*ಪದ್ಮಾ ಶಿವಮೊಗ್ಗ
ಹಿರಿಯ ನಟ ದೇವರಾಜ್‌ ದ್ವಿತೀಯ ಪುತ್ರ ಪ್ರಣಮ್‌ ದೇವರಾಜ್‌ ಅಭಿನಯದ ಮೊದಲ ಚಿತ್ರ ಕುಮಾರಿ 21ಎಫ್‌. ತೆಲುಗಿನಲ್ಲಿ ಇದೇ ಹೆಸರಿನಲ್ಲಿ ತೆರೆಕಂಡ ಚಿತ್ರದ ಕನ್ನಡ ರಿಮೇಕ್‌ ಇದು. ನಿಧಿ ಕುಶಾಲಪ್ಪ ನಾಯಕಿ ಪಾತ್ರದಲ್ಲಿ ನಟಿಸಿದ್ದಾರೆ. ಮದುವೆಯಾಗುವ ಹೆಣ್ಣು ಶೀಲವಂತಳಾಗಿರಬೇಕು, ಪರಿಶುದ್ಧಳಾಗಿರಬೇಕು ಎಂಬ ಸಿದ್ಧಾಂತಕ್ಕೆ ಕಟ್ಟುಬಿದ್ದವರಿಗೆ ಪ್ರೀತಿ ಎಂದರೆ ಏನು ಎನ್ನುವುದನ್ನು ಹೇಳುವ ಪ್ರಯತ್ನ ಈ ಚಿತ್ರದಲ್ಲಿದೆ.
ಸಿದ್ದು (ಪ್ರಣಮ್‌) ಪಾಕ ಪ್ರವೀಣ. ವಿದೇಶದಲ್ಲಿ ಶೆಫ್‌ ಆಗಿ ಕೆಲಸ ಮಾಡುವ ಕನಸು ಕಂಡವನು. ಇವನಿಗೆ ಮೂವರು ಕೆಟ್ಟ ಸ್ನೇಹಿತರಿರುತ್ತಾರೆ. ಅವರ ಕೆಟ್ಟ ಕೃತ್ಯಗಳಲ್ಲಿ ಇವನು ಭಾಗಿಯಾಗದಿದ್ದರೂ ಅವರ ಬೆಂಬಲಕ್ಕೆ ನಿಂತಿರುತ್ತಾನೆ. ಇವನಿಗೆ ಬೋಲ್ಡ್‌ ಹುಡುಗಿಯೊಬ್ಬಳ (ನಿಧಿ ಕುಶಾಲಪ್ಪ) ಪರಿಚಯವಾಗುತ್ತದೆ. ಸಿದ್ದು ಅವಳನ್ನು ಪ್ರೀತಿಸುತ್ತಾನೆ. ಈ ಹುಡುಗಿ ಎಲ್ಲರಂತಲ್ಲ. ಮೊದಲ ಪರಿಚಯದಲ್ಲೇ ನನ್ನ ಸೊಂಟಕ್ಕೆ ಎಷ್ಟು ಬೆಲೆ ಕಟ್ಟುತ್ತೀಯಾ ಎನ್ನುವವಳು! ಹಾಲ್ಸ್‌ ಕೊಟ್ಟು ತುಟಿಗೆ ಮುತ್ತು ನೀಡುವವಳು, ಸಿದ್ದು ಬೇರೆ ಹುಡುಗಿಯ ಬಳಿಗೆ ಹೋಗುವಾಗ ಕಾಂಡೊಮ್‌ ಕೊಟ್ಟು ಕಳಿಸುವವಳು. ಇಂಥಾ ಬೋಲ್ಡ್‌ ಹುಡುಗಿಯ ನಡತೆಯ ಬಗ್ಗೆ ಸಿದ್ದು ಸ್ನೇಹಿತರು ಕೆಟ್ಟ ಮಾತುಗಳನ್ನಾಡುತ್ತಾರೆ. ಸಿನಿಮಾದಲ್ಲಿ ಅನುಮಾನ ಎನ್ನುವುದು ಹೇಗೆ ಸಿದ್ದು ಅಪ್ಪ ಅಮ್ಮನನ್ನು ಬೇರೆ ಮಾಡಿತೆಂಬ ಎಂಬ ಕಥೆ ಇಲ್ಲಿದೆ.
ಹೆಣ್ಣು ಹೇಗೇ ಇದ್ದರೂ, ಅವಳ ಹಿಂದಿನ ಬದುಕು ಏನೇ ಆಗಿದ್ದರೂ ಅದನ್ನೆಲ್ಲಾ ಮೀರಿ ಪ್ರೀತಿಸುವ ಹೃದಯ, ಮೆಚ್ಯೂರಿಟಿ ಇರಬೇಕು, ಹೆಣ್ಣನ್ನು ಗೌರವಿಸಬೇಕು ಎಂಬುದನ್ನು ಚಿತ್ರದಲ್ಲಿ ಹೇಳಲಾಗಿದೆ. ಒಂದು ಫೋಟೋ ಅಥವಾ ವಿಡಿಯೋ ನೋಡಿ, ಯಾರೋ ಹುಡುಗನ ಜತೆ ಸ್ನೇಹ ಇದೆ ಎಂದ ಮಾತ್ರಕ್ಕೆ ಅನುಮಾನ ಪಡಬಾರದು ಎಂಬ ಸಂದೇಶವೂ ಇದೆ. ಆದರೆ, ಗಟ್ಟಿಯಾದ ಕಥೆಯೊಂದು ಅಷ್ಟೇ ಸಹಜವಾಗಿ ತೆರೆಯ ಮೇಲೆ ಮೂಡಿಬರುವಲ್ಲಿ ಸೋತಿದೆ. ಚುರುಕಾಗಿ ಸಾಗದೆ, ಸಿನಿಮಾ ದೀರ್ಘವೆನಿಸುತ್ತದೆ. ಕಾಮಿಡಿ ಖುಷಿ ನೀಡುವುದಿಲ್ಲ. ಆದರೂ ಯುವಕರಿಗೆ ತುಂಬಾ ಇಷ್ಟವಾಗುವ ಕಥೆ ಚಿತ್ರದಲ್ಲಿದೆ ಎಂದೇ ಹೇಳಬಹುದು.
ಮೊದಲ ಚಿತ್ರದಲ್ಲಿ ಪ್ರಣಮ್‌ ನಟನೆ ಮತ್ತು ಡಾನ್ಸ್‌ನಿಂದ ಭರವಸೆ ಮೂಡಿಸಿದ್ದಾರೆ. ನಿಧಿ ಕುಶಾಲಪ್ಪ ಪಾತ್ರದ ತೂಕಕ್ಕೆ ತಕ್ಕಂತೆ ನಟಿಸಲು ಇನ್ನಷ್ಟು ಪಳಗಬೇಕಿತ್ತು. ಇಷ್ಟಾಗಿ ಮಾಮೂಲಿ ಮಸಾಲಾ ಚಿತ್ರ ನೋಡಿ ಬೇಸತ್ತವರು, ಹೊಸ ಕಾನ್ಸೆಪ್ಟ್‌ನ ಸಿನಿಮಾ ನೋಡಬಯಸುವವರು ಸಿನಿಮಾ ನೋಡಬಹುದು.
Comments are closed.