ಮುಂಬಯಿ: ಬಾಲಿವುಡ್‌ ನಟಿ ರಾಣಿ ಮುಖರ್ಜಿ ಅವರ ತಂದೆ ರಾಮ್‌ ಮುಖರ್ಜಿ (84) ಭಾನುವಾರ ಬೆಳಗಿನ ಜಾವ ನಿಧನರಾಗಿದ್ದಾರೆ. ಬಾಲಿವುಡ್‌ ಹಾಗೂ ಬೆಂಗಾಳಿ ಚಿತ್ರರಂಗದಲ್ಲಿ ಚಿತ್ರಕಥೆಗಾರ ಹಾಗೂ ನಿರ್ಮಾಪಕರಾಗಿ ರಾಮ್‌ ಗುರುತಿಸಿಕೊಂಡಿದ್ದರು.
ರಾಮ್‌ ಮುಖರ್ಜಿಯವರಿಗೆ ಬೆಳಗಿನ ಜಾವ ರಕ್ತದೊತ್ತಡ ಹೆಚ್ಚಾದ ತಕ್ಷಣವೇ ನಗರದ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದ ಪರಿಣಾಮ ರಾಮ್‌ ಮುಖರ್ಜಿ ಕೊನೆಯುಸಿರೆಳೆದಿದ್ದಾರೆ. ಈ ಮೊದಲು ಅವರ ಆರೋಗ್ಯ ಸ್ಥಿತಿಯಲ್ಲಿ ಚೇತರಿಕೆ ಕಂಡುಬಂದಿತ್ತು, ಆದರೆ ಅಚಾನಕ್ಕಾಗಿ ಕಾಣಿಸಿಕೊಂಡ ರಕ್ತದೊತ್ತಡ ಅವರ ಪ್ರಾಣವನ್ನೇ ತೆಗೆದುಕೊಂಡಿದೆ ಎಂದು ಕುಟುಂಬ ಮೂಲಗಳು ತಿಳಿಸಿವೆ.
ಚಿತ್ರಗಳನ್ನು ನಿರ್ಮಿಸುವುದಷ್ಟೇ ಅಲ್ಲದೆ ಕೆಲ ಚಿತ್ರಗಳನ್ನು ನಿರ್ದೇಶನ ಕೂಡ ಮಾಡಿದ್ದರು ರಾಮ್‌. ಹಿಂದಿ ಹಾಗೂ ಬೆಂಗಾಳಿ ಚಿತ್ರರಂಗಕ್ಕೆ ಇವರ ಕೊಡುಗೆ ಅಪಾರವಾಗಿದೆ. ಮುಂಬಯಿನ ಪ್ರಸಿದ್ಧ ಫಿಲ್ಮಾಲಯ ಸ್ಟುಡಿಯೋದ ಸ್ಥಾಪಕರಲ್ಲಿ ರಾಮ್‌ ಮುಖರ್ಜಿ ಒಬ್ಬರು. ಮೃತ ರಾಮ್‌ ಮುಖರ್ಜಿ ಅವರು ಪತ್ನಿ ಕೃಷ್ಣಾ ಮುಖರ್ಜಿ, ಮಗಳು ರಾಣಿ ಹಾಗೂ ಮಗ ರಾಜಾ ಅವರನ್ನು ಅಗಲಿದ್ದಾರೆ. ರಾಮ್‌ ನಿಧನಕ್ಕೆ ಚಿತ್ರರಂಗದ ಗಣ್ಯರು ಕಂಬನಿ ಮಿಡಿದಿದ್ದಾರೆ.
Comments are closed.