ಸೋನಾಲಿ ಬೇಂದ್ರೆ ಆರೋಗ್ಯ ಸ್ಥಿರವಾಗಿದೆ ಎಂದು ಅವರ ಪತಿ ನಿರ್ಮಾಪಕ ಗೋಲ್ಡಿ ಬೆಹಲ್ ತಿಳಿಸಿದ್ದಾರೆ. ಸೋನಾಲಿ ಬೇಂದ್ರೆ ಕ್ಯಾನ್ಸರ್‌ನಿಂದ ಬಳಲುತ್ತಿದ್ದು ನ್ಯೂಯಾರ್ಕ್‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಗೋಲ್ಡಿ ಬೆಹಲ್ ಟ್ವೀಟ್ ಮಾಡಿ ತನ್ನ ಪತ್ನಿಯ ಆರೋಗ್ಯದ ಬಗ್ಗೆ ಮಾಹಿತಿ ನೀಡಿದ್ದಾರೆ.
“ಸೋನಾಲಿ ಬಗ್ಗೆ ನೀವು ತೋರುತ್ತಿರುವ ಕಾಳಜಿ ಮತ್ತು ಪ್ರೀತಿಗೆ ಕೃತಜ್ಞತೆಗಳು. ಆಕೆಯ ಆರೋಗ್ಯ ಈಗ ಸ್ಥಿರವಾಗಿದೆ. ಚಿಕಿತ್ಸೆ ಸಹ ಸುಸೂತ್ರವಾಗಿ ನಡೆಯುತ್ತಿದೆ. ಇದು ಸುದೀರ್ಘ ಪ್ರಯಾಣ, ಆದರೆ ನಾವು ಸಕಾರಾತ್ಮಕವಾಗಿ ಮುಂದುವರೆಯಬೇಕು” ಎಂದಿದ್ದಾರೆ.
ತನಗೆ ಮೆಟಾಸ್ಟ್ಯಾಟಿಕ್ ಕ್ಯಾನ್ಸರ್ ಇರುವುದಾಗಿ ಸೋನಾಲಿ ಬೇಂದ್ರೆ ಬಹಿರಂಗಪಡಿಸಿದಾಗ ಎಲ್ಲರೂ ಶಾಕ್ ಆಗಿದ್ದರು. ಕುಟುಂಬದ ಸದಸ್ಯರು, ಅಭಿಮಾನಿಗಳು, ಸಿನಿಮಾ ಪ್ರಮುಖರು ಆತಂಕ ವ್ಯಕ್ತಪಡಿಸಿದ್ದರು. ಅವರು ಆದಷ್ಟು ಬೇಗ ಚೇತರಿಸಿಕೊಳ್ಳಲಿ ಎಂದು ಧೈರ್ಯ ತುಂಬಿದ್ದರು. ಕ್ಯಾನ್ಸರ್ ಜತೆಗೆ ತಾನು ಹೋರಾಡಿ ಗೆಲ್ಲುತ್ತೇನೆ ಎಂಬ ವಿಶ್ವಾಸವನ್ನೂ ಸೋನಾಲಿ ವ್ಯಕ್ತಪಡಿಸಿದ್ದಾರೆ.
ಹೈ ಗ್ರೇಡ್ ಕ್ಯಾನ್ಸರ್ ಎಂದು ಕರೆಯುವ ಇದನ್ನು ನಿವಾರಿಸುವುದು ಅಷ್ಟು ಸುಲಭವಲ್ಲ, ಇದು ಕ್ಯಾನ್ಸರ್‌ನ ಅಂತಿಮ ಹಂತವಾಗಿದ್ದು ಇದರ ಮೂಲವನ್ನು ಪತ್ತೆಹಚ್ಚುವುದು ಕಷ್ಟ ಎನ್ನುತ್ತಾರೆ ತಜ್ಞರು. ಈ ಎಲ್ಲ ಅಂಶಗಳಿಂದ ಮೆಟಾಸ್ಟ್ಯಾಟಿಕ್ ಕ್ಯಾನ್ಸರ್ ಚಿಕಿತ್ಸೆ ಕೂಡ ಕಷ್ಟ ಎನ್ನುತ್ತಾರೆ.
ಇತ್ತೀಚೆಗಷ್ಟೇ ಸೋನಾಲಿ ಬೇಂದ್ರೆ ತನ್ನ ಪುತ್ರನ ಜತೆಗಿನ ಫೋಟೋ ಹಂಚಿಕೊಂಡು, ತನಗೆ ಕ್ಯಾನ್ಸರ್ ಇರುವ ಸಂಗತಿಯನ್ನು ಮಗನಿಗೂ ತಿಳಿಸಿದೆವು ಎಂದಿದ್ದರು. ಇಂತಹ ಪರಿಸ್ಥಿತಿಯ ಬಗ್ಗೆ ಮಕ್ಕಳಿಗೆ ಕಡ್ಡಾಯವಾಗಿ ತಿಳಿಸುವುದು ನನ್ನ ಪ್ರಕಾರ ಸರಿ. ಇದರಿಂದ ನಮಗಿಂತ ಅವರು ಮಾನಸಿಕವಾಗಿ ದೃಢವಾಗಲು ಸಾಧ್ಯವಾಗುತ್ತದೆ. ಇಂತಹ ಸಂದರ್ಭಗಳಲ್ಲಿ ಮಕ್ಕಳನ್ನು ದೂರ ಇಡುವುದು ಸರಿಯಲ್ಲ, ಜೀವನ ಸತ್ಯಗಳು ಅವರಿಗೂ ಗೊತ್ತಾಗಬೇಕು ಎಂದಿದ್ದರು.
Comments are closed.