‘ಬಾಸ್’​ ವಿಚಾರಕ್ಕೆ ಸಂಬಂಧಿಸಿದಂತೆ ಯಶ್​ – ದರ್ಶನ್​ ಅಭಿಮಾನಿಗಳ ನಡುವೆ ಕಿತ್ತಾಟ !

ಸ್ಯಾಂಡಲ್​ವುಡ್​ಗೆ ಸ್ಟಾರ್​ ವಾರ್​ ಹೊಸದೇನಲ್ಲ. ಈ ಮೊದಲು ಸಾಕಷ್ಟು ಸ್ಟಾರ್​ ನಟರ ನಡುವೆ ತಿಕ್ಕಾಟ ನಡೆದ ಉದಾಹರಣೆ ಇದೆ. ಇತ್ತೀಚೆಗೆ ದರ್ಶನ್​ ಹಾಗೂ ಸುದೀಪ್​ ನಡುವೆ ತಣ್ಣನೆಯ ವಾರ್​ ನಡೆಯುತ್ತಿದೆ ಎನ್ನಲಾಗುತ್ತಿದೆ. ಈಗ ಮತ್ತೆ ಸ್ಯಾಂಡಲ್​ವುಡ್​ನಲ್ಲಿ ಸ್ಟಾರ್​ ಸಮರ​ ನಡೆಯುವ ಲಕ್ಷಣ ಗೋಚರವಾಗಿದೆ! ಇದರಿಂದಾಗಿ ಅಭಿಮಾನಿಗಳ ನಡುವೆಯೂ ಕಿತ್ತಾಟ ಆರಂಭಗೊಂಡಿದೆ.

ಅಷ್ಟಕ್ಕೂ ಯಾರ ನಡುವೆ ಈ ಸಮರ​? ಯಶ್​ ಹಾಗೂ ದರ್ಶನ್! ಹೌದು, ಬಾಸ್​ ವಿಚಾರಕ್ಕೆ ಸಂಬಂಧಿಸಿದಂತೆ ಯಶ್​ ಹಾಗೂ ದರ್ಶನ್​ ಫ್ಯಾನ್​ಗಳ ನಡುವೆ ಕಿತ್ತಾಟ​ ನಡೆಯುತ್ತಲೇ ಇದೆ. ದರ್ಶನ್​ ಇಂಡಸ್ಟ್ರಿಗೆ ಮೊದಲು ಬಂದವರು. ಅವರು ನಮ್ಮ ಬಾಸ್​ ಎಂದು ಅವರ ಅಭಿಮಾನಿಗಳು ಹೇಳಿಕೊಂಡಿದ್ದಾರೆ. ರಾಕಿಂಗ್​ ಸ್ಟಾರ್ ಅಭಿಮಾನಿಗಳು ‘ಯಶ್​’ ನಮ್ಮ ಬಾಸ್​ ಎಂದು ಬೀಗುತ್ತಿದ್ದಾರೆ.

ಈ ವಿಚಾರಕ್ಕೆ ಇಬ್ಬರ ಅಭಿಮಾನಿಗಳ ನಡುವೆ ತಿಕ್ಕಾಟ ಇದ್ದೇ ಇದೆ. ಈಗ ಯಶ್​ ಮಾಡಿದ ಟ್ವೀಟ್​ ಸಾಮಾಜಿಕ ಜಾಲತಾಣದಲ್ಲಿ ಫ್ಯಾನ್​ವಾರ್​ಗೆ ಕಾರಣವಾದರೂ ಆಶ್ಚರ್ಯವಿಲ್ಲ ಎನ್ನುವ ಅಭಿಪ್ರಾಯ ವ್ಯಕ್ತವಾಗಿದೆ.

ಗಡ್ಡದ ವಿಚಾರಕ್ಕೆ ಸಂಬಂಧಿಸಿ ಯಶ್​ ಟ್ವೀಟ್​ ಒಂದನ್ನು ಮಾಡಿದ್ದರು. ಅದು ಬಿಯಾರ್ಡೋ ಆಯಿಲ್​ನ ಜಾಹೀರಾತಿಗೆ ಸಂಬಂಧಿಸಿದ್ದು. ಇದರಲ್ಲಿ #BeardoBoss ಎನ್ನುವ ಹ್ಯಾಶ್​ಟ್ಯಾಗ್​ ಬಳಕೆ ಮಾಡಿದ್ದಾರೆ ಯಶ್​. ಇದರಲ್ಲಿ ಬಾಸ್​ ಎನ್ನುವ ವಿಚಾರ ಬಂದಿದ್ದೇ ತಡ, ಯಶ್​ ಅಭಿಮಾನಿಗಳು #YashBoss ಹ್ಯಾಶ್​ಟ್ಯಾಗ್​ ಅಡಿಯಲ್ಲಿ ಟ್ವೀಟ್​ ಮಾಡಲು ಆರಂಭಿಸಿದ್ದಾರೆ.

ಇದು ದರ್ಶನ್​ ಅಭಿಮಾನಿಗಳನ್ನು ಕೆಣಕಿದೆ. “ನೀವು ಏನೇ ಹೇಳಿದರೂ ದರ್ಶನ್​ ಅವರೇ ನಿಜವಾದ ಬಾಸ್​. ಅವರನ್ನು ಬಿಟ್ಟು ಇಲ್ಲಿ ಬೇರೆ ಯಾವ ಬಾಸ್​ ಇಲ್ಲ,” ಎಂದು ಅವರು ಹೇಳಿದ್ದಾರೆ.