ಅಮಿತಾಭ್ ಬಚ್ಚನ್ – ಜಯಾ ಬಾಧುರಿ ಹಿಂದಿ ಚಿತ್ರರಂಗ ಕಂಡ ಸೂಪರ್ ಜೋಡಿಗಳಲ್ಲೊಂದು. ತೆರೆಯ ಮೇಲೆ ರೊಮಾನ್ಸ್ ಮಾಡಿದ ಜೋಡಿ ಮುಂದೆ ಸತಿ-ಪತಿಯಾದರು. ಇದೀಗ ಆರ್.ಬಲ್ಕಿ ನಿರ್ದೇಶನದ ಹಿಂದಿ ಚಿತ್ರವೊಂದರಲ್ಲಿ ಅವರು ಮತ್ತೊಮ್ಮೆ ಜೊತೆಯಾಗಿ ನಟಿಸಲಿದ್ದಾರೆ. ಈ ಹಿಂದೆ ಕರಣ್ ಜೋಹರ್ ನಿರ್ದೇಶನದ ‘ಕಭಿ ಖುಷಿ ಕಭಿ ಘಮ್’ (2001) ಹಿಂದಿ ಚಿತ್ರದಲ್ಲಿ ಬಚ್ಚನ್ ದಂಪತಿ ಪತಿ-ಪತ್ನಿಯಾಗಿಯೇ ನಟಿಸಿದ್ದರು. ಇದೀಗ ಹದಿನಾಲ್ಕು ವರ್ಷಗಳ ನಂತರ ಮತ್ತೊಮ್ಮೆ ಹಿಂದಿ ಚಿತ್ರಕ್ಕೆ ಜೊತೆಯಾಗುತ್ತಿದ್ದಾರೆ ಎನ್ನುವುದು ವಿಶೇಷ.
ಇನ್ನೂ ಹೆಸರಿಡದ ಬಲ್ಕಿ ಚಿತ್ರದ ಮುಖ್ಯಭೂಮಿಕೆಯಲ್ಲಿ ಅರ್ಜುನ್ ಕಪೂರ್ ಮತ್ತು ಕರೀನಾ ಕಪೂರ್ ನಟಿಸಲಿದ್ದಾರೆ. ಈ ರೊಮಾಂಟಿಕ್ ಕಾಮಿಡಿ ಚಿತ್ರದಲ್ಲಿ ಬಚ್ಚನ್ ದಂಪತಿಗೆ ಏನು ಪಾತ್ರವಿರುತ್ತದೆ? ‘ಸಿನಿಮಾದಲ್ಲಿ ಬಚ್ಚನ್ ದಂಪತಿ ಅತಿಥಿ ಕಲಾವಿದರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಅವರಿಲ್ಲಿ ಹೀರೋ-ಹಿರೋಯಿನ್ ಪೋಷಕರ ಪಾತ್ರಗಳಲ್ಲಿ ಇರೋಲ್ಲ. ಬದಲಿಗೆ ಅವರು ಸಿನಿಮಾ ನಟ-ನಟಿಯರಾಗಿಯೇ ಬಂದು ಹೋಗುತ್ತಾರೆ. ಎರಡು ದಿನಗಳ ಚಿತ್ರೀಕರಣವನ್ನು ಬಚ್ಚನ್ ಮನೆ ಜಲ್ಸಾದಲ್ಲಿಯೇ ನಡೆಸಲಿದ್ದೇವೆ’ ಎಂದು ನಿರ್ದೇಶಕರ ಆಪ್ತ ಮೂಲಗಳು ಹೇಳುತ್ತವೆ.
