ಮನೋರಂಜನೆ

ಸೈಬರ್‌ ಕರ್ಮಕಾಂಡಕ್ಕೆ ಕನ್ನಡಿ ಹಿಡಿದ ಚಿತ್ರ : ಗುಳ್ಟು ಚಿತ್ರ ವಿಮರ್ಶೆ

Pinterest LinkedIn Tumblr

*ಶರಣು ಹುಲ್ಲೂರು

 

ಆಧುನಿಕ ಜಗತ್ತನ್ನು ಹೆಚ್ಚು ಆತಂಕಕ್ಕೀಡು ಮಾಡುತ್ತಿದೆ ಸೈಬರ್‌ ಕ್ರೈಮ್‌. ಅದರಲ್ಲೂ ಆನ್‌ಲೈನ್‌ ದೋಖಾಗಳು ಎಲ್ಲರನ್ನೂ ತಲ್ಲಣಗೊಳಿಸುತ್ತಿವೆ. ಕಣ್ಮುಚ್ಚಿ ಕಣ್ಣು ತೆರೆಯುವುದರೊಳಗೆ ಪ್ರಪಂಚವೇ ಅದಲು ಬದಲಾದ ಅನೇಕ ಘಟನೆಗಳು ಡಿಜಿಟಲ್‌ ಯುಗದಲ್ಲಿ ನಡೆದಿವೆ. ಇಂತಹ ಗಂಭೀರ ವಿಷಯಗಳನ್ನೂ ಇಟ್ಟುಕೊಂಡು ‘ಗುಳ್ಟು’ ಸಿನಿಮಾ ಮಾಡಿದ್ದಾರೆ ನಿರ್ದೇಶಕ ಜನಾರ್ದನ್‌ ಚಿಕ್ಕಣ್ಣ.

ಸಂಕೀರ್ಣವಾದ ವಿಷಯವನ್ನು ಸಾಮಾನ್ಯನಿಗೂ ಅರ್ಥವಾಗುವಂತೆ ಕಟ್ಟಿಕೊಟ್ಟಿದ್ದಾರೆ ಅವರು. ಹಾಗಾಗಿ ಸಿನಿಮಾ ನೋಡಿದ ಪ್ರತಿ ಪ್ರೇಕ್ಷಕನ ಮುಖದಲ್ಲೂ ಆತಂಕದ ಛಾಯೆ ಕಾಣುತ್ತದೆ. ನಮ್ಮ ಅರಿವಿಗೆ ಬಾರದಂತೆ ನಾವು ಡಿಜಿಟಲ್‌ ಡ್ರೀಮ್‌ಗೆ ಹೇಗೆ ಬಲಿಯಾಗಿದ್ದೇವೆ ಎಂಬುದು ಒಮ್ಮೆಗೆ ಮೈಬೆವರುವಂತೆ ಮಾಡುತ್ತದೆ. ಅಷ್ಟರಮಟ್ಟಿಗೆ ಸಿನಿಮಾ ಪರಿಣಾಮಕಾರಿಯಾಗಿದೆ. ಆಯ್ದುಕೊಂಡಿರುವ ವಿಷಯವೇ ಹೊಸದಾಗಿರುವುದರಿಂದ ಮೊದಲ ದೃಶ್ಯದಿಂದ ಕೊನೆವರೆಗೂ ಥ್ರಿಲ್‌ ನೀಡುತ್ತಲೇ ಚಿತ್ರ ಸಾಗುತ್ತದೆ.

