ನಟ ಸುಧೀರ್​ ನಿಧನರಾಗಿ 20 ವರ್ಷ: ತಂದೆಯ ಫೋಟೋ ಶೇರ್​ ಮಾಡಿದ ತರುಣ್​

ಬೆಂಗಳೂರು: ಖಳನಟ ಹಾಗೂ ಪೋಷಕನಟನಾಗಿ ಕನ್ನಡದ 350ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದ ಸುಧೀರ್​ ಮೃತಪಟ್ಟು ಇಂದು 20 ವರ್ಷಗಳೇ ಕಳೆದವು.

ತೆರೆಯ ಮೇಲೆ ಕ್ರೂರ ಪಾತ್ರದಲ್ಲಿ ಮಿಂಚಿದ್ದೇ ಹೆಚ್ಚು. ಆದರೆ ನಿಜಜೀವನದಲ್ಲಿ ತುಂಬ ಒಳ್ಳೆಯ ವ್ಯಕ್ತಿಯಾಗಿದ್ದರು. ಕೆಟ್ಟ ಹವ್ಯಾಸಗಳೇ ಇಲ್ಲದೆ ಬದುಕಿದ್ದರು. 2000ರ ಜೂನ್​ 13ರಂದು ನಿಧನರಾಗಿದ್ದರು.
ಇಂದಿಗೆ ಅವರು ಮೃತಪಟ್ಟು 20 ವರ್ಷವಾಗಿದ್ದು ಅವರ ನೆನಪಲ್ಲಿ ಪುತ್ರ, ಖ್ಯಾತ ನಿರ್ದೇಶಕ, ನಟ ತರುಣ್​ ಸುಧೀರ್​ ಟ್ವೀಟ್​ ಮಾಡಿದ್ದಾರೆ. ಅಪ್ಪಾ, ನೀವು ನಮ್ಮನ್ನು ಅಗಲಿ ಇಂದಿಗೆ 20 ವರ್ಷಗಳಾಗಿವೆ. ಇಂದು ನಾನೇನು ಆಗಿದ್ದೇನೋ, ನಾನೇನು ಸಾಧನೆ ಮಾಡುತ್ತಿದ್ದೇನೋ ಅದೆಲ್ಲವೂ ನಿಮ್ಮ ಆಶೀರ್ವಾದ ಎಂದು ಬರೆದಿದ್ದಾರೆ.

ಅಲ್ಲದೆ, ನೀನು ಇರುವ ಧೈರ್ಯದಲ್ಲಿ ಯಾರೊಂದಿಗೂ ನಾನು ಸೋಲಲ್ಲ, ನಿನ್ನ ಪ್ರೀತಿ ಎದುರು ಏನೂ ಇಲ್ಲ. ಅಪ್ಪ ಐ ಲವ್​ ಯು ಎಂದು ಟ್ವೀಟ್​ ಮಾಡಿದ್ದಾರೆ.

ಸುಧೀರ್​ ಅವರು 70ರ ದಶಕದಲ್ಲಿ ಸಿನಿಮಾ ಕ್ಷೇತ್ರ ಪ್ರವೇಶಿಸಿ 1999ರವರೆಗೂ ಹಲವು ಸಿನಿಮಾಗಳಲ್ಲಿ ನಟಿಸಿದ್ದರು. ಎಸ್​.ಪಿ.ಸಾಂಗ್ಲಿಯಾನ, ಅಗ್ನಿಪಂಜರ, ಅದೇ ಕಣ್ಣು ಸೇರಿ ಅನೇಕ ಸೂಪರ್​ಹಿಟ್​ ಸಿನಿಮಾಗಳಲ್ಲಿ ಅದ್ಭುತವಾಗಿ ಅಭಿನಯ ಮಾಡಿದ್ದರು.

ಈಗ ಅವರ ಇಬ್ಬರು ಮಕ್ಕಳಾದ ತರುಣ್​ ಸುಧೀರ್​ ಹಾಗೂ ನಂದಕಿಶೋರ್​ ಸುಧೀರ್​ ಸಿನಿಮಾ ನಿರ್ದೇಶಕರಾಗಿದ್ದಾರೆ.