ಚಿತ್ರರಂಗದಲ್ಲಿ 18 ವರ್ಷ ಪೂರೈಸಿದ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್

ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರು ಕನ್ನಡ ಚಿತ್ರರಂಗದಲ್ಲಿ ಭರ್ಜರಿ 18 ವರ್ಷಗಳನ್ನು ಪೂರೈಸಿದ್ದಾರೆ. ಪುನೀತ್ ಸಿನಿಮಾಗಳೆಂದರೆ ಮನೆ ಮಂದಿಯಲ್ಲಾ ಕುಳಿತು ನೋಡುವಂತಹವು. ಇದುವರೆಗೂ ಅವರು ಆ ರೀತಿಯ ಸಿನಿಮಾಗಳಿಗೆ ಹೆಚ್ಚಿನ ಆದ್ಯತೆ ನೀಡುತ್ತಾ ಬಂದಿದ್ದಾರೆ.

ಮುಖ್ಯವಾಗಿ ಪುನೀತ್ ಸಿನಿಮಾಗಳೆಂದರೆ ನಟನೆಯ ಜೊತೆಗೆ ಅವರ ಅದ್ಭುತ ಡ್ಯಾನ್ಸಿಂಗ್ ಸ್ಕಿಲ್ ಪ್ರೇಕ್ಷಕರ ಪಾಲಿಗೆ ಡಬಲ್ ಧಮಾಕಾ ಇದ್ದಂತೆ. ಕನ್ನಡದ ಬೇರೆಲ್ಲಾ ನಟರಿಗಿಂತ ಪುನೀತ್ ರಾಜ್ ಕುಮಾರ್ ಭಿನ್ನವಾಗಿ ಕಾಣಲು ಇದೂ ಒಂದು ಕಾರಣ ಆಗಿರಬಹುದು.

1976ರಲ್ಲಿ ತೆರೆಕಂಡ ‘ಪ್ರೇಮದ ಕಾಣಿಕೆ’ ಸಿನಿಮಾದಲ್ಲಿ ಡಾ. ರಾಜ್ ಕುಮಾರ್ ಅವರ ಜೊತೆಗೆ ಅಭಿನಯಿಸುವ ಮೂಲಕ ಬಾಲ ಕಲಾವಿದರಾಗಿ ಬೆಳ್ಳಿಪರದೆಗೆ ಪ್ರವೇಶಿಸಿದರು ಪುನೀತ್ ರಾಜ್ ಕುಮಾರ್. ಇವರು ಕೊನೆಯದಾಗಿ ಬಾಲ ಕಲಾವಿದನಾಗಿ ಕಾಣಿಸಿಕೊಂಡ ಸಿನಿಮಾ ‘ಪರಶುರಾಮ್’.

2002ರಲ್ಲಿ ಅಪ್ಪು ಸಿನಿಮಾ ಮೂಲಕ ಪೂರ್ಣ ಪ್ರಮಾಣದ ನಾಯಕ ನಟನಾಗಿ ಪದಾರ್ಪಣೆ ಮಾಡಿದ ಬಳಿಕ ಅಭಿಮಾನಿಗಳೂ ಅವರನ್ನು ಪ್ರೀತಿಯಿಂದ ಅಪ್ಪು ಎಂದೇ ಕರೆಯುವಂತಾಯಿತು. ಈ ಸಿನಿಮಾ ರಕ್ಷಿತಾ ಅವರ ವೃತ್ತಿ ಬದುಕಿಗೂ ನಾಂದಿ ಹಾಡಿತು. ಈ ಸಿನಿಮಾ ತೆರೆಕಂಡು, ಪುನೀತ್ ಪೂರ್ಣ ಪ್ರಮಾಣದ ನಾಯಕ ನಟನಾಗಿ ಚಿತ್ರರಂಗಕ್ಕೆ ಅಡಿಯಿಟ್ಟು ಇಂದಿಗೆ 18 ವರ್ಷಗಳಾಗುತ್ತಿವೆ. ಅಬ್ಬಾ ಸಮಯ ಎಷ್ಟು ಬೇಗ ಸರಿದು ಹೋಯಿತು ಅಲ್ಲವೇ?

