ಒಂದು ಕಾಲದಲ್ಲಿ ತೆರೆಯ ಮೇಲೆ ಮಿಂಚಿ ಸಹಸ್ರಾರು ಅಭಿಮಾನಿಗಳ ಮನಸು ಗೆದ್ದಿದ್ದ ಮನಿಷಾ ಕೊಯಿರಾಲ, ಒಂದಿಷ್ಟು ಕಾಲ ತೆರೆಯ ಹಿಂದೆ ಸರಿದಿದ್ದರು.
ವೈಯಕ್ತಿಕ ಬದುಕಿನಲ್ಲಿ ಒಂದಿಷ್ಟು ಎಡವಟ್ಟು ಮಾಡಿಕೊಂಡು ಸುದ್ದಿಯಾದರು. ವೃತ್ತಿ ಬದುಕಿನಲ್ಲಿ ಅವಕಾಶ ಸಿಗದಿದ್ದಕ್ಕೋ ಏನೋ ಮದಿರೆಯ ದಾಸಿಯಾಗಿದ್ದ ಮನಿಷಾ, ಕ್ಯಾನ್ಸರ್‌ನಿಂದಲೂ ಬಳಲಿದ್ದರು. ಇದೀಗ ಮತ್ತೆ ಬಣ್ಣದ ಲೋಕದಲ್ಲಿ ಮಿಂಚಲು ಸಿದ್ಧವಾಗಿದ್ದಾರೆ.
ಎರಡ್ಮೂರು ವರ್ಷಗಳ ಬ್ರೇಕ್ ತೆಗೆದುಕೊಂಡಿದ್ದ ಮನಿಷಾ ಇದೀಗ ಶೂಟಿಂಗ್‌ನಲ್ಲಿ ಬಿಝಿಯಾಗುವ ಎಲ್ಲ ಲಕ್ಷಣಗಳು ಕಾಣಿಸುತ್ತಿವೆ. ಎಲ್ಲವೂ ಅಂದುಕೊಂಡಂತೆ ಆದರೆ ನಿರ್ದೇಶಕ ರಾಜ್‌ಕುಮಾರ್ ಸಂತೋಷಿ ಸಿನಿಮಾದಲ್ಲಿ ಮನಿಷಾ ಮತ್ತೆ ತಮ್ಮ ಅಭಿಮಾನಿಗಳ ಎದುರು ನಿಲ್ಲಲಿದ್ದಾರೆ.
ಮಾರ್ಚ್ ಹೊತ್ತಿಗೆ ಹೊಸ ಸಿನಿಮಾದ ಶೂಟಿಂಗ್ ಆರಂಭವಾಗಲಿದೆ. ಮನಿಷಾ ಎಂತಹ ಪಾತ್ರ ನಿಭಾಯಿಸಲಿದ್ದಾರೆ, ಪ್ರಮುಖ ಪಾತ್ರವಾ, ಪೋಷಕ ಪಾತ್ರವಾ ಅಥವಾ ಅತಿಥಿಯಾಗಿ ತೆರೆಯ ಮೇಲೆ ಬಂದು ಹೋಗಲಿದ್ದಾರೆಯೇ ಗೊತ್ತಿಲ್ಲ. ಈ ಸಿನಿಮಾದ ಬಗ್ಗೆ ಸದ್ಯಕ್ಕೆ ಏನೇನೂ ಮಾಹಿತಿ ಇಲ್ಲ.
ಮನಿಷಾ ಕೂಡ ಈ ಬಗ್ಗೆ ಹೆಚ್ಚು ಏನನ್ನೂ ಹೇಳುವುದಿಲ್ಲ. ಆದ್ರೆ ‘ನಾನು ಹಾಗೂ ರಾಜ್‌ಕುಮಾರ್ ಸಂತೋಷಿ ಹಲವಾರು ಬಾರಿ ಮಾತುಕತೆ ನಡೆಸಿದ್ದೇವೆ ಅನ್ನುವುದನ್ನಷ್ಟೆ ಹೇಳಿಕೊಂಡಿದ್ದಾರೆ. ರಾಜ್ ಕುಮಾರ್ ಅವರು ಈ ಬಗ್ಗೆ ಪ್ರತಿಕ್ರಿಯೆಗೆ ಸಿಕ್ಕಿಲ್ಲ. ಒಟ್ಟಾರೆ ಮನಿಷಾ ಅವರನ್ನು ಯಾವ ರೂಪದಲ್ಲಿ ನೋಡಬಹುದು ಎನ್ನುವ ಕುತೂಹಲ ಮಾತ್ರ ಅವರ ಅಭಿಮಾನಿಗಳಲ್ಲಿ ಮೂಡಿದೆ.
