ಸ್ಯಾಂಡಲ್‌ವುಡ್‌ನಲ್ಲಿ ಹೆಸರು ಮಾಡಿದ ಪರಭಾಷಾ ನಟ, ನಟಿಯರ ದೊಡ್ಡ ಪಟ್ಟಿಯೇ ಇದೆ. ಕನ್ನಡದಲ್ಲಿ ಹೆಸರು ಮಾಡಿದ್ದ ನಟ ಸಾಯಿಕುಮಾರ್ ಮಗ, ತೆಲುಗಿನ ಜನಪ್ರಿಯ ನಟ ಆದಿ ಸಾಯಿಕುಮಾರ್ ಎಂಟ್ರಿ ಕೊಡಲಿದ್ದಾರೆ. ಇವರ ನಂತರ, ಸಹೋದರ ರವಿಶಂಕರ್ ಮಗ ಕೂಡ ಚಿತ್ರರಂಗ ಪ್ರವೇಶಿಸಲಿದ್ದಾರೆ.
* ಪದ್ಮಾ ಶಿವಮೊಗ್ಗ
ಆಂಧ್ರ ಪ್ರದೇಶದಿಂದ ಕನ್ನಡ ನಾಡಿಗೆ ಬಂದು ಹೆಸರು ಮಾಡಿದ ನಟರಲ್ಲಿ ಸಾಯಿ ಕುಮಾರ್ ಮತ್ತು ರವಿಶಂಕರ್ ಪ್ರಮುಖರು. ಇಬ್ಬರೂ ಸಹೋದರರು ಕನ್ನಡ ಚಿತ್ರರಂಗವೇ ತಮ್ಮ ತವರು ಮನೆಯೆನ್ನುವಂತೆ ಇದ್ದಾರೆ. ಈಗ ತಮ್ಮ ಮಕ್ಕಳನ್ನೂ ಕನ್ನಡ ಚಿತ್ರರಂಗದಲ್ಲಿ ಬೆಳೆಸುವ ಆಸೆ ಇವರಿಗಿದ್ದಂತಿದೆ. ತೆಲುಗಿನಲ್ಲಿ ಈಗಾಗಲೇ ಹೆಸರು ಮಾಡಿರುವ ನಟ ಆದಿ ಸಾಯಿಕುಮಾರ್ ಸದ್ಯದಲ್ಲೇ ಸ್ಯಾಂಡಲ್‌ವುಡ್‌ನಲ್ಲೂ ತೆಲುಗು ಝಲಕ್ ತೋರಿಸಲು ಬರುತ್ತಿದ್ದಾರೆ. ಇನ್ನೆರಡು ತಿಂಗಳಲ್ಲಿ ಚಿತ್ರ ಸೆಟ್ಟೇರಲಿದೆ.
ಆದಿ ಸಾಯಿಕುಮಾರ್ ನಾಲ್ಕು ವರ್ಷಗಳಲ್ಲಿ ಆರು ಚಿತ್ರಗಳಲ್ಲಿ ನಟಿಸಿದ್ದಾರೆ. ಮೊದಲ ಚಿತ್ರ ಪ್ರೇಮ ಕವ್ವಾಲಿಯಲ್ಲಿನ ನಟನೆಗಾಗಿ ಹಲವು ಪ್ರಶಸ್ತಿಗಳನ್ನು ಬಾಚಿಕೊಂಡಿದ್ದಾರೆ. ಫಿಲ್ಮ್ ಫೇರ್ ಅವಾರ್ಡ್, ಸೀಮಾ ಅವಾರ್ಡ್, ಸಿನಿಮಾ ಪ್ರಶಸ್ತಿ, ಹೈದರಾಬಾದ್ ಟೈಮ್ಸ್ ನೀಡುವ ಭರವಸೆಯ ನಟ ಪ್ರಶಸ್ತಿಗಳನ್ನು ಪಡೆದು ಪ್ರತಿಭಾವಂತ ನಟ ಎಂಬುದನ್ನು ಸಾಬೀತು ಪಡಿಸಿದ ನಟ.
