಯಾವ ರೀತಿ ಬೆಸೆದುಕೊಳ್ಳಲಿದೆ ಎಂಬುದು ಸದ್ಯದ ಕುತೂಹಲ.

ಮೋಸಕ್ಕೆ ಒಳಗಾಗಿ ಜೈಲು ಸೇರಿರುವ ಸಾಕು ತಂದೆಯನ್ನು ಬಿಡಿಸುವ ಸಲುವಾಗಿ ಸೇವಂತಿ ಒಂದು ವರ್ಷದ ಒಪ್ಪಂದದ ಮೇರೆಗೆ ಲಾಯರ್ ಅರ್ಜುನ್ ಜೊತೆ ಗುಟ್ಟಾಗಿ ಮದುವೆಯಾಗಿದ್ದಳು. ಈಗ ಇಬ್ಬರೂ ಮನಪೂರ್ವಕವಾಗಿ ಒಪ್ಪಿ ಒಂದಾಗಿದ್ದಾರೆ. ಆದರೆ ಖಳನಾಯಕಿ ಪ್ರಿಯಾ, ಅರ್ಜುನ್ ತಮ್ಮ ಅಶ್ವಿನ್‌ನನ್ನು ಮದುವೆಯಾದರೆ ತಾನು ಮಾಡಿರೋ ತಪ್ಪಿಗೆ ಶಿಕ್ಷೆ ಆಗುವುದಿಲ್ಲವೆಂದು ಪ್ಲ್ಯಾನ್ ಮಾಡುತ್ತಾಳೆ. ಅಶ್ವಿನ್ ಮದುವೆಯ ವಿಷಯವಾಗಿ ಜೇನುಗೂಡಿನಂತಿದ್ದ ಮನೆಯಲ್ಲಿ ವೈಮನಸ್ಸು ಶುರುವಾಗುವುದು. ಈ ಎಲ್ಲಾ ಸಮಸ್ಯೆಗಳನ್ನು ಸೇವಂತಿ ಹೇಗೆ ಎದುರಿಸುತ್ತಾಳೆ? ಪ್ರಿಯಾಂಕಾ ಉಪೇಂದ್ರ ಅವರ ಪಾತ್ರ ಸೇವಂತಿಗೆ ಈ ಸಮಯದಲ್ಲಿ ಯಾವ ರೀತಿ ಸಾಥ್ ನೀಡಲಿದೆ ಎಂಬುದು ಸದ್ಯದ ಕುತೂಹಲಕಾರಿ ಅಂಶವಾಗಿದೆ. ಈ ಧಾರಾವಾಹಿಯೂ ಸೋಮವಾರದಿಂದ ಶುಕ್ರವಾರದ ವರೆಗೆ ರಾತ್ರಿ 7.30ಕ್ಕೆ ಪ್ರಸಾರವಾಗುತ್ತಿದೆ.

ಅಂದಹಾಗೆ, ಪ್ರಿಯಾಂಕಾ ಅವರಿಗೆ ಧಾರಾವಾಹಿ ಹೊಸದೇನಲ್ಲ. ಈ ಹಿಂದೆ ‘ದೇವತೆ’, ‘ನಾನು ನನ್ನ ಕನಸು’ ಧಾರಾವಾಹಿಗಳಲ್ಲಿ ಅವರು ಅತಿಥಿ ಪಾತ್ರಗಳನ್ನು ನಿಭಾಯಿಸಿದ್ದರು. ಜೊತೆಗೆ ‘ಸದಾ ನಿಮ್ಮೊಂದಿಗೆ’ ಶೋನಲ್ಲಿ ಭಾಗವಹಿಸಿ, ಹೂವು ವ್ಯಾಪಾರಿಯೊಬ್ಬರಿಗೆ ಸಹಾಯ ಮಾಡಿದ್ದರು. ಸಿನಿಮಾ ವಿಚಾರಕ್ಕೆ ಬರುವುದಾದರೆ, ತಮ್ಮ ಮಗಳು ಐಶ್ವರ್ಯಾ ಜೊತೆ ಪ್ರಿಯಾಂಕಾ ನಟಿಸಿದ್ದ ‘ದೇವಕಿ’ ಕಳೆದ ವರ್ಷ ರಿಲೀಸ್ ಆಗಿತ್ತು. ಸದ್ಯ ಅವರೀಗ ‘ಉಗ್ರಾವತಾರ’, ‘ಸೇಂಟ್ ಮಾರ್ಕ್ಸ್‌ ರೋಡ್’ ಎಂಬೆರಡು ಸಿನಿಮಾಗಳನ್ನು ಒಪ್ಪಿಕೊಂಡಿದ್ದಾರೆ. ಲಾಕ್‌ಡೌನ್‌ನಿಂದ ಶೂಟಿಂಗ್ ನಿಂತಿದೆ.