ಬೆಂಗಳೂರು: ಕರ್ನಾಟಕ ಚಲನಚಿತ್ರ ಅಕಾಡೆಮಿಯ ನೂತನ ಅಧ್ಯಕ್ಷರಾಗಿ ನಿರ್ದೇಶಕ ಎಸ್‌.ವಿ.ರಾಜೇಂದ್ರ ಸಿಂಗ್‌ ಬಾಬು ಅವರು ಗುರುವಾರ ಅಧಿಕಾರ ವಹಿಸಿಕೊಂಡರು.
ಅಕಾಡೆಮಿಯಲ್ಲಿ ಮಧ್ಯಾಹ್ನ ನಡೆದ ಸಮಾರಂಭದಲ್ಲಿ ಅಧ್ಯಕ್ಷರ ಕೊಠಡಿಯಲ್ಲಿ ಕುಟುಂಬದ ಸದಸ್ಯರೊಂದಿಗೆ ಪೂಜೆ ಸಲ್ಲಿಸಿ ನಂತರ ಅಧ್ಯಕ್ಷರ ಆಸನದಲ್ಲಿ ಆಸೀನರಾದರು.
ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಸಿಂಗ್‌, ‘1970–90ರ ದಶಕಗಳಲ್ಲಿ ಕಾದಂಬರಿ ಆಧಾರಿತ ಚಿತ್ರಗಳ ನಿರ್ಮಾಣದಿಂದಾಗಿ ಕನ್ನಡ ಚಿತ್ರರಂಗವು ಮೆರುಗಿನಿಂದ ತುಂಬಿತ್ತು. ಪ್ರಸ್ತುತ ತುಂಬ ಸಂಕಷ್ಟದಲ್ಲಿದೆ. ಕನ್ನಡ ಚಿತ್ರಗಳು ಕರ್ನಾಟಕದಲ್ಲಿಯೇ ಪ್ರದರ್ಶನ ಕಾಣದಂತಹ ಸ್ಥಿತಿಗೆ ತಲುಪಿವೆ. ಹಂಚಿಕೆದಾರರು ಕನ್ನಡ ಚಿತ್ರರಂಗ ಬಿಟ್ಟು ಹೋಗುತ್ತಿದ್ದಾರೆ. ಕೆಲ ಪ್ರದರ್ಶಕರು ಕನ್ನಡ ಚಿತ್ರಗಳನ್ನು ಪ್ರದರ್ಶಿಸುತ್ತಿಲ್ಲ. ಹೀಗಾಗಿ, ನಮ್ಮ ಚಿತ್ರರಂಗ ದಿನೇ ದಿನೇ ಸೊರಗುತ್ತಿದೆ’ ಎಂದು ಹೇಳಿದರು.
‘ಉತ್ತಮ ಅಭಿರುಚಿಯ ಚಿತ್ರ ತಯಾರಿಸಿ ಎನ್ನುವ ಬೇಡಿಕೆ ಬರುತ್ತಲೇ ಇವೆ. ಆದರೆ ನಮ್ಮಲ್ಲಿ ಉತ್ತಮ ಚಿತ್ರಗಳು ಬರುತ್ತಿಲ್ಲ. ಬಂದರೂ ಪ್ರದರ್ಶನ ಕಾಣುತ್ತಿಲ್ಲ. ಆದ್ದರಿಂದ ಮುಂಬರುವ ದಿನಗಳಲ್ಲಿ ಚಲನಚಿತ್ರ ವಾಣಿಜ್ಯ ಮಂಡಳಿ, ನಿರ್ಮಾಪಕರು, ನಿರ್ದೇಶಕರು ಹಾಗೂ ಕಾರ್ಮಿಕರ ಸಂಘಗಳನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಚಿತ್ರರಂಗದ ಎಲ್ಲರ ಸಹಕಾರದಿಂದ ನ್ಯೂನತೆಗಳನ್ನು ಸರಿಪಡಿಸುವ ಕಾರ್ಯ ಮಾಡುತ್ತೇನೆ’ ಎಂದರು.
ಚಲನಚಿತ್ರ ಕಾರ್ಮಿಕ ಒಕ್ಕೂಟ ಅಧ್ಯಕ್ಷ ಅಶೋಕ್, ನಟ ಸುನೀಲ್‌ ಪುರಾಣಿಕ್‌ ಮತ್ತು ಚಿತ್ರರಂಗದ ಅನೇಕ ಹಿತೈಷಿಗಳು ಬಾಬು ಅವರಿಗೆ ಶುಭ ಕೋರಿದರು.
ನಿರ್ದೇಶಕರ ಸಂಘದಿಂದ ಮೊದಲ ಮನವಿ
ರಾಜೇಂದ್ರ ಸಿಂಗ್‌ ಬಾಬು ಅವರು ಅಧಿಕಾರ ವಹಿಸಿಕೊಂಡು ಅಧ್ಯಕ್ಷರ ಕುರ್ಚಿಯಲ್ಲಿ ಆಸೀನರಾಗುತ್ತಿದ್ದಂತೆ ಅವರಿಗೆ ಚಲನಚಿತ್ರ ನಿರ್ದೇಶಕರ ಸಂಘದ ಪದಾಧಿಕಾರಿಗಳು ಮೊದಲ ಮನವಿ ಪತ್ರ ಸಲ್ಲಿಸಿದರು.
ಸಂಘದ ವತಿಯಿಂದ 15 ವರ್ಷದಿಂದ ನಿರ್ದೇಶನ ತರಬೇತಿ ನೀಡಲಾಗುತ್ತಿದೆ. ಇದೀಗ, 7ನೇ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದಲ್ಲಿ ಭಾಗವಹಿಸಲು ತರಬೇತಿ ವಿದ್ಯಾರ್ಥಿಗಳು, ಸಹ ಮತ್ತು ಸಹಾಯಕ ನಿರ್ದೇಶಕರು ಉತ್ಸುಕರಾಗಿದ್ದಾರೆ. ಅವರಿಗೆ ರಿಯಾಯಿತಿ ದರದ ಪಾಸ್‌ ನೀಡಬೇಕೆಂದು ಮನವಿ ಮಾಡಿದರು.ಆಗ ಸಿಂಗ್‌ ಅವರು ಪತ್ರದ ಮೇಲೆ ‘ನೋಡಿ, ಪರಿಶೀಲಿಸಿ’ ಎಂದು ಷರಾ ಬರೆದು ಸಹಿ ಹಾಕಿದರು.