ಇತ್ತೀಚೆಗೆ ಬಿಡುಗಡೆಯಾದ ರಫ್ ಚಿತ್ರ ಸೂಪರ್ ಹಿಟ್ ಆಗಿದೆ. ಲವ್ಲಿ, ಸುಕುಮಾರುಡು, ಗಾಳಿಪಟಂ ಚಿತ್ರಗಳೂ ಜನಪ್ರಿಯತೆ ಗಳಿಸಿವೆ. ಆಂಧ್ರದಲ್ಲಿ ಈಗಾಗಲೇ ಡಿಮಾಂಡ್ ಕ್ರಿಯೇಟ್ ಮಾಡಿಕೊಂಡಿರುವ ಆದಿ ಸ್ಯಾಂಡಲ್‌ವುಡ್ ಕಡೆ ಗಮನ ಹರಿಸಿರುವುದು ವಿಶೇಷವಾಗಿದೆ.
ರವಿಶಂಕರ್ ಇತ್ತೀಚೆಗೆ ಹೈದರಾಬಾದ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ಕನ್ನಡ ಚಿತ್ರರಂಗದ ಬಗ್ಗೆಯೇ ಹೆಮ್ಮೆಯಿಂದ ದೊಡ್ಡ ಭಾಷಣ ಮಾಡಿದ್ದಾರೆ. ಕನ್ನಡ ಚಿತ್ರರಂಗ ತಮ್ಮನ್ನು ಬೆಳೆಸಿದ ರೀತಿಗೆ ಅವರು ಕೃತಜ್ಞತೆಯನ್ನು ಹೇಳುತ್ತಲೇ ಇರುತ್ತಾರೆ. ಇದೂ ಕೂಡ ಆದಿ ಕನ್ನಡ ಚಿತ್ರಗಳಲ್ಲಿ ನಟಿಸಬೇಕು ಎಂಬುದಕ್ಕೆ ಪ್ರೇರಣೆಯಾಗಿದ್ದಲ್ಲಿ ಆಶ್ಚರ್ಯವಿಲ್ಲ. ರವಿಶಂಕರ್ ಅವರಿಗೆ ತಮ್ಮ ಮಗನೂ ಕನ್ನಡ ಚಿತ್ರದಲ್ಲಿ ನಟಿಸಬೇಕೆಂಬ ಆಸೆ ಇದೆ. ಆದಿ ಸಾಯಿಕುಮಾರ್ ಎಂಟ್ರಿಯ ನಂತರ ರವಿಶಂಕರ್ ಮಗನೂ ಕನ್ನಡ ಚಿತ್ರರಂಗ ಪ್ರವೇಶ ಮಾಡಲಿದ್ದಾರೆಂದು ತಿಳಿಸಿದ್ದಾರೆ.
—
‘ತೆಲುಗು ಚಿತ್ರರಂಗದಲ್ಲಿ ನೆಲೆ ಕಂಡುಕೊಳ್ಳಲು ನಾನು ಒದ್ದಾಡುತ್ತಿದ್ದಾಗ, ಕನ್ನಡ ಚಿತ್ರರಂಗ ನನ್ನನ್ನು ಕೈಹಿಡಿದು ಇಲ್ಲಿಯವರೆಗೆ ಪೋಷಿಸಿಕೊಂಡು ಬಂದಿದೆ. ಪರಭಾಷೆಯವನು ಎಂದು ಎಲ್ಲೂ ನನ್ನನ್ನು ಕಂಡಿಲ್ಲ. ಈ ಕೃತಜ್ಞತೆಯೊಂದಿಗೆ ನಮ್ಮ ಮಕ್ಕಳನ್ನೂ ಇಲ್ಲಿಗೆ ಕರೆತರಬೇಕು ಎಂಬ ಆಸೆ ನಮ್ಮದು’
-ರವಿಶಂಕರ್, ನಟ
