ಹಿರಿಯ ನಟ ಅನಂತ್‌ನಾಗ್ ಒಂದೊಂದು ಚಿತ್ರದಲ್ಲಿ ಒಂದೊಂದು ಗೆಟಪ್‌ನಲ್ಲಿ ಕಾಣಿಸಿಕೊಳ್ಳುತ್ತಿರುವುದು ಹೊಸ ವಿಷಯವೇನಲ್ಲ. ಯೌವನದಲ್ಲಿ ಕಾದಂಬರಿ ಆಧಾರಿತ ಚಿತ್ರಗಳು ಮತ್ತು ಸೌಮ್ಯವಾದ ಪಾತ್ರಗಳಿಗೇ ಹೆಚ್ಚು ಬ್ರಾಂಡ್ ಆಗಿದ್ದ ಅನಂತ್, ಅಂದಿಗಿಂತ ಇಂದು ವಿಭಿನ್ನವಾದ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ಈಗ ಮತ್ತೆ ಭೂತವಾಗಿ ತೆರೆಯ ಮೇಲೆ ಬಂದು ‘ನಾನಿನ್ನ ಬಿಡಲಾರೆ’ ಚಿತ್ರವನ್ನು ನೆನಪಿಸಲಿದ್ದಾರೆ.
ಶ್ರೀವತ್ಸ ನಿರ್ದೇಶನದ ಪ್ರಜ್ವಲ್ ದೇವರಾಜ್ ಅಭಿನಯದ ‘ಮೃಗಶಿರಾ’ ಚಿತ್ರದಲ್ಲಿ ಅನಂತ್ ನಾಗ್ ಭೂತದ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ‘ನಾನಿನ್ನ ಬಿಡಲಾರೆ’ ಚಿತ್ರದಲ್ಲಿ ಅನಂತ್‌ನಾಗ್ ಕಣ್ಣುಗಳು ಹೇಗಿದ್ದವೋ ಹಾಗೇ ಬಳಸಿಕೊಳ್ಳಲಾಗಿದೆ. ಇದಲ್ಲದೆ, ಮೇಲುಕೋಟೆಯ ಬೆಟ್ಟದ ಮೇಲೆ ಇರುವ ಸುಮಾರು ಮೂರು ಅಂತಸ್ತು ಎತ್ತರದ ಕಂಬದ ಮೇಲೆ ಅನಂತ್‌ನಾಗ್ ದೆವ್ವದ ನೃತ್ಯವನ್ನು ಮಾಡಿರೋದು ವಿಶೇಷ.
‘ಮೇಲುಕೋಟೆ ಬೆಟ್ಟದ ಮೇಲೆ ಒಂದು ಅಡಿ ಅಗಲದ ಕಂಬ ಇದೆ. ಅದರ ಮೇಲೆ ಅನಂತ್ ಸರ್ ನೃತ್ಯ ಮಾಡಿದ್ದಾರೆ. ಎರಡು ಏಣಿಗಳನ್ನು ಮೊಳೆ ಹೊಡೆದು ನಿಲ್ಲಿಸಿ, ಅದರ ಮೇಲೆ ಹರೆಯದ ಹುಡುಗನ ರೀತಿ ಸರಸರ ಹತ್ತಿ ನಿಂತರು. ಒಂದು ಚೂರು ವಾಲಿದರೂ ಬೀಳುತ್ತಾರೆ. ನಮಗೆಲ್ಲಾ ಮೈ ಜುಂ ಅಂದಿತು. ಆದರೆ, ಅವರು ಸ್ವಲ್ಪನೂ ಹಿಂಜರಿಯದೆ, ಅದ್ಭುತವಾಗಿ ನರ್ತಿಸಿದ್ದಾರೆ’ ಎಂದು ಅನುಭವ ಹಂಚಿಕೊಂಡರು ನಿರ್ದೇಶಕ ಶ್ರೀವತ್ಸ.
