ಬಾಲಿವುಡ್ ನಟಿ ಕಂ ಡಾನ್ಸರ್ ಶಿವಾನಿ ಸಿಂಗ್ ಸ್ಯಾಂಡಲ್‌ವುಡ್‌ಗೆ ಪ್ರವೇಶ ಮಾಡುತ್ತಿದ್ದಾರೆ. ಅವರು ಸುಪ್ರಿತ್ ನಿರ್ದೇಶನದ ಮರೆಯುವ ಮುನ್ನ ಸಿನಿಮಾದಲ್ಲಿ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಶಿವಾನಿ ಮೂಲತಃ ಡಾನ್ಸರ್ ಕಂ ಮಾಡಲ್. ಬಾಲಿವುಡ್ ಸಿನಿಮಾದಲ್ಲೂ ನಟಿಸಿದ್ದಾರೆ. ಇದೇ ಮೊದಲ ಬಾರಿಗೆ ದಕ್ಷಿಣ ಭಾರತದ ಚಿತ್ರರಂಗಕ್ಕೆ ಪ್ರವೇಶ ಮಾಡಿದ್ದಾರೆ. ಈ ಚಿತ್ರಕ್ಕೆ ಪ್ರಭುದೇವ ಸಹೋದರ ನಾಗೇಂದ್ರ ಪ್ರಸಾದ್ ನಾಯಕ ಎನ್ನುವುದು ವಿಶೇಷ.
‘ಶಿವಾನಿ ಈ ಚಿತ್ರದಲ್ಲಿ ವಿಶೇಷ ಪಾತ್ರ ಮಾಡುತ್ತಿದ್ದಾರೆ. ಬಬ್ಲಿ ಮತ್ತು ಭಾವನಾತ್ಮಕ ಎರಡೂ ಬೆರೆತಿರುವ ಪಾತ್ರವದು. ಅಲ್ಲದೇ ನಾಗೇಂದ್ರ ಪ್ರಸಾದ್ ಡಾನ್ಸರ್. ಇವರಿಗೂ ಡಾನ್ಸ್ ಗೊತ್ತಿದೆ. ಹೀಗಾಗಿಯೇ ಅವರನ್ನು ನಾಯಕಿಯನ್ನಾಗಿ ಆಯ್ಕೆ ಮಾಡಿಕೊಂಡಿದ್ದೇವೆ. ಇದೇ ತಿಂಗಳು ಕೊನೆ ವಾರದಲ್ಲಿ ಸಿನಿಮಾದ ಫೋಟೋ ಶೂಟ್ ಇದೆ. ಫೆಬ್ರುವರಿ ನಂತರ ಸಿನಿಮಾದ ಶೂಟಿಂಗ್’ ಅಂತಾರೆ ನಿರ್ದೇಶಕರು.
ನಿರ್ದೇಶಕ ಸುಪ್ರಿತ್ ಈ ಮೊದಲು ಜೋಗಿ ಪ್ರೇಮ್ ಗರಡಿಯಲ್ಲಿ ಬೆಳೆದವರು. ಸಂಕಲನ ಕಾರ‌್ಯದಲ್ಲೂ ಕೆಲಸ ಮಾಡಿದವರು. ಇದೇ ಮೊದಲ ಬಾರಿಗೆ ನಿರ್ದೇಶನ ಮಾಡುತ್ತಿದ್ದಾರೆ. ಅಲ್ಲದೇ ಈ ಸಿನಿಮಾವನ್ನು ತೆಲುಗು ಮತ್ತು ಕನ್ನಡದಲ್ಲಿ ಏಕಕಾಲಕ್ಕೆ ತರುತ್ತಿದ್ದಾರೆ.
**
ವಿಜಿ ಸಿನಿಮಾ ಜತೆ ಲವ್ ಟ್ರ್ಯಾಕ್ ಟ್ರೇಲರ್
ಕಳೆದ ಒಂದು ತಿಂಗಳಿಂದ ಸುದ್ದಿಯಲ್ಲಿರುವ, ತಮಿಳು ನಿರ್ದೇಶಕ ಕದಿರ್ ನಿರ್ದೇಶನದ ‘ನನ್ನ ಲವ್ ಟ್ರ್ಯಾಕ್’ ಸಿನಿಮಾದ ಫಸ್ಟ್ ಲುಕ್ ಬಿಡುಗಡೆಗೆ ಮುಹೂರ್ತ ಕೂಡಿ ಬಂದಿದೆ. ವಿಜಯ್ ಅಭಿನಯದ ಜಾಕ್ಸನ್ ಚಿತ್ರ ಜನವರಿ 15ಕ್ಕೆ ರಿಲೀಸ್ ಆಗುತ್ತಿದ್ದು, ಅದರೊಡನೆಯೇ ಲವ್ ಟ್ರ್ಯಾಕ್ ಟ್ರೇಲರ್ ಬಿಡುಗಡೆ ಆಗುತ್ತಿದೆ.
