* ಪದ್ಮಾ ಶಿವಮೊಗ್ಗ
ನಿರ್ದೇಶಕ ಕೆ. ನಂಜುಂಡ ಅವರ ‘ಮೊಲೋಡಿ’ ಚಿತ್ರ ಬಿಡುಗಡೆಗೆ ಸಿದ್ಧವಾಗಿದೆ. ಇದರ ಬೆನ್ನಲ್ಲೇ ಮೆಲೋಡಿಯಸ್ ಹಾಡುಗಳದ್ದೇ ಸಿನಿವೊಂದನ್ನು ನೀಡುವ ಪ್ರಯತ್ನದಲ್ಲಿದ್ದಾರೆ ಈ ನಿರ್ದೇಶಕರು.
ಇದುವರೆಗೂ ಸಿನಿಮಾದಲ್ಲಿ ಸಾಮಾನ್ಯವಾಗಿ 5-6 ಹಾಡು ಇರುವುದನ್ನು ನೋಡಿದ್ದೇವೆ. ಹೆಚ್ಚೆಂದರೆ 10 ಹಾಡು ಇರುತ್ತವೆ. ಆದರೆ, ನಂಜುಂಡ 50 ಹಾಡುಗಳನ್ನು ಹೊಸ ಚಿತ್ರದಲ್ಲಿ ಅಳವಡಿಸಿಲು ನಿರ್ಧರಿಸಿದ್ದಾರೆ. ಇವರ ಜತೆ ಸಂಗೀತ ಸಂಯೋಜನ ಎಲ್‌ಎನ್ ಶಾಸ್ತ್ರಿ ಕೈಜೋಡಿಸಿದ್ದಾರೆ. ಚಿತ್ರದಲ್ಲಿ ಕೆಲವು ಹಾಡುಗಳಿಗೆ ಸಾಹಿತ್ಯವಿದ್ದರೆ, ಇನ್ನು ಕೆಲವಕ್ಕೆ ವಾದ್ಯ ಸಂಗೀತವನ್ನೂ ಹಾಡನ್ನಾಗಿ ಬಳಸಲಿದ್ದಾರೆ.
‘ಒಂದು ಹಕ್ಕಿಯ ಕೂಗು ಕೂಡ ಸಂಗೀತದಂತೆ ಭಾಸವಾಗುತ್ತದೆ. ಹಾಡು ಎಂದಾಕ್ಷಣ ಅದು 4-5 ನಿಮಿಷದ ಹಾಡೇ ಆಗಿರಬೇಕು ಅಂತೇನೂ ಇಲ್ಲ. ಅಲ್ಲದೆ, ಸಾಹಿತ್ಯ ಇರಲೇ ಬೇಕು ಅಂತಾನೂ ಅಲ್ಲ. ಕೆಲವಕ್ಕೆ ಸಾಹಿತ್ಯ ಇದ್ದರೆ, ಇನ್ನು ಕೆಲವು ವಾದ್ಯಗಳನ್ನು ಬಳಸಿ ಸಿದ್ಧಪಡಿಸಲಾಗುವುದು. ರೆಗ್ಯುಲರ್ ಹಾಡುಗಳು ಇರುತ್ತವೆ. ಅದರ ಜತೆ ಹೊಸ ರೀತಿಯ ಹಾಡುಗಳೂ ಇರುತ್ತವೆ. ಹೊಸ ವಿಧಾನದ ಹಾಡುಗಳನ್ನು ಸೃಷ್ಟಿಸಲಿದ್ದೇವೆ’ ಎನ್ನುತ್ತಾರೆ ನಂಜುಂಡ.
ಹಾಗಂತ ಇದು ಟಿವಿಯಲ್ಲಿ ನೋಡುವ ಚಿತ್ರಮಂಜರಿ ಕಾರ್ಯಕ್ರಮದಂತೆ ಖಂಡಿತ ಇರುವುದಿಲ್ಲ. ಬದಲಿಗೆ ಕತೆ ಇರುವ ಸಿನಿಮಾ ಆಗಿರುತ್ತದೆ ಎನ್ನುವುದು ಅವರ ಅಭಿಪ್ರಾಯ.
ಇಂಥದೊಂದು ಆಲೋಚನೆ ನಿರ್ದೇಶಕರಿಗೆ ಬಂದಿದ್ದೂ ಕುತೂಹಲಕಾರಿಯಾಗಿದೆ. ‘ಒಂದು ಸಾರಿ ನಾನು ಗೆಳೆಯನ ಮಗಳ ಹುಟ್ಟು ಹಬ್ಬಕ್ಕೆ ಹೋಗಿದ್ದೆ. ಆಗ ಅವನು ಮನೆಗೆ ಬಂದವರಿಗೆಲ್ಲಾ ತನ್ನ ಮಗಳಂತೆಯೇ ಅನುಕರಿಸಿ, ಮಕ್ಕಳಂತೆ ಮಾತನಾಡಲು ಪ್ರಯತ್ನಿಸುತ್ತಿದ್ದ. ಅದರಲ್ಲಿ ಸಂಗೀತದ ರಿದಂ ಇತ್ತು. ಜನರು ಪ್ರತಿನಿತ್ಯ ಸಂಗೀತಕ್ಕೆ ಹೇಗೆ ಅಡಿಕ್ಟ್ ಆಗಿದ್ದಾರೆ ಅನ್ನುವುದನ್ನು ಎಲ್‌ಎನ್ ಶಾಸ್ತ್ರಿ ಜತೆ ಚರ್ಚೆ ಮಾಡುವಾಗ ಈ ಐಡಿಯಾ ಹೊಳೆಯಿತು’ ಅಂತಾರೆ ನಂಜುಂಡ.