ಸಿನಿಮಾದ ಪ್ರಮುಖ ಅಂಶವೇ ಸುಧಾರ್‌ (ಆಧಾರ್‌) ಕಾರ್ಡ್‌ ಮಾಹಿತಿಯ ಸೋರಿಕೆ. ಇತ್ತೀಚೆಗಷ್ಟೇ ಬೆಂಗಳೂರು ಮೂಲದ ಸಂಸ್ಥೆಯೊಂದು ತನ್ನ ವರದಿಯಲ್ಲಿ ಸರಕಾರಿ ವೆಬ್‌ಸೈಟ್‌ಗಳಿಂದ 13 ಕೋಟಿ ಆಧಾರ್‌ ಸಂಖ್ಯೆಗಳ ಮಾಹಿತಿ ಸೋರಿಕೆಯಾಗಿದೆ ಎಂದು ಹೇಳಿ ಶಾಕ್‌ ನೀಡಿತ್ತು. ಸದ್ಯ ಬ್ರಿಟನ್‌ ಮೂಲದ ಖಾಸಗಿ ಮಾಧ್ಯಮವೊಂದು ಫೇಸ್‌ಬುಕ್‌ನ ದತ್ತಾಂಶ ಸೋರಿಕೆ ಕುರಿತ ಸುದ್ದಿ ಪ್ರಸಾರ ಮಾಡಿ ಜಗತ್ತಿನಾದ್ಯಂತ ಸಂಚಲನ ಮೂಡಿಸಿತ್ತು. ಅಲ್ಲದೇ, ಆಗಾಗ್ಗೆ ಬ್ಯಾಂಕ್‌ ಅಕೌಂಟ್‌ ಹ್ಯಾಕ್‌ ಮಾಡಿ ಹಣ ದೋಚಿದ ಘಟನೆಗಳು ನಡೆಯುತ್ತಿವೆ. ಇಂಥದ್ದೇ ವಿಷಯವನ್ನು ‘ಗುಳ್ಟು’ ಸಿನಿಮಾದಲ್ಲಿ ಸಮರ್ಥವಾಗಿ ತೋರಿಸಲಾಗಿದೆ. ಹಾಗಾಗಿ ಸಿನಿಮಾ ನೋಡಿ ಆಚೆ ಬಂದಾಗ ಖಂಡಿತಾ ಪ್ರೇಕ್ಷಕರಲ್ಲಿ ಅನೇಕ ಪ್ರಶ್ನೆಗಳು ಮೂಡುತ್ತವೆ. ಆನ್‌ಲೈನ್‌ನಲ್ಲಿ ವ್ಯವಹರಿಸುವ, ಆಧಾರ ಕಾರ್ಡ್‌ ಹೊಂದಿರುವ ಪ್ರತಿಯೊಬ್ಬನಿಗೂ ಆತಂಕ ಶುರುವಾಗುತ್ತದೆ.

ತೀರಾ ಗಂಭೀರವಾದ ವಿಷಯವನ್ನು ಸಾಮಾನ್ಯನಿಗೂ ಅರ್ಥವಾಗುವಂತೆ ಹೇಳಿದ್ದು ಹೀಗೆ.. ಅವನು ಕಥಾನಾಯಕ ಅಲೋಕ್‌ (ನವೀನ್‌ ಶಂಕರ್‌). ಎಂಜಿನಿಯರ್‌ ಪದವೀಧರ. ಆನ್‌ಲೈನ್‌ ಸ್ಟಾರ್ಟ್‌ಅಪ್‌ ಪ್ರಾರಂಭ ಮಾಡುವ ಹಂಬಲ ಈತನದ್ದು. ಆದರೆ, ಜೇಬಿನಲ್ಲಿ ಬಿಡಿಗಾಸಿಲ್ಲ. ಹಾಗಾಗಿ ದುಡ್ಡು ಮಾಡುವುದಕ್ಕೆ ಅವನು ವಾಮಮಾರ್ಗ ಹಿಡಿಯುತ್ತಾನೆ. ಈತನಿಗೆ ಸಾಥ್‌ ನೀಡುವುದು ಗೆಳೆಯ ಆಸ್ತಿ. ಈ ನಡುವೆ ಅಲೋಕ್‌ಗೆ ಕಥಾನಾಯಕಿ ಪೂಜಾ (ಸೋನುಗೌಡ) ಪರಿಚಯವಾಗುತ್ತಾಳೆ. ಗೆಳೆತನ ಪ್ರೀತಿಗೆ ತಿರುಗಿ ಅಲ್ಲೊಂದು ಲವ್‌ಸ್ಟೋರಿ ಶುರುವಾಗುತ್ತೆ ಎನ್ನುವ ಹೊತ್ತಿಗೆ ಕಥೆಗೆ ಬಿಗ್‌ ಟ್ವಿಸ್ಟ್‌ ಸಿಗುತ್ತದೆ. ಅದು ಏನು ಅನ್ನುವುದನ್ನು ಸಿನಿಮಾದಲ್ಲಿಯೇ ನೋಡಿ.