ಕರಣ್ ಜೋಹರ್ ಅವರ ‘ಕಭಿ ಖುಷಿ ಕಭಿ ಘಮ್’ ಚಿತ್ರದಲ್ಲಿ ದಂಪತಿಯಾಗಿ ನಟಿಸಿದ್ದ ಬಚ್ಚನ್-ಜಯಾ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಅದರಲ್ಲೂ ಬಚ್ಚನ್ ದಂಪತಿ ಜೊತೆಗಿನ ಶಾರುಖ್ ಖಾನ್‌ರ ಸನ್ನಿವೇಶಗಳು ಚಿತ್ರದಲ್ಲಿ ಹೈಲೈಟ್ ಆಗಿದ್ದವು. ಮುಂದೆ ಅವರು ಒಟ್ಟಾಗಿ ನಟಿಸುವಂಥ ಸ್ಕ್ರಿಪ್ಟ್, ಸಂದರ್ಭ ಒದಗಿಬಂದಿರಲಿಲ್ಲ. ಈಗ ನಿರ್ದೇಶಕ ಬಲ್ಕಿ ಒತ್ತಾಯದ ಮೇರೆಗೆ ಇಬ್ಬರೂ ಓಕೆ ಎಂದಿದ್ದಾರೆ. ವಿಶೇಷವೆಂದರೆ ಬಚ್ಚನ್ ದಂಪತಿಯ ಸನ್ನಿವೇಶಗಳು ಚಿತ್ರಕಥೆಗೆ ಮಹತ್ವದ ತಿರುವು ನೀಡಲಿವೆಯಂತೆ. ಇದರ ಹೊರತಾಗಿ ಬಲ್ಕಿ ಮತ್ತಾವುದೇ ಮಾಹಿತಿ ನೀಡದೆ ಸಸ್ಪೆನ್ಸ್ ಕಾಯ್ದುಕೊಳ್ಳುತ್ತಾರೆ.
ಪ್ರಸ್ತುತ ಅಮಿತಾಭ್ ಬಚ್ಚನ್ ತಮ್ಮ ಪುತ್ರ ಅಭಿಷೇಕ್ ಬಚ್ಚನ್‌ರ ಕಬಡ್ಡಿ ತಂಡವನ್ನು ಹುರಿದುಂಬಿಸಲು ಮೈದಾನದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಬಿಗ್ ಬಿ ಉಪಸ್ಥಿತಿ ಅಭಿಷೇಕ್‌ರ ಜೈಪುರ್ ಪಿಂಕ್ ಪ್ಯಾಂಥರ್ಸ್‌ ಕಬಡ್ಡಿ ತಂಡದ ಆಟಗಾರರ ಹುಮ್ಮಸ್ಸು ಹೆಚ್ಚಿಸಿದೆ. ‘ಸದ್ಯ ಕಬಡ್ಡಿ ಎಂಜಾಯ್ ಮಾಡುತ್ತಿದ್ದೇನೆ. ನಿರ್ದೇಶಕ ಬಲ್ಕಿ ಸಿನಿಮಾದಲ್ಲಿ ನಾವು ನಟಿಸುತ್ತಿರೋದು ನಿಜ. ಚೀನಿಕಮ್, ಪಾ ಮತ್ತು ಇತ್ತೀಚಿನ ಶಮಿತಾಭ್ ಚಿತ್ರಗಳಲ್ಲಿ ಬಲ್ಕಿ ನನಗೆ ವಿಶೇಷ ಪಾತ್ರಗಳನ್ನು ಸೃಷ್ಟಿಸಿದ್ದರು. ಹೊಸ ಚಿತ್ರದಲ್ಲಿಯೂ ನನಗೆ ಮತ್ತು ಜಯಾಗೆ ಮಹತ್ವದ ಸನ್ನಿವೇಶಗಳಿವೆ. ಪ್ರತಿಭಾವಂತ ನಿರ್ದೇಶಕ ಬಲ್ಕಿ ಈ ಬಗ್ಗೆ ಹೇಳಿದಾಗ ಕೂಡಲೇ ನಟಿಸಲು ಸಮ್ಮತಿಸಿದೆ’ ಎನ್ನುತ್ತಾರೆ ಅಮಿತಾಭ್ ಬಚ್ಚನ್.