ಪುರಿ ಜಗನ್ನಾಥ್ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಸಿನಿಮಾ ಬಳಿಕ ತೆಲುಗು, ತಮಿಳು, ಬಂಗಾಳಿ ಹಾಗೂ ಬಾಂಗ್ಲಾದೇಶಿ ಬಂಗಾಳಿ ಭಾಷೆಗಳಲ್ಲಿ ರೀಮೇಕ್ ಆಗಿದೆ. 1986ರಲ್ಲಿ ತೆರೆಕಂಡ ‘ಅನುರಾಗ ಅರಳಿತು’ ಸಿನಿಮಾ ಬಳಿಕ ಬಾಂಗ್ಲಾದೇಶಿ ಬಂಗಾಳಿ ಭಾಷೆಗೆ ರೀಮೇಕ್ ಆಗುತ್ತಿರುವ ಎರಡನೇ ಸಿನಿಮಾ ಇದು. ಸ್ಕೂಲ್ ಮಾಸ್ಟರ್, ಅನುರಾಗ ಅರಳಿತು ಸಿನಿಮಾಗಳ ಬಳಿಕ ನಾಲ್ಕು ಭಾಷೆಗಳಿಗೆ ರೀಮೇಕ್ ಆದ ಮೂರನೇ ಸಿನಿಮಾ ಎಂಬ ಹೆಗ್ಗಳಿಕೆಗೆ ಅಪ್ಪು ಪಾತ್ರವಾಗಿದೆ.

ಅಪ್ಪು ಸಿನಿಮಾ ರಿಲೀಸ್ ಆಗಿ ಇಂದಿಗೆ 18 ವರ್ಷಗಳು ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಪುನೀತ್ ಅಭಿಮಾನಿಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ಪೋಸ್ಟರ್ ಗಳನ್ನು ಹಾಕಿ ತಮ್ಮ ಅಭಿಮಾನದ ನಟನನ್ನು ಹಾರೈಸುತ್ತಿದ್ದಾರೆ.

ಸದ್ಯಕ್ಕೆ ಪುನೀತ್ ರಾಜ್ ಕುಮಾರ್ ಅವರು ಯುವರತ್ನ ಹಾಗೂ ಜೇಮ್ಸ್ ಸಿನಿಮಾಗಳಲ್ಲಿ ತೊಡಗಿಕೊಂಡಿದ್ದಾರೆ. ಈ ಸಿನಿಮಾಗಳ ಬಗ್ಗೆಯೂ ಅಪಾರ ನಿರೀಕ್ಷೆಗಳಿವೆ. ಕೊರೊನಾ ಹಾಗೂ ಲಾಕ್‌ಡೌನ್ ಹಿನ್ನೆಲೆಯಲ್ಲಿ ಸದ್ಯಕ್ಕೆ ಈ ಸಿನಿಮಾ ಚಟುವಟಿಕೆಗಳು ನಿಂತಿವೆ. ಎಲ್ಲವೂ ಸರಿ ಹೋದ ಬಳಿಕ ಮತ್ತೆ ಪುನೀತ್ ಹವಾ ಶುರುವಾಗಲಿದೆ. ಕನ್ನಡ ಚಿತ್ರರಂಗದಲ್ಲಿ 18 ವರ್ಷ ಪೂರೈಸಿದ ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್ ಅವರಿಗೆ ಅಭಿನಂದನೆಗಳು. ನೀವೂ ಕಾಮೆಂಟ್ ಮಾಡುವ ಮೂಲಕ ಪುನೀತ್ ಅವರಿಗೆ ಶುಭ ಹಾರೈಸಿ.