ಕಥಾನಾಯಕ ವೆಬ್‌ ತಾಣಗಳನ್ನು ಹ್ಯಾಕ್‌ ಮಾಡುವುದರ ಜತೆಗೆ ಸುಧಾರ್‌ ಕಾರ್ಡ್‌ ಮಾಹಿತಿಯನ್ನೂ ಸೋರಿಕೆ ಮಾಡುವ ಸಾಹಸಕ್ಕೆ ಕೈ ಹಾಕಿದಾಗ ಮುಖ್ಯಮಂತ್ರಿ (ರಂಗಾಯಣ ರಘು), ಪೊಲೀಸ್‌ ಅಧಿಕಾರಿ (ಅವಿನಾಶ್‌), ಮಾಹಿತಿ ತಂತ್ರಜ್ಞಾನ ಇಲಾಖೆ ಅಧಿಕಾರಿಗಳು ಪ್ರವೇಶ ಮಾಡುತ್ತಾರೆ. ಅವರ ತವಕ ತಲ್ಲಣಗಳು ವಾಸ್ತವಕ್ಕೆ ಹಿಡಿದ ಕನ್ನಡಿಯಂತಿವೆ. ಅಲ್ಲದೆ, ಅನೇಕ ರೂಪಕಗಳನ್ನು ಕಟ್ಟುವ ಮೂಲಕ ಕಥೆಯನ್ನು ಪ್ರೇಕ್ಷಕರಿಗೆ ದಾಟಿಸುವ ಅಪರೂಪದ ಪ್ರಯತ್ನ ಮಾಡಿದ್ದಾರೆ ನಿರ್ದೇಶಕರು. ಹುಡುಗನೊಬ್ಬ ಹುಡುಗಿಗೆ ಮೋಸ ಮಾಡುವುದನ್ನು ಟ್ರಾಕ್ಟರ್‌ ಮತ್ತು ಟ್ರೇಲರ್‌ ಜೋಡಣೆ ಮತ್ತು ಅದೇ ಸಮಯದಲ್ಲಿ ರೈಲು ಪಾಸಾಗುವ ದೃಶ್ಯ ಇದಕ್ಕೆ ಉದಾಹರಣೆ ಕೊಡಬಹುದು.

‘ಅರ್ಥ’ ಸಿನಿಮಾದ ನಂತರ ರಂಗಾಯಣ ರಘು ಹೊಸ ರೀತಿಯ ಪಾತ್ರ ಮಾಡಿದ್ದಾರೆ. ಫನೀಶ್‌ ಪಾತ್ರದಲ್ಲಿ ನಿರ್ದೇಶಕ ಪವನ್‌ಕುಮಾರ್‌ ಹಲವು ತಾಂತ್ರಿಕ ವಿಷಯಗಳನ್ನು ಸರಳಗೊಳಿಸುತ್ತಾರೆ. ಪ್ರತಿ ಪಾತ್ರಕ್ಕೂ ಹಿನ್ನೆಲೆ ಮತ್ತು ಅವುಗಳನ್ನು ಪಾತ್ರಗಳಂತೆಯೇ ತೋರಿಸಿದ್ದರಿಂದ ಸಿನಿಮಾ ಪೂರ್ತಿ ನೈಜ ಎನ್ನುವಂತೆ ಕಾಣುತ್ತದೆ. ಪ್ರತಿ ಕಲಾವಿದರೂ ತಮ್ಮ ಪಾತ್ರಕ್ಕೆ ಜೀವ ತುಂಬಿದ್ದು ಸಿನಿಮಾದ ವಿಶೇಷಗಳಲ್ಲಿ ಒಂದು.

ಹಾಡುಗಳಿಗಿಂತ ಹಿನ್ನೆಲೆ ಸಂಗೀತ ಹೆಚ್ಚು ಆಪ್ತವಾಗುತ್ತದೆ. ಚಿತ್ರಕಥೆಯ ಓಟಕ್ಕೆ ಸಿನಿಮಾಟೋಗ್ರಫಿ ಮಂಕಾಗುತ್ತದೆ. ಕನ್ನಡದಲ್ಲಿ ಬಂದ ಅಪರೂಪದ ಸಿನಿಮಾವಿದು. ನೀವು ಸೈಬರ್‌ ಯುಗದಲ್ಲಿ ಬದುಕುತ್ತಿದ್ದೀರಾ? ಹಾಗಾದರೆ, ಈ ಸಿನಿಮಾ ತಪ್ಪದೇ ನೋಡಿ.

Comments are closed.