ಡ್ರೆಸ್​ ವಿಚಾರದಲ್ಲಿ ಕಾಜಲ್​ ಕಾಲೆಳೆದ ಸಾಹೋ ಪ್ರಭಾಸ್​!

ಮುಂಬೈ: ಪ್ರೀತಿಯ ವಿಚಾರದಲ್ಲಿ ಬಾಹುಬಲಿ ಖ್ಯಾತಿಯ ಪ್ರಭಾಸ್​ ಮತ್ತು ಅನುಷ್ಕಾ ಶೆಟ್ಟಿ ಸದಾ ಮುನ್ನೆಲೆಗೆ ಬರುತ್ತಾರೆ. ನಮ್ಮ ನಡುವೆ ಯಾವುದೇ ಪ್ರೀತಿಯಿಲ್ಲ ಎಂದು ವದಂತಿಯನ್ನು ತಳ್ಳಿಹಾಕಿದರೂ ಅವರಿಬ್ಬರ ಮೇಲಿನ ಚರ್ಚೆ ಮಾತ್ರ ಇನ್ನೂ ಕಡಿಮೆಯಾಗಿಲ್ಲ. ಇದರ ನಡುವೆ ನಟ ಪ್ರಭಾಸ್​ ಸಂದರ್ಶನವೊಂದರಲ್ಲಿ ಅನುಷ್ಕಾ ಬಗ್ಗೆ ಮಾತನಾಡಿ ಮತ್ತೆ ಸುದ್ದಿಯಾಗಿದ್ದಾರೆ.

ಸದ್ಯ ತಮ್ಮ ಮುಂದಿನ ಬಹುನಿರೀಕ್ಷಿತ “ಸಾಹೋ” ಚಿತ್ರದ ಬಿಡುಗಡೆಯನ್ನು ಎದುರು ನೋಡುತ್ತಿರುವ ಪ್ರಭಾಸ್​, ಸಂದರ್ಶನವೊಂದರಲ್ಲಿ ಅನುಷ್ಕಾ ಬಗ್ಗೆ ಕೇಳಿದಾಗ ಅವರ ವಿರುದ್ಧ ದೂರೊಂದನ್ನು ನೀಡಿದ್ದಾರೆ. ಅನುಷ್ಕಾ ನಡುವಿನ ಸಂಬಂಧದ ಬಗ್ಗೆ ಕೇಳಿದಾಗಲೆಲ್ಲ ಅದನ್ನು ನಿರಾಕರಿಸುವ ಪ್ರಭಾಸ್​ ಇದೀಗ ಅನುಷ್ಕಾ ಬಗ್ಗೆ ಮಾತನಾಡಿ ಮತ್ತೆ ಅಭಿಮಾನಿಗಳ ಗಮನ ಸೆಳೆದಿದ್ದಾರೆ.

ತೆಲುಗು ಮಾಧ್ಯಮದಲ್ಲಿ ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಮಾತನಾಡಿದ ಪ್ರಭಾಸ್​, ಅನುಷ್ಕಾ ಬ್ಯೂಟಿ ಮತ್ತು ಅವರ ಎತ್ತರದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಆದರೆ, ನಾನು ಕರೆ ಮಾಡಿದಾಗಲೆಲ್ಲ ಸರಿಯಾದ ಸಮಯಕ್ಕೆ ಕರೆಯನ್ನು ಸ್ವೀಕರಿಸುವುದಿಲ್ಲ ಎಂದು ದೂರಿದ್ದಾರೆ. ಇದರೊಂದಿಗೆ ಕಾಜಲ್​ ಅಗರ್​ವಾಲ್​ ಬಗ್ಗೆಯೂ ಮಾತನಾಡಿ, ಅವರೊಬ್ಬ ಸುಂದರವಾದ ನಟಿ. ಸಾಕಷ್ಟು ಸಾಮರ್ಥ್ಯವನ್ನು ಹೊಂದಿದ್ದಾರೆ ಎಂದು ಹೊಗಳಿದ್ದಲ್ಲದೆ, ಇತ್ತೀಚೆಗೆ ಅವರ ಡ್ರೆಸ್ಸಿಂಗ್​ ಸೆನ್ಸ್​ ಉತ್ತಮವಾಗಿದೆ ಎಂದಿದ್ದಾರೆ.

ಸದ್ಯ ಸಾಹೋ ಚಿತ್ರದ ಪ್ರಮೋಷನಲ್​ನಲ್ಲಿ ಪ್ರಭಾಸ್​ ಬಿಜಿಯಾಗಿದ್ದಾರೆ. ಪ್ರಭಾಸ್​ಗೆ ನಟಿ ಶ್ರದ್ಧಾ ಕಪೂರ್​ ಸಾಥ್​ ನೀಡುತ್ತಿದ್ದಾರೆ. ಚಿತ್ರವೂ ಆಗಸ್ಟ್​ 30ರಂದು ತೆರೆಗೆ ಅಪ್ಪಳಿಸಲಿದೆ. ಚಿತ್ರವನ್ನು ಸುಜೀತ್​ ಎಂಬುವರು ನಿರ್ದೇಶಿಸಿದ್ದಾರೆ. ಈ ವರ್ಷದ ಬಿಗ್​ ಬಜೆಟ್​ ಚಿತ್ರವಾಗಿದ್ದು, ಬಾಹುಬಲಿಯಂತಹ ಐತಿಹಾಸಿಕ ಚಿತ್ರದ ಬಳಿಕ ಮತ್ತೆ ಆ್ಯಕ್ಸನ್​ ಚಿತ್ರಗಳಿಗೆ ಪ್ರಭಾಸ್​ ಮರಳಿರುವುದರಿಂದ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆ ಇದೆ.