ಬಾಲಿವುಡ್‌ನ ಕಿಂಗ್‌ ಖಾನ್‌ ಶಾರುಖ್‌ ಅವರಿಗಿಂದು 52ನೇ ಹುಟ್ಟುಹಬ್ಬದ ಸಂಭ್ರಮ. ಈಗಾಗಲೇ ಶಾರುಖ್‌ಗೆ ಜಗತ್ತಿನೆಲ್ಲೆಡೆಯಿಂದ ಶುಭಾಶಯಗಳ ಸುರಿಮಳೆ ಆಗುತ್ತಿದ್ದು, ವಿಜೃಂಭಣೆಯಿಂದ ತಮ್ಮ ಜನ್ಮದಿನವನ್ನು ಆಚರಿಸುತ್ತಿದ್ದಾರೆ. ಕಿರುತೆರೆಯಿಂದ ತಮ್ಮ ವೃತ್ತಿ ಜೀವನ ಆರಂಭಿಸಿದ ಶಾರುಖ್‌ ಈಗ ಬಾಲಿವುಡ್‌ ಬಾದ್‌ಷಾ ಎಂದರೆ ತಪ್ಪಾಗಲಾರದು.
ಶಾರುಖ್‌ ಅಭಿನಯದ ಸೂಪರ್‌ ಹಿಟ್‌ ಚಿತ್ರಗಳಲ್ಲಿ ‘ಬಾಜಿಗರ್‌’ ಸಹ ಒಂದು. ಈ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಧೂಳೆಬ್ಬಿಸಿದ್ದು ಮಾತ್ರ ಸುಳ್ಳಲ್ಲ. ಶಾರುಖ್‌ ಸಿನಿ ಕರಿಯರ್‌ ಯಶಸ್ಸಿನ ಉತ್ತುಂಗಕ್ಕೇರಿದ್ದು ಇದೇ ಚಿತ್ರದಿಂದ ಎಂದರೆ ತಪ್ಪಾಗಲಾರದು. ‘ಬಾಜಿಗರ್‌’ ಚಿತ್ರದ ಹಾಡುಗಳನ್ನು ಈಗಲೂ ಎಲ್ಲರು ಇಷ್ಟಪಡುತ್ತಾರೆ. ಅಬ್ಬಾಸ್‌-ಮುಸ್ತಾನ್‌ ನಿರ್ದೇಶನದ ಈ ಚಿತ್ರದಲ್ಲಿ ಕಿಂಗ್‌ ಖಾನ್‌ ನೆಗೆಟಿವ್‌ ಪಾತ್ರದಲ್ಲಿ ಮಿಂಚಿ ಸೈ ಅನಿಸಿಕೊಂಡಿದ್ದರು.
ಆದರೆ ಒಂದು ಇಂಟ್ರೆಸ್ಟಿಂಗ್‌ ಸಂಗತಿ ಎಂದರೆ ‘ಬಾಜಿಗರ್‌’ ಚಿತ್ರಕ್ಕೆ ಶಾರುಖ್‌ ಮೊದಲ ಆಯ್ಕೆ ಆಗಿರಲಿಲ್ಲ. ಮೊದಲು ಈ ಚಿತ್ರದ ಆಫರ್‌ ಹೋಗಿದ್ದು ಅನಿಲ್‌ ಕಪೂರ್‌ ಅವರಿಗೆ. ಆ ಸಂದರ್ಭದಲ್ಲಿ ಅನಿಲ್‌ ಕಪೂರ್‌ ‘ರೂಪ್‌ ಕಿ ರಾಣಿ ಚೋರೊಂಕಾ ರಾಜಾ’ ಚಿತ್ರದಲ್ಲಿ ಬಿಝಿಯಾಗಿದ್ದರಿಂದ ಹಿಂದು-ಮುಂದು ನೋಡದೆ ನಿರಾಕರಿಸಿದರಂತೆ. ಇದಾದ ನಂತರ ಚಿತ್ರದ ಆಫರ್‌ ಹೋಗಿದ್ದು ಸಲ್ಮಾನ್‌ ಖಾನ್‌ಗೆ.
ಸಲ್ಮಾನ್‌ ಖಾನ್‌ ತಂದೆ ಸಲೀಮ್‌ ಖಾನ್‌ಗೆ ಬಾಜಿಗರ್‌ ಚಿತ್ರದ ಕಥೆ ಇಷ್ಟವಾಯಿತು. ಆದರೆ ಸಲ್ಮಾನ್‌ ಆಗ ‘ಹಮ್‌ ಆಪ್‌ ಕೆ ಹೈ ಕೌನ್‌’ ಚಿತ್ರದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದರು. ಚಿತ್ರ ಕಥೆಯನ್ನು ಒಪ್ಪಿದ ಸಲೀಮ್‌ ಖಾನ್‌ ಮಗನನ್ನು ನೆಗೆಟಿವ್‌ ಪಾತ್ರದಲ್ಲಿ ನೋಡಲು ಇಷ್ಟಪಡಲಿಲ್ಲವಂತೆ. ಹಾಗಾಗಿ ‘ಬಾಜಿಗರ್‌’ ಚಿತ್ರದ ಆಫರ್‌ನ್ನು ತಿರಸ್ಕರಿಸಿದರು ಎನ್ನಲಾಗಿದೆ. ಇದಾದ ಬಳಿಕ ಶಾರುಖ್‌ ಅಭಿನಯದ ‘ದೀವಾನಾ’ ಚಿತ್ರದಲ್ಲಿನ ನಟನೆಯನ್ನು ಮೆಚ್ಚಿದ ನಿರ್ದೇಶಕರು, ‘ಬಾಜಿಗರ್‌’ ಚಿತ್ರದ ಕಥೆಯನ್ನು ಶಾರುಖ್‌ಗೆ ಹೇಳಿದರಂತೆ. ಹುಮ್ಮಸ್ಸಿನಿಂದಲೇ ಪಾತ್ರವನ್ನು ಒಪ್ಪಿಕೊಂಡ ಶಾರುಖ್‌ ಬಾಲಿವುಡ್‌ ಅಂಗಳದಲ್ಲಿ ಕಮಾಲ್‌ ಮಾಡಿದ್ದು ಈಗ ಇತಿಹಾಸ.
Comments are closed.