**
ಸೂರಜ್‌ಗೆ ಅನುಪಮ್ ಖೇರ್ ಲಕ್ಕಿ
ನಿರ್ದೇಶಕ ಸೂರಜ್ ಭಾರ್ಜಾತ್ಯ ಅವರಿಗೆ ಹಿರಿಯ ನಟ ಅನುಪಮ್ ಖೇರ್ ತುಂಬ ಲಕ್ಕಿಯಂತೆ.
ಬಾಲಿವುಡ್‌ನ ಸೂಪರ್ ಡೂಪರ್ ಹಿಟ್ ಚಿತ್ರ ಹಮ್ ಆಪ್ ಕೆ ಹೈ ಕೌನ್‌ನ ನಿರ್ದೇಶಕ ಸೂರಜ್, ಇನ್ನು ಮುಂದೆ ತಮ್ಮ ಪ್ರತಿ ಚಿತ್ರದಲ್ಲೂ ಅನುಪಮ್ ಖೇರ್ ಅವರಿಗೆ ಪಾತ್ರ ಕೊಡುವುದಾಗಿ ಹೇಳಿದ್ದಾರೆ.
ಅನುಪಮ್ ಖೇರ್ ನಟಿಸಿದ ಸೂರಜ್ ಅವರ ಪ್ರತಿ ಚಿತ್ರ ಸೂಪರ್ ಹಿಟ್ ಆಗಿದೆಯಂತೆ. ಹಾಗಾಗಿ ಸೂರಜ್ ಈ ನಿರ್ಧಾರ ತೆಗೆದುಕೊಂಡಿದ್ದಾರೆ. ಅಂದಹಾಗೆ, ಸೂರಜ್ ನಿರ್ದೇಶನದ ಹಮ್ ಆಪ್ ಕೆ ಹೈ ಕೌನ್, ವಿವಾಹ್ ಹಾಗೂ ಹಮ್ ಸಾಥ್ ಸಾಥ್ ಹೈ ಸೇರಿದಂತೆ ಅನೇಕ ಚಿತ್ರಗಳಲ್ಲಿ ಅನುಪಮ್ ಖೇರ್ ನಟಿಸಿದ್ದಾರೆ.
**
ಮಾದಕ ನಟಿಯಾಗುವ ಆಸೆ
ಯಾರು ಏನೇ ಹೇಳಲಿ, ಸಿನಿಮಾ ನಟಿಯರು ಮಾತ್ರ ತಾವು ಯಾವಾಗಲೂ ಮಾದಕವಾಗಿ ಕಾಣಿಕೊಳ್ಳಬೇಕೆಂದೇ ಬಯಸುತ್ತಾರೆ.
ಇದಕ್ಕೆ ಯಾವ ವಯಸ್ಸಿನ ಹಂಗೂ ಇಲ್ಲ, ಯಾವುದೇ ಭಾಷೆಯ ಚೌಕಟ್ಟೂ ಇಲ್ಲ. ಎಷ್ಟೋ ಟೀಕೆಗಳ ನಡುವೆಯೂ ಕೆಲವು ನಟಿಯರು ತಾವು ತುಂಬ ಗ್ಲಾಮರಸ್ ಆಗಿ ಕಾಣಿಸಿಕೊಂಡಿದ್ದನ್ನು ಸಮರ್ಥಿಸಿಕೊಂಡಿದ್ದೂ ಇದೆ.
ಇದೀಗ ಹಾಲಿವುಡ್ ನಟಿ ಎಮ್ಮಾ ವಾಟ್ಸನ್ ಕೂಡ ಇದೇ ಸಾಲಿಗೆ ಸೇರಿದ್ದಾರೆ. ಇತ್ತೀಚೆಗೆ ರಿಗ್ರೆಶನ್ ಚಿತ್ರದಲ್ಲಿ ಎಮ್ಮಾ ತುಂಬ ಗ್ಲಾಮ್ ಆಗಿ ಕಾಣಿಸಿಕೊಂಡಿದ್ದಾರೆ. ಅಷ್ಟೇ ಅಲ್ಲ, ಟಾಪ್‌ಲೆಸ್ ಆಗಿ ಕೂಡ ಮಿಂಚಿದ್ದಾರೆ.