ಶಾಸ್ತ್ರಿ ಈ ಮೊದಲು ನಂಜುಂಡ ನಿರ್ದೇಶನದ ಚಿತ್ರಗಳಿಗೆ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಬಿಡುಗಡೆ ಆಗಬೇಕಿರುವ ‘ಕನಸಲೂ ನೀನೇ ಮನಸಲೂ ನೀನೆ’ ಚಿತ್ರಕ್ಕೂ ಇವರದೇ ಸಂಗೀತವಿದೆ. ಆದರೆ, ಒಂದೇ ಚಿತ್ರಕ್ಕೆ 50 ಹಾಡುಗಳು ಎಂದಾಗ ಹುಚ್ಚು ಆಲೋಚನೆ ಅನ್ನಿಸಿದೆ.
‘ಮೆಲೋಡಿ ಸಿನಿಮಾದ ಬಿಡುಗಡೆಯ ಸಿದ್ಧತೆಯಲ್ಲಿದ್ದಾಗ ನಿರ್ದೇಶಕರು ಬಂದು ಈ ವಿಚಾರ ಹೇಳಿದರು. ಒಂದು ಸಿನಿಮಾಗೆ ವಿಭಿನ್ನವಾದ ರಾಗದಲ್ಲಿ 4-5 ಹಾಡು ಕೊಡುವ ನನಗೆ 50 ಹಾಡುಗಳಿಗೆ ರಾಗ ಸಂಯೋಜನೆ ಮಾಡಬೇಕು ಅಂದಾಗ ಗಾಬರಿ ಆಯ್ತು. ಸಾಮಾನ್ಯವಾಗಿ ಒಂದು ಚಿತ್ರದ ಹಾಡಿಗೆ ಟ್ಯೂನ್ ಮಾಡುವ ಮೊದಲು ಹಲವು ರಾಗಗಳನ್ನು ಕಲ್ಪಿಸಿಕೊಂಡಿರುತ್ತೇನೆ. ಇನ್ನು 50 ಹಾಡಿಗೆ 200-300 ಟ್ಯೂನ್‌ಗಳನ್ನಾದರೂ ಆಲೋಚಿಸಬೇಕಾಗುತ್ತದೆ ಎಂಬ ಗಾಬರಿ ಆಯಿತು. ನಂಜುಂಡ ಅವರ ಚಿತ್ರದ ಕಲ್ಪನೆಯನ್ನು ವಿವರಿಸಿದಾಗ ನಿಜವಾಗಲೂ ಥ್ರಿಲ್ ಆದೆ. ಇದುವರೆಗೆ ಸಂಗೀತ ಸಂಯೋಜನೆ ಮಾಡಿರುವ ನನಗೆ, ಈಗ ಚಿತ್ರದ ಸ್ಕ್ರಿಪ್ಟ್‌ನ ಒಂದು ಭಾಗವಾಗುವ ಅವಕಾಶ ಸಿಕ್ಕಿದೆ’ ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ ಶಾಸ್ತ್ರಿ.
ಚಿತ್ರಕ್ಕೆ ಸಾಕಷ್ಟು ಪೂರ್ವ ತಯಾರಿಯ ಅಗತ್ಯ ಇರುವುದರಿಂದ ತುಂಬಾ ಸಮಯ ಬೇಕಾಗುತ್ತದೆ ಎಂದಿರುವ ನಿರ್ದೇಶಕ, ಈ ವರ್ಷದ ಕೊನೆಯಲ್ಲಿ ಚಿತ್ರ ಪ್ರಾರಂಭಿಸುವುದಾಗಿ ಹೇಳಿದ್ದಾರೆ.
ಭಾರತೀಯ ಚಿತ್ರರಂಗದಲ್ಲಿ ಹಾಡು ಅಳವಡಿಸಿಕೊಳ್ಳುವುದು ಸಾಮಾನ್ಯ ಸಂಗತಿ. ಬೇರೆ ಯಾವ ದೇಶದಲ್ಲೂ ಚಲನಚಿತ್ರಗಳಲ್ಲಿ ಹಾಡು ಮತ್ತು ನೃತ್ಯ ಬಳಸಿಕೊಳ್ಳುತ್ತಿಲ್ಲ. ಭಾರತೀಯ ಸಿನಿಮಾಗಳಲ್ಲಿ ಹಾಡೇ ಪ್ರಧಾನ ಪಾತ್ರ ವಹಿಸುತ್ತದೆ. ಹಾಡಿನಿಂದಲೇ ಸಿನಿಮಾಗಳು ಗೆದ್ದ ಉದಾಹರಣೆಗಳೂ ಇವೆ. ಚಿತ್ರಕ್ಕೆ ಪ್ರಮೋಷನ್ ಸಿಗುವುದೇ ಹಾಡುಗಳಿಂದ. ಹೀಗಿರುವಾಗ ಹಾಡಿನಿಂದಲೇ ಚಿತ್ರ ಜನಮನ ಸೆಳೆಯುವಲ್ಲಿ ಯಶಸ್ವಿಯಾದರೆ ಆಶ್ಚರ್ಯವಿಲ್ಲ.