ಪ್ರಜ್ವಲ್, ಪನ್ನಗ ನಾಗಾಭರಣ, ತಬಲಾ ನಾಣಿ ಕಾಡಿನಲ್ಲಿ ಸಿಕ್ಕಿಕೊಳ್ಳುತ್ತಾರೆ. ಕಾಡಿಗೂ, ಅಲ್ಲಿ ವಾಸಿಸುವ ಜನರಿಗೂ ದೆವ್ವಕ್ಕಿರುವ ನಂಟು, ಇವರ ಮಧ್ಯೆ ಸಿಕ್ಕಿಕೊಂಡ ಮೂವರೂ ಹೇಗೆ ಹೊರಬರುತ್ತಾರೆ ಅನ್ನೋದೇ ಕತೆ. ಅಡ್ವೆಂಚರಸ್ ಮತ್ತು ಫ್ಯಾಂಟಸಿ ಚಿತ್ರವನ್ನು ಕುಂದಾಪುರದ ಬಳಿಯ ತೊಂಬೆಟ್ಟುವಿನ ದಟ್ಟವಾದ ಕಾಡಿನಲ್ಲಿ ಚಿತ್ರೀಕರಿಸಲಾಗಿದೆ. ಚಿತ್ರದ ಶೇ. 90 ಭಾಗ ಕಾಡಿನಲ್ಲೇ ಕತೆ ಸಾಗುತ್ತದೆ.
‘ಇದುವರೆಗೆ ಜನರು ಹೋಗದ ಕಾಡಿನಲ್ಲಿ ಚಿತ್ರೀಕರಿಸಿದ್ದೇವೆ. ನಮಗಿದ್ದ ತೊಂದರೆ ಅಂದ್ರೆ, ವಿಪರೀತ ಹಾವುಗಳ ಕಾಟ, ಬುಲೆಟ್ ತರ ಬೀಳೋ ಮಳೆ ಹನಿ. ಪ್ರಜ್ವಲ್ ಹೊಸ ರೀತಿಯ ಪಾತ್ರದಲ್ಲಿ ನಟಿಸಿರೋದು ವಿಶೇಷ’ ಎನ್ನುತ್ತಾರೆ ನಿರ್ದೇಶಕ.
ಅನಂತ್‌ನಾಗ್ 35ವರ್ಷಗಳ ನಂತರ ಮತ್ತೆ ದೆವ್ವವಾಗಿ ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತಿದ್ದಾರೆ. ನಾನಿನ್ನ ಬಿಡಲಾರೆ ಕನ್ನಡ ಚಿತ್ರರಂಗದಲ್ಲಿ ಸಂಚಲನವನ್ನೇ ಹುಟ್ಟುಹಾಕಿತ್ತು. ಸೌಮ್ಯ ಮುಖದ ಅನಂತ್‌ರನ್ನು ಭಯಾನಕವಾಗಿ ನೋಡಿ ಪ್ರೇಕ್ಷಕ ನಡುಗಿಹೋಗಿದ್ದ. ಆ ಕಣ್ಣುಗಳನ್ನು ಜನ ಮರೆಯಲು ಸಾಧ್ಯವಿಲ್ಲ. ಅನಂತ್ ಆ ಚಿತ್ರದಲ್ಲಿ ಲಕ್ಷ್ಮಿ ಅವರ ಪತಿಯಾಗಿ ನಟಿಸಿದ್ದರು. ವಿಜಯ್ ನಿರ್ದೇಶನದ ಆ ಚಿತ್ರ ಹಿಂದಿಗೂ ರಿಮೇಕ್ ಆಯಿತು. ಅದರಲ್ಲಿ ಅನಂತ್ ಜತೆ ರೇಖಾ ನಟಿಸಿದ್ದರು. ಹಂಸಗೀತೆ, ಬಯಲುದಾರಿ, ಅನುರೂಪ, ಕನ್ನೇಶ್ವರ ರಾಮದಂಥ ಚಿತ್ರಗಳಲ್ಲಿ ಅನಂತ್‌ರನ್ನು ನೋಡಿದ್ದ ಪ್ರೇಕ್ಷಕನಿಗೆ ನಾ ನಿನ್ನ ಬಿಡಲಾರೆ ಚಿತ್ರ ಹೊಸ ಅನುಭವ ನೀಡಿತ್ತು.
ಪ್ರತಿಭಾವಂತ ನಟರಾದ ಅನಂತ್‌ನಾಗ್‌ರನ್ನು ವೈವಿಧ್ಯಮಯ ಪಾತ್ರಗಳು ಹುಡುಕಿಕೊಂಡು ಬರುತ್ತಿರುವುದರಲ್ಲಿ ಆಶ್ಚರ್ಯವೇನೂ ಇಲ್ಲ. ಆದರೆ, ಮತ್ತೆ ಮತ್ತೆ ತೆರೆಯ ಮೇಲೆ ಅನಂತ್‌ರ ಅಭಿನಯವನ್ನು ವಿಭಿನ್ನವಾಗಿ ನೋಡುವುದೇ ಪ್ರೇಕ್ಷಕರಿಗೆ ಸಂಭ್ರಮದ ವಿಷಯವೆ.