ಕಿರುತೆರೆ ಧಾರಾವಾಹಿ ಅಮೃತ ವರ್ಷಿಣಿಯಲ್ಲಿ ನಟಿಸಿದ್ದ ರಕ್ಷಿತ್ ಇದೀಗ ಈ ಚಿತ್ರದ ಮೂಲಕ ನಾಯಕನಾಗಿ ತೆರೆಯ ಮೇಲೆ ಕಾಣಿಸಿಕೊಳ್ಳುತ್ತಿದ್ದಾರೆ. ‘ವಿಜಯ್‌ಗೆ ಮಾಸ್ ಆಡಿಯನ್ಸ್ ಜಾಸ್ತಿ ಇದ್ದಾರೆ. ಅವರ ಚಿತ್ರದ ಜತೆಯಲ್ಲೇ ನಮ್ಮ ಚಿತ್ರದ ಟ್ರೈಲರ್ ಬಿಡುಗಡೆ ಮಾಡುತ್ತಿದ್ದೇವೆ. ಇದುವರೆಗೂ ನಮ್ಮ ಚಿತ್ರದ ಟ್ರೈಲರ್, ಫಸ್ಟ್ ಲುಕ್ ಹೇಗಿದೆ ಎಂಬುದು ಯಾರಿಗೂ ಗೊತ್ತಿಲ್ಲ. ಜನವರಿ 15ಕ್ಕೆ ಎಲ್ಲವೂ ಅನಾವರಣಗೊಳ್ಳಲಿದೆ’ ಎಂದರು ರಕ್ಷಿತ್ .
ಈಗ ನನ್ ಲವ್ ಟ್ರ್ಯಾಕ್ ಚಿತ್ರದಲ್ಲೂ ಎಂ.ಜಿ. ರೋಡ್‌ನಲ್ಲಿ ಚಿತ್ರೀಕರಣ ಮಾಡಲಾಗಿದೆ. ಹಾಗೆ ನೋಡಿದರೆ, ಕದಿರ್ ಬಹಳ ಪ್ರತಿಭಾವಂತರು. ನನ್ ಲವ್ ಟ್ರ್ಯಾಕ್ ಸಿನಿಮಾದ ಕತೆ, ಚಿತ್ರಕತೆ ಅವರೇ ಬರೆದಿದ್ದಾರೆ. ಹೊಸ ರೀತಿಯಲ್ಲಿ ಪ್ರೀತಿ ಪ್ರೇಮವನ್ನು ನವಿರಾಗಿ ತೋರಿಸುವುದರಲ್ಲಿ ಹೆಸರುವಾಸಿ. ಇವರ ನಿರ್ದೇಶನದ ಚಿತ್ರಗಳು ಸೂಪರ್ ಹಿಟ್ ಆಗಿವೆ. ಮತ್ತು ಬಹುತೇಕ ಎಲ್ಲವೂ ವಿವಿಧ ಭಾಷೆಗಳಿಗೆ ರಿಮೇಕ್ ಆಗಿವೆ. ಮಾತು ಕಡಿಮೆ ಕೆಲಸವೇ ಸರ್ವಸ್ವ ಎನ್ನುವುದು ಕದಿರ್ ಸ್ವಭಾವ.
‘ಕದಿರ್ ಸಾರ್ ತುಂಬಾ ವರ್ಕೋಹಾಲಿಕ್. ಕೆಲಸ ಕೆಲಸ… ಅಂತ ಸದಾ ಕೆಲಸದಲ್ಲಿ ಮುಳುಗಿರುತ್ತಾರೆ. ಅವರ ಸಿನಿಮಾ ಬಗ್ಗೆ ಕೂಡ ಮಾತನಾಡೋಕೆ ಇಷ್ಟ ಪಡೋಲ್ಲ. ನೀವೇ ಸಿನಿಮಾ ನೋಡಿ ಹೇಳಿ ಅಂತಾರೆ. ಅವರ ಕೆಲಸದ ಶೈಲಿ ತುಂಬಾ ವಿಶೇಷವಾದ ಅನುಭವ ಕೊಟ್ಟಿದೆ’ ಅಂತಾರೆ ಚಿತ್ರದ ನಾಯಕ ನಟ ರಕ್ಷಿತ್.
ಚಿತ್ರವನ್ನು ಬಿ.ಎನ್. ಕೃಷ್ಣ ಮೂರ್ತಿ ಮತ್ತು ನವೀನ್ ಶರ್ಮಾ ನಿರ್ಮಾಣ ಮಾಡುತ್ತಿದ್ದಾರೆ. ನನ್ ಲವ್ ಟ್ರ್ಯಾಕ್ ಮೂಲಕ ಕನ್ನಡದಲ್ಲಿ ನಿರ್ದೇಶಕ ಕದಿರ್ ಯಾವ ಕಮಾಲ್ ತೋರಿಸುತ್ತಾರೆಂಬುದನ್ನು ಕಾದು ನೋಡಬೇಕಿದೆ.