ಇದಕ್ಕೆ ಅನೇಕರು ಟೀಕೆ ಮಾಡಿದ್ದೂ ಇದೆ. ಆದರೆ ಇದಕ್ಕೆ ನೇರವಾಗಿ ಉತ್ತರ ಕೊಟ್ಟಿರುವ ಎಮ್ಮಾ ವಾಟ್ಸನ್, ‘ನನಗೆ ಮಾದಕವಾಗಿ ಕಾಣಿಸಿಕೊಳ್ಳಬೇಕೆಂಬ ಆಸೆ. ನಟಿಯೊಬ್ಬಳಿಗೆ ಗ್ಲಾಮರ್ ಎನ್ನುವುದು ಪ್ಲಸ್ ಪಾಯಿಂಟ್. ಅಷ್ಟೇ ಅಲ್ಲ, ಚಿತ್ರದ ದೃಶ್ಯಕ್ಕೂ ಟಾಪ್‌ಲೆಸ್ ಆಗಿ ಕಾಣಿಸಿಕೊಳ್ಳುವುದು ಅನಿವಾರ್ಯವಾಗಿತ್ತು. ಹೀಗಾಗಿ ಆ ಥರ ಕಾಣಿಸಿಕೊಂಡಿದ್ದೇನೆ’ ಎಂದಿದ್ದಾರೆ. ಅದಕ್ಕೇ ಈಗ ಟೀಕೆ ಮಾಡುವವರು ತೆಪ್ಪಗಾಗಿದ್ದಾರೆ.
**
ಜೆನ್ನಿಫರ್ ಡೈವ್
ಹಾಲಿವುಡ್ ನಟಿ ಜೆನ್ನಿಫರ್ ಲಾರೆನ್ಸ್ ಅವರ ಮುಂದಿನ ಚಿತ್ರ ಯಾವುದು ಎಂಬುದರ ಬಗ್ಗೆ ಸಾಕಷ್ಟು ಕುತೂಹಲಗಳು ಮೂಡಿದ್ದವು.
ಅನೇಕ ನಿರ್ದೇಶಕ ಹಾಗೂ ನಿರ್ಮಾಪಕರ ಹೆಸರುಗಳೂ ಈ ವೇಳೆ ಸುಳಿದಾಡಿದ್ದವು. ಆದರೆ ಇವರ‌್ಯಾರ ಚಿತ್ರದಲ್ಲಿ ಈ ನಟಿ ನಟಿಸುತ್ತಿಲ್ಲ. ಬದಲಾಗಿ ಜೆನ್ನಿಫರ್ ಇದೀಗ ನಟಿಸಲಿರುವ ಚಿತ್ರ ‘ದ ಡೈವ್’ ಎಂದು ಹೇಳಲಾಗುತ್ತಿದೆ.
ಯೆಸ್, ಇದು ಜೇಮ್ಸ್ ಕ್ಯಾಮೆರೂನ್ ಅವರ ನಿರ್ಮಾಣದ ಸಿನಿಮಾ. ಇದರಲ್ಲಿ ಜೆನ್ನಿಫರ್ ನಟಿಸುವುದು ಬಹುತೇಕ ಖಚಿತವಾಗಿದೆ. ಈ ಮೊದಲು ಜೇಮ್ಸ್ ಅವರು ಟೈಟಾನಿಕ್ ಸಿನಿಮಾದಿಂದ ಜಗತ್ತಿನಾದ್ಯಂತ ಸುದ್ದಿಯಾದ ನಿರ್ಮಾಪಕ.
ಇಂಥದರಲ್ಲಿ ಇವರ ಸಿನಿಮಾದಲ್ಲಿ ನಟಿಸಲು ಜೆನ್ನಿಫರ್ ಆಸಕ್ತಿ ತೋರುವುದು ಸಹಜ. ಇಷ್ಟರಲ್ಲೇ ಈ ಕುರಿತು ಮತ್ತೊಂದಿಷ್ಟು ವಿವರಗಳು ಬಹಿರಂಗಗೊಳ್ಳಲಿವೆ.
