ನಟ ಶಾರುಖ್ ಖಾನ್ ಕೇವಲ ನಟನಾಗಿ ಮಾತ್ರವಲ್ಲ ವಿಲನ್ ಆಗಿಯೂ ಗುರುತಿಸಿಕೊಂಡಿದ್ದಾರೆ. ಹಿಂದಿಯ ‘ಡಾನ್’ ಚಿತ್ರದಲ್ಲಿ ಅವರು ನೆಗೆಟಿವ್ ಶೆಡ್ ಪಾತ್ರ ನಿರ್ವಹಿಸಿದ್ದರು. ಈಗ ಮತ್ತೆ ಅವರು ಇಂಥದ್ದೇ ಪಾತ್ರಕ್ಕೆ ಬಣ್ಣ ಹಚ್ಚ ಹೊರಟಿದ್ದಾರೆ. ಅದೂ ಕಾಲಿವುಡ್ನಲ್ಲಿ!
ಶಾರುಖ್ ಖಾನ್ ತಮಿಳು ಚಿತ್ರರಂಗಕ್ಕೆ ಕಾಲಿಡಲಿದ್ದಾರೆ ಎನ್ನುವ ವರದಿ ಹರಿದಾಡುತ್ತಿದೆ. ವಿಶೇಷ ಎಂದರೆ, ಶಾರುಖ್ ವಿಲನ್ ಆಗಿ ಕಾಣಿಸಿಕೊಳ್ಳುತ್ತಿರುವುದು ಕಾಲಿವುಡ್ನ ಸ್ಟಾರ್ ನಟ ‘ದಳಪತಿ’ ವಿಜಯ್ಗೆ!
ವಿಜಯ್ 63ನೇ ಸಿನಿಮಾಗೆ ವಿಲನ್ ಹುಡುಕಾಟದಲ್ಲಿದ್ದಾರೆ ನಿರ್ದೇಶಕ ಅಟ್ಲೀ ಕುಮಾರ್. ಈ ಚಿತ್ರದಲ್ಲಿ ಬರುವ ಪ್ರಮುಖ ವಿಲನ್ ಕ್ಲೈಮ್ಯಾಕ್ಸ್ನಲ್ಲಿ ಕಾಣಿಸಿಕೊಳ್ಳಲಿದ್ದಾನಂತೆ. “ಬಾಲಿವುಡ್ನ ನಟನನ್ನು ವಿಲನ್ ಆಗಿ ಆಯ್ಕೆ ಮಾಡಿಕೊಳ್ಳಬೇಕು ಎನ್ನುವ ಆಲೋಚನೆ ಚಿತ್ರತಂಡದ್ದು. ಈ ವಿಲನ್ ಪಾತ್ರ 15 ನಿಮಿಷ ತೆರೆಮೇಲೆ ಬರಲಿದೆ. ಈಗಾಗಲೇ ಶಾರುಖ್ ಖಾನ್ ಅವರನ್ನು ಸಂಪರ್ಕಿಸಿದ್ದು ಅವರು ಒಪ್ಪಿದ್ದಾರೆ,” ಎಂಬುದು ಮೂಲಗಳ ಮಾಹಿತಿ.
ಶಾರುಖ್ ಇರುವ ದೃಶ್ಯಗಳನ್ನು ಐದು ದಿನಗಳ ಕಾಲ ಶೂಟ್ ಮಾಡಲಾಗುತ್ತದೆಯಂತೆ. ಮುಂಬೈ ಅಥವಾ ಚೆನ್ನೈನಲ್ಲಿ ಚಿತ್ರೀಕರಣ ಮಾಡಲು ನಿರ್ಧರಿಸಲಾಗಿದೆ. ಇತ್ತೀಚೆಗೆ ಚೆನ್ನೈನಲ್ಲಿ ನಡೆದ ಐಪಿಎಲ್ ಮ್ಯಾಚ್ ವೇಳೆ ಶಾರುಖ್ ಹಾಗೂ ನಿರ್ದೇಶಕ ಅಟ್ಲೀ ಕುಮಾರ್ ಅಕ್ಕಪಕ್ಕ ಕೂತಿದ್ದರು. ಈ ಗಾಸಿಪ್ ಹರಿದಾಡಲು ಇದು ಕೂಡ ಕಾರಣ ಎನ್ನಲಾಗುತ್ತಿದೆ. ಅಂದಹಾಗೆ, ಈ ಬಗ್ಗೆ ಚಿತ್ರತಂಡವೇ ಅಧಿಕೃತ ಮಾಹಿತಿ ನೀಡಬೇಕಿದೆ.
ಶಾರುಖ್ ನಟನೆಯ ಸಾಲು ಸಾಲು ಚಿತ್ರಗಳು ಫ್ಲಾಪ್ ಆಗುತ್ತಿವೆ. ಕಳೆದ ವರ್ಷದ ಕೊನೆಯಲ್ಲಿ ತೆರೆಕಂಡ ‘ಝೀರೋ’ ಚಿತ್ರ ಫ್ಲಾಪ್ ಆಗಿತ್ತು. ತಮಿಳಿನಲ್ಲಿ ತೆರೆಕಂಡಿದ್ದ ‘ಮರ್ಸೆಲ್’ ಚಿತ್ರ ಹಿಂದಿಗೆ ರಿಮೇಕ್ ಆಗುತ್ತಿದ್ದು, ಇದರಲ್ಲಿ ಶಾರುಖ್ ಅಭಿನಯಿಸಲಿದ್ದಾರೆ ಎನ್ನಲಾಗಿದೆ.
Comments are closed.