ಹಾಲಿವುಡ್ ಹಾಟ್ ತಾರೆ ಸನ್ನಿ ಲಿಯೋನ್ ಕನ್ನಡಕ್ಕೆ ಬಂದಾಯಿತು. ಡಿಕೆ ಸಿನಿಮಾದ ಹಾಡಿಗೂ ಕುಣಿದಾಯಿತು. ಸನ್ನಿ ಲಿಯೋನ್‌ರನ್ನು ಕನ್ನಡಕ್ಕೆ ಕರೆತರಲು ಪ್ರೇಮ್ ಮಾಡಿದ ಸಾಹಸ ತುಂಬಾ ರೋಚಕವಾಗಿದೆ. ಅದನ್ನು ಪ್ರೇಮ್ ಬಾಯಲ್ಲೇ ಕೇಳಿ.
‘ಡಿಕೆ ಸಿನಿಮಾದ ಕತೆ ತುಂಬಾ ವಿಶೇಷವಾಗಿದೆ. ಅದರಲ್ಲೂ ಸಿನಿಮಾದ ಹಾಡೊಂದು ಚಿತ್ರಕ್ಕೆ ಮತ್ತೊಂದು ತಿರುವು ನೀಡುತ್ತದೆ. ಆ ಹಾಡಿಗೆ ಸ್ಪೆಷಲ್ ನಟಿಯೇ ಬೇಕು ಎನ್ನುವುದು ಕತೆಯ ಡಿಮಾಂಡ್. ನಿರ್ದೇಶಕರ ಜತೆ ಕೂತು ಚರ್ಚೆ ಮಾಡಿದೆ. ನಾಲ್ಕೈದು ನಟಿಯರ ಹೆಸರು ಬಂದು ಹೋದವು. ಕೊನೆಗೆ ಆಯ್ಕೆ ಆಗಿದ್ದು ಸನ್ನಿ ಲಿಯೋನ್. ನನ್ನ ತಂಡದ ಹುಡುಗರು ಸನ್ನಿ ಹೆಸರು ಹೇಳಿದಾಗ, ಅವರು ಖಂಡಿತಾ ಸಿಗುವುದಿಲ್ಲ ಎಂಬ ಮಾತು ಬಂತು. ಅವರನ್ನು ಪಳಗಿಸುವುದು ತುಂಬಾ ಕಷ್ಟದ ಕೆಲಸ ಎಂಬ ಚರ್ಚೆಯೂ ಜೋರಾಯಿತು. ಇಂತಹ ವಿಷಯದಲ್ಲಿ ನಾನು ತುಂಬಾ ಹಠಮಾರಿ. ಕತೆಗೆ ಏನು ಬೇಕೊ ಅದು ಇರದೇ ಇದ್ದರೆ ನನಗೆ ಸಮಾಧಾನ ಇರುವುದೇ ಇಲ್ಲ. ಕೇಳಿಯೇ ಬಿಡೋಣ ಅಂತ ಬಾಂಬೆಗೆ ಹೊರಟೆ. ಸನ್ನಿಯವರನ್ನು ಒಪ್ಪಿಸುವುದಕ್ಕಾಗಿಯೇ ಅಲ್ಲಿ ಎರಡು ದಿನ ತಂಗಬೇಕಾಯಿತು. ಕಡೆಗೂ ಅವರನ್ನು ಒಪ್ಪಿಸುವಲ್ಲಿ ಗೆದ್ದೆ’ ಅಂತಾರೆ ಪ್ರೇಮ್.
ಮೂಲಗಳ ಪ್ರಕಾರ ನಾಯಕಿಗಿಂತಲೂ ಸನ್ನಿ ಲಿಯೋನ್‌ಗೆ ಹೆಚ್ಚು ಸಂಭಾವನೆ ನೀಡಿದ್ದಾರಂತೆ ನಿರ್ಮಾಪಕಿ ರಕ್ಷಿತಾ. ಆದರೆ, ಸಂಭಾವನೆ ವಿಚಾರವನ್ನು ಹೇಳುವುದಿಲ್ಲ ಎನ್ನುವುದು ನಿರ್ಮಾಪಕರ ಮಾತು. ಕೋಟಿ ಕೋಟಿ ಎಣಿಸುವ ಸನ್ನಿ ಇಲ್ಲಿಯೂ ಕೋಟಿಯೊಳಗಿನ ರಾಣಿ ಆಗಿದ್ದಾರೆ ಎಂಬುದು ಅಷ್ಟೇ ಸತ್ಯ. ಸನ್ನಿ ಲಿಯೋನ್ ಕುಣಿದ ಹಾಡು ಸದ್ಯ ಸಿಕ್ಕಾಪಟ್ಟೆ ಫೇಮಸ್ ಆಗಿದೆ. ಮತ್ತೆ ಕನ್ನಡದಲ್ಲಿ ನಟಿಸುವ ಆಸೆಯನ್ನೂ ಸನ್ನಿ ವ್ಯಕ್ತ ಪಡಿಸಿದ್ದಾರೆ.
ಪ್ರೇಮ್ ನಿರ್ದೇಶನದ ಜೋಗಿ ಸಿನಿಮಾದಲ್ಲಿ ಯಾನಾ ಗುಪ್ತಾ, ಪ್ರೀತಿ ಏಕೆ ಭೂಮಿ ಮೇಲಿದೆ ಚಿತ್ರದಲ್ಲಿ ಮಲ್ಲಿಕಾ ಶೆರಾವತ್, ಪ್ರೇಮ್ ನಟನೆಯ ಪ್ರೇಮ್ ಅಡ್ಡದಲ್ಲಿ ಸ್ಕಾರ್‌ಲೆಟ್ ನಿಕೋಲ್ಸನ್ ಪ್ರೇಕ್ಷಕರಿಗೆ ಮೋಡಿ ಮಾಡಿದ್ದರು. ಪಡ್ಡೆಗಳ ನಿದ್ದೆಗೆಡಿಸಿದ್ದರು. ಸನ್ನಿ ಲಿಯೋನ್ ಮತ್ತೇನು ಮೋಡಿ ಮಾಡುತ್ತಾರೋ ಕಾದು ನೋಡಬೇಕು